كل من طلب باكرمه والدوسري باحمله = ماحد خلاف الدوسري ذي باينوش بالثقال
ياعارف المهراء سمع وقبض شروع القبوله = واقنع اذا حصلت لك من عندنا لقمه حلال
البلبله يا حاني القرنين تبقى بلبله = أما أنا سيد وقابض رمح بو زيد الهلال

أما المحافظ قد برز واللي معه قد حلله = اتهمت حامد صاحبي قمط عزيزه بالحبال
أنا عرفته من زمن وأعرف بواب البنقله = ذي كان تاجر في عدن يخلط حرامه بالحلال
ياحسين ذا ينهص علي يومه وصف بالمرجله = يقول ذا بدوي غبي والسين له جيم السؤال

حسن يغالطني وانا سجلت رأس المال له = واليوم يبغاني دخل به في ميادين القتال
عدل طباعك قال بو علوي وخل القحوله= ولا تفرط في جمل ما له مشابه في الجمال

وليش باتتهم علي سيد وخل الزعقله = شغلك تنظف مسجدك ولقيت لك غتره وشال
وأنا قبيلي مافزع والموت لا جا بقبله = كلما ورثته مال لك من قبل ماتصبح كلال

بصبر على الصاحب وأن قد شي نقص باكمله = وأن قد غلط عالهاشمي باقول لله الكمال
وبيحصلني وانا في يوم لازم حصله = وأن ضاق حالي من حسن والله لكلكل به كلال

وليش ما قلتوا كذا وكثرت هرج العرقله = الله ما بيعذبك ويرزقك من خير العمال
أما انا وأنته سواء دخلي ودخلك لجمله = انت معك عشرين سلقه وانا معي في مصر مال

ياحسين بن ناجي اذا انته شيخ حل المشكله = والا جلس وحدك هنا وفحس يمينك والشمال
الهاشمي معروف وبعيري بيدي نعقله =وحسن كما البترول لشعلته سريع الأشتعال

الأسم ذي جبته علي كمين رييس جمله =رقى شعوبه يا ولد وانتوا حضرتوالاحتفال
أبوك لا خلف حجل مفروظ منك تعمله = سيول قد جاته شرب يرعوه بدوان الرمال

الباب ذا لا تفتحه قل للمغني قفله = قولو لبو شايع تنتشر في حطيطات الذبال
الخير باتشوفه بعينك في السنين المقبله = وباتشوف الهاشمي عامد شناطيب الجبال

هذا محمد ذي طلب والشيخ يوخذ لوله = وأنا حسن باقدره عندي كما الرئيس جمال
وأنا مشرف من حضر وأن جاب غلطة بحمله = وأنته برز يالهاشمي يحلم وصدق بالخيال

أنت ذي علمتني شغل الحيل والزنقله = واليوم تنكر يا حسن وتجيب ليه ضيق حال
لاكننا من موسمي ما معطيك حتى سنبله = ما عاد بحسب للزمن أنه قصر ليله وطال

أبوك من لول ذكي والجد شيخ المرجله = لكن جاه العامري وتحيله والصبح زال
والهاشمي سيد وفي كل مامعه قد سبله = باتخبرك من طمعك وعلموك الاحتيال

لكن من شغل القبايل باتجينا زلزله = وبا يموت النوب ذي يلقي عسل صافي زلال
واليوم لا ثوبي وسخ باروح به للمغسله = وبشتري لي ثوب ثاني بالف وثنعشر ريال

هذا حبيبي قدرك ولقيت صدري قصر له = لما خرب دله علي ولقالنا كي الجمال
والخصم اذا شفته قبل لا بد له من غربله = في الأرض ضيع شيمتي ودمر بيوتي والعيال

غربل اذا غربلت باتحصل قروش مصلصله = وكل خصله باتحصل سدها اربع خصال
لو كان فكر صاحبي في قول حامد يعقله = من ما معه شي عقل ما بانحسبه شاجع وفال

هذا كلامك من زمن كمين صحفي سجله = والذل جاء من صاحبك شاجع وخلى البار ذال
صيتك طلع سطح القمر والظلم هو ذي نزله = ولقوك في نار الحطب مخزون في البرميل هال

هرج الصحف منقول ماهو شي بايه منزله = والكذب من طبعك وأما الصدق عندي لا يزال
عالدان باغني واي موال انا بامؤله = وبيجيك جواب اذا قدمت لسيد سؤال

دعوى وتقوى يا حكم هرج الخطأ لا تقبله = وان جاء غلط باسايرك بعد الخمج بشرب زلال
وأن عرفت الحق لي في الصدق ما با جامله = حتى ولو يقوم النبي وفي (قبا) يذن بلال

يا صاحبي عدت وثائق بيننا متسلسله = عمان با تشهد بها ورجال دخلوا في المجال
بين السماء والأرض روحك يالخبيث مدندله = وفي جنان الخلد والفردوس ما لك شي حلال
يا حسين بن ناجي أحكم والرأس لازم تفصله = وشركت الأثنين لا فشلت نهايتها انفصال

حامد محاسب على العرب كل من بغض بايدخله = جنان في دوعن معه والنار عنده راس مال
قد كان من ذري النبي وبعد ساعه بدله = خلى المذاهب لأربعه قال الطبيعه لي حلال
وأنا حسن عاملتي والكفر لصحابه وله = ومذهبي الشافعي لما يجيني لرتحال

أنته بشق واحنا بشق ودمنا بانحلله= خايل خيالك يا حسن وخلنا خايل خيال
أن كان تبغى القتل يصبح عاكراسي ديوله =نادي على رجالك وانا باجيب لك عز الرجال
مابعد هذا الحين مابيني وبينك شي صله =الحكم للحاكم وباقي الناس تسمع أيش قال

لدعيك يا حامد تجي والسم حقك عامله = باتخرب الدنيا علي لما نوينا لغتيال

النفس في رقبتك واحنا من قتل بانقتله = وبالنفذ فيه حكم الله ربي ذي جلال

والختم صلوا على النبي بالحق ربي أرسله = من هو على دينه نقي يشرب من الكوثر زلال

ذلحين بحكم بينهم قول المسجل سجله = لاكن سجل حكم بن عكعوك من داخل سجال
اثنين مختصمين كلن يدّعي بالمعقله = لاتغتر البسام والقا فوقها شامي عقال
كلن يريد النقص لثاني ولا شي زوود له = معجب بمزمار المزمر لاسجع يالال لال
الله يكفينا عقول(ن) ناقصه والمظلله = في روس ناس(ن) مسعفو لشمس دايم في ظلال
كل(ن) يريد الا مزاجه والذي يتّخيله = غشيم متعافي عديم العقل يسبح في خيال
اعقول قشرا عشعشت فيها صنوف المهزله = كل(ن) يريد الا السمينه والهزيله للهزال
من عهد تبع واليمن من مشكله لامشكله = مشلول حركه بايظلّي لك مشكل في شكال
شعب(ن) ربي عالجهل مايتقن خلاف البلبله = قدهم يقولون الغبي يجلب على راسه وبال
وان حد مثقف هو مذبذب منحرف وش يعدله = مادام رب البيت خارب ماعرف وش لعتدال
وان قد مسك منصب يحب صهره وعمه نكله = فرحته لاجاه المسالم باينكلبه نكال
يضغط على المسكين يبغى ذي معه بايوكله = يوكل عشى المحروم وطفاله يباهم للكلال
ومن يشتكي مسؤول ياويله جلب له معضله = ذبحوه ولقوله سبب في روس سبب له عضال
ذلحين باجاوب حسن والبار في ذالمسأله = يبغوني احكم بينهم من دون مسألهم سؤال
البار ظالم قد علي عنتر بدوره وكله = خلاه شرطي عالمكلا وكلو حامد وكال
القى مناكر فالشريعه كل محرم حلله = وقال حتى شجرت الزقوم شتلتها حلال
كل من رفع راسه حصل له شي مايتخيله = جابو عيال الشعب له يلقون في جمبه خلال
هاذا حقايق واضحه شملت شيوخ القبوله = الجيب جاهز والسلب ربطوه ودبربه قبال
ومن يعمر بيت او معمل تصادر معمله = باقول كلمت صدق ماجامل خبيثين العمال
اعمالهم جلبت لهم بركانها وزلزله = جلبت حسن محسن لهم منقذ وزولهم زوال
القالهم فرّق تسد بالعنصره والقزوله = كما غنم شفيا في المرعى تفرقهن قزال
غذ المشاكل يوم شجعلك قبل متقاتله = من شان يسلا شرهم فتح لهم باب القتال
طبقات خل الشعب ذا حر(ن) وذا بو فلفله = من عهد سابق قالت العربان نسل الفال فال
قعدان يجلبهن وقال انهن بكار امشمله = يبغوا لبن مالحقو الاقب من تحت الشمال
يضحك على سذج سمان اعضاء جروم امغفله = حد منهم ماسوم في رقبته والجمله غفال
الصعب يرسله حسن عساف ذي بي ذلله = يفسح في الشطحه ويمشي لك معى الناس الذلال
هاذا عن اعمال الجماعه صغتها متسلسله = وان حد مكذبني بغيته عنهم لول يسال
حكمي ابا لثنين من داخل سجون امقفله = ولايحطو قفل واحد يطرحو سبعه قفال
يتأملون الشعب هاذا حكمهم وتأمله = ليلت يباتو في قفص والله عندي راس مال
بازورهم في سجنهم من بعد نوم البنقله = وبالذكرهم بمنتوج السريّع والبقال
واختامها تنفيذ حكمي ياحذاري تجله = ياشعبنا باشر بتنفيذه معك رب الجلال