قال الفتى المهجوس بتفكر =في ثورة الشجعان والمنصر
في ثورة أربعتعشر أكتوبر =سيولها فاظت ملا الوديان
ذي حررت من كان مستعمر= وطرّدت لذناب بالأبتر
والشيخ والسلطان والمعشر = ذي يحكمون الظلم والطغيان
قفُو وعاد الصبح مابصَر = وإن حد نشد ولا حد تخبَر
خلَو تراب المسك والعنبر = وتهربو من حيث هم حلان
ثورة عظيمة نورها يظهر = تشرق على الأوطان في المحجر
تنور بلادي بحرها والبر = ذي في المدن وذي في الخليان
عاش البطل ذي ثار وتعفطر = في ثورته يضمد من المشور
داعي دعا والشعب ما قصر= مبسوط من ليسر ومن الأيمان
المدفع الرشاش والميزر= والقنابل ذي عليها الجر
والميج والصاروخ ذي يذكر = ذكره طلع في دش وامريكان*
ياطارشي مسراح واتنشّر =من روضة اسراييل لما( سَرْ)*
تحت (الحويله)و(الجبل لصفر)= و(الغالبه) ذي فوقها(دحان)
وبامرق مكتوب في الدفتر= و(الحوش)وأهله مكرم الضيفان
وبن حدج خله على المعبر = (وبن قطش)مزحوم بـ(المعجر)
والحيد الأعلا شف له واظهر = راس الجبل قيـّل مع الرعيـان
و(باكبيره)من سهر يسهر = فيها النمر والذيب والسنجر
وفيه حامد كابري الأيسر = وفيه صالح منصبه فنان
وادخل(عتق)ياخير من بندر = سلم على المركز وعاالعسكر
وعاالمحافظ ألف واثنعشر = واللجنة العليـا في المـيدان
وقل لهم مطرود من مالي= من تركتي ذي هي على جالي
قد لي بطى عيش بها عيالي = وسرى عليها الظلم والعدوان
وانا معي أسرة ملا داري = عشره نفر والرزق عالباري
يمسون بأيساري وأيماني= ولا معي درهم ولا دكان
وإن عادكم جدتو بترجيعي= من بعد ما جازو بتوزيعي
ولا أنا باحط توقيعي = عند المحافظ داخل الديوان
تاريخها الإثنين عالرادي = تسعه وعشرين الشهر ذي بادي
وسبعتعشر يوم ميلادي =لكنهم قالو خرج شعبان
قدهم يبونا نصوم من بُكره =رادي عدن صرح في النشره
وانا سمعته ساعة السهرة = قلنا لهم ماقدر اللــه كان
هذا يمن واحد دمقراطي = مافيه لارافع ولا واطي
من منطقة جيزان للشاطي = ومركز الخضرا معا نجران
وأرض السعودي فيصل الوالي = والوالي الرحمن ياعيالي
ذي رتج الدنيا باالجبالي = يخلق ويرزق إنسها والجان
والختم..بالصاروخ والشجعه = ورجال ذي تخرج مع الفزعه
سبحان ذي ينشي من الزرعه = وجعل من الماء كل شي ريـان