حيا وسهلا بالجمل والعبارات =من عند شاعر باعذب الشعر يرويك
خالد . وخالد خالد الذكر ما جات = في يوم منّه قاصرة او غدر فيك
صوته في السمرة كما عشره اصوات = والحرب فيها لادعيته يلبيك
ما يعتذر في ساعة الضيق بالذات = يمسي يهد بالميم طاء والبلاجيك
صولات له في كل موقف وجولات = والحرب له فيها مواقف توديك
للنصر. ويجيب العدو في متاهات = ويصمّك الأبواب في الوجه تصميك
وبعد يالمرسول شل الرسالات =لاعند خالد ثم قل له يهنيك
بالفوز عبدالله ونيل البطولات = وأزكى التحاياء والسلامات يهديك
ثم قل له أن الجو فيه انقلابات =ماهو كما منته تحب دوب ياتيك
لا تستبق الأحداث واحسب حسابات =للي يثيرونك وللي يهديّك
بالعقل والمنطق قياس المسافات= لقصر طرق ما عذر له مايوديك
وابعد عن أصحاب الخطب والشعارات = وانته بن ادم ماتبى حد يرويك
لي في المصارف يكنزون الريالات =ما ضن حد فيهم من الفقر يغنيك
لجل الكراسي نظموا الأعتصامات = ما نظموها لجل نسيان ماضيك
لو كان لك حد خو يقود المسيرات=يفرح من افراحك وياذيه ماذيك
بانرفع اسمه والصور فوق هامات= ماتنحي ماغير لله باريك
لي بايجي ياخوي مثل الذي بات =هذا كما هذا وهذي كما ذيك
يتبادلون الدور في نهب ثروات=جابوا بواخرهم لها والسنابيك
لي يسرقوا كحل العيون السهيرات = يابن مهنا عينهم من مخابيك
لاترتجي شي خير من بايع القات= واهل العمايم واللحى والمساويك
لي سرّحك مغصوب مابايضويك=وان قد ضويت انته مراده يسريك
يبغاك تبقى دوب جنب السفارات = من تحت رحمة ناس ع المر تسقيك
من خلف وادي مور لاخلف عينات = بالخير ماحد قال ربي يمسيّك
للأسئلة ماباتحصل جوابات = عند الصكك والمرتشي والصعاليك
لو من مقابرهم يقومون لموات = لمباتهم باتنطفي والاتاريك
ماباك تقبلها على كيف ماجات= والا تلبي صوت كل من يناديك
حذرك تخاوي من يخون المخاوات =خاو الذي فالضيق نفسه يخاويك
وان باتحل حل فالحصون المنيعات = عند الذي دايم يلبون داعيك
والمعتدي عالحرث والنسل بالذات = له لاتخليها خليّه مرابيك
لازم نحط للظلم حد والمعانات = قبل ان تعزيني وانا قوم عزيك
ونرجّع أيام ألهنا والمسرات = للأرض لي دايم تضمك وتاويك

لي يسرقـوا كحـل العيـون السهيـرات ** يـابـن مـهـنـا عيـنـهـم مـــن مخـابـيـك

لاترتجـي شـي خيـر مـن بايـع الـقـات ** واهــل العمـايـم واللـحـى والمسـاويـك


الشاعر /عبدالله الجعيدي أبو ســــــــــالم