هلت تباشير الفرح واقبل العيد=والكل يرقص بالفرح ليلة العيد
واللي رحل مدري بالأفراح بيعيد=والا خذته مصفدات الحدايد
هل الهلال وعيدنا ما نشوفه=والحلق به غصه وزايد نشوفه
والشوق فينا مثل جمر نشوفه=العيد صاير مثل باقي العوايد
العيد هلّ / وما وصلنا شفاته=والجرح غار وكم رجينا شفاته
والعين تتمنى / تعانق شفاته=فالعيد ماهو بس لبس الجدايد
العيد في شوفت عزيز ن فقدناه=والعيد في وصل ن لرحمٍ وقدناه
لكن كيف الوصل بعد ان رقدناه=يارب ونس وحشته والفرايد
العام / عيدنا / وزرنا / مرابيه=والأمس نبكي حين نرمي ترابيه
واليوم جانا العيد / يبغى نرابيه=فالحمد لله / أمر ربي وكايد
يارب بعد الصبر جبر وسلوان=مدري بهالدنيا مكاسب وسلوان
والا عذاب ن بالمقابيس والوان=والنفس تأنس ماجنت من فوايد
استغفر الله عيد ربي علينا=هلت تباشيره ونوره علينا
وما زرعنا به رفعنا وعلينا=معه تكون افراح قلب المعايد
ياعيدنا / اهلا هلابك ونزدان=بك الملأ بتعيش فرحة وتزدان
والقلب للتقوى بيصبر ويزدان=يامرحبابك /للتباشير سايد
العيد له فرحه وبالناس جمعه=والكل يتزين بما زان جمعه
لكن نسينا كيف للعيد جمعه=فالعيد يوم وباقي المال بايد
تبوا تعيشوا فرحة العيد مره=شوفوا صحايفكم بها اجر مره
هيا توقوا النار لو شق / تمره=ثقل موازينك بخير الزوايد
ياكم بلاد ن دمرتها المجاعه=والجار يبكي ما تلمس وجاعه
يجوع شوفك والأمل فيك جاعه=ياهل ترى نهنى لذيذ الرقايد
ياعيد معهم نكسب افراح دنيا=وليا ذكرناهم نقل ايييه / دنيا
كذا الحياه / مابين عليا ودنيا=والعين تبكي / كلما لاح نايد
عيشوا الفرح وتجملوا للحبايب=فعيدنا الباقي / بشوف الحبايب
حتى ان تزاعلنا بنبقى حبايب=فالله يسامح كل من تاب عايد
صحيح ان العيد شوف الغوالي=وصحيح فرحتنا بلبس الغوالي
لكن نسينا كيف نكسب غوالي=تحفظ لنا مثل الصحف والجرايد
ياصاح وثق بالتهاني مكاتيب=جمّل مكاتيبك لذوق المكاتيب
فالعمر كله ياعزيزي مكاتيب=حنا نريد وخالق الكون رايد
كل عام وانتم يامحبين في خير=والله/ يرزقنا / صلاح المواخير
يارب واجمعنا بهم ساعة الخير=وأظلنا ابظلك نهار الوقايد
يا عيدنا هَلّ الفرح وانتشينا=والكل غنى / فرحته منشينا
مابك حلا لكن لا منته بشينا=يارب عيده خير عند المعايد
هذا وصلاة الله على خير هادي=محمد المختار من رب هادي
اعداد ماهلت مزون المهادي=عليه صلى الله ونتم القصايد