قصيدة فكاهية
 

قالت بغـــت توصل لعـــقله عبر كرشـــه
وكرّت على بوه واصبح ياعرب مكروش

تثور بدري وعالمـــطبخ ومــــن غـــبشه
حياش واللـــه يا نشـــيطة وحــيا بوش

تقرب البصـــط ويجـــون عــيالها دغشه
وكل واحد يـــطرّب قـــم يـابابا غـــوش

تــــنوع الاكل عشـــان يبـــطل النفـــشه
وهي مطعشر شعرها متكعلس ومنكوش

وثيابها ثياب عامل ســـــاكن بورشــــه
يصبح ويمسي وثوبه في الجحي مفروش

لكل شـــي تـــقول ني نعرف ومع الربشه
قالـــت نفـــخط ونعرف للـــعلوب ننوش

نعجـــن ونخـــبز وزوجي نرتب لقــــشه
ونحلب الضون وعادني للحواش نقوش

يخـــنها الا ملك جالـــس عــــــلى عرشه
وكـــل تدبيـــرها قد راح عالفـــاشـــوش

لبـــوش راعـــه لبـــوش اليـــو والفقـشه
من سبتش شيه صابر والقلـــب مفقوش

ما تـــدري ان الرجـــل عينه على النقشه
وعالطـــرف لكحل وعاللي كفـها مـنقوش

حتى اذا كـــان جايع يغـــمز برمـــــــشه
ويفرقز العـــين في اللي مركبه لرمــوش

امّا ســـواد البـــالطو عاطـــــول بيـغشه
ياكم وكم من فتى امسى وهو مغشوش

خالد دغاري