جتني أخبار من وادي على القلب غالي =فيه كم من بطل ما يعطي الخصم ليه
نسمتني ومني ميّّلت ضيق حالي = ردّت الروح للنفس الذي هي شقية
ذكرتني بزام أهل الشروع الطوالي= لي لهم في دروب المجد روحة وجيه
رصعوا بالجواهر تاجهم واللآلي =واستعادوا لنا مجد الصفف الأولية
كاسهم عا لساني رجّع المر حالي = طعموني عسل من نوب يلقي بغية
بحمد الله فالقبلة مشوع هلالي =والكواكب مست منه وحدراء مضيه
زال همي وضيقتي انجلت وانشغالي = عندما ماشفت بالعين الخوي مع خويه
حررتني إرادتهم نهار اعتقالي = رجعتني شجاعتهم لداري عشيه
نوروا سود كل أيامهم والليالي = وأصبحت شمسهم فوق القمم معتلية
هكذا كل ما مالت حمولة جمالي =ردوا الميل عاظهر الجمل والمطية
بالمخاطر ولا بالموت ما حد يبالي = جابوا الفيد والمكسب بهمة قوية
ما بدا يوم حد منهم لبس ثوب بالي = لبسهم من نيودلهي يجيهم هدية
بالجنيهات ما باعوا ولا بالريالي =فيك يا مال كثروا حولك المشترية
كل واحد يقول النخل والمال مالي =والقسوم أصبحت ما بينهم مستوية
واجتمع عالشرف شمل العلا والقبالي = في حريضه وفالوادي على طيّب نية
الجعيدي طرح بلجيك عالكتف وآلي =والصقيري بدبابته غت السرية
والمنية لها قالوا بسرعة تعالي = واستعدوا لها والنفس كانت رضية
في الحروب اقتدوا بالأولين التوالي=وردوا خصمهم من فوق حوض المنية
بالمقوب وبالمرشون جابوا عيالي =من غياهب سجون العصبة المرتشية
لبسوا ضيفهم شيذر حطيط الذبالي = بعد ما استقبلوا موكبه بالمدفعية
والبراريد فوق النار له والدلالي =كل خرمان صبوا له من الشادلية
يا صحاب الجلالة والسمو والمعالي =كل من شاف زاخيكم ضرب له تحية
ترقل الأرض تحت أقدامكم والجبالي =ترتقل من قريب الفجر للمغربية
كيف بهمر ثمان القيظ وانتوا ظلالي =واسمكم لي نهار البرد شمس الضحية
يا صحابي عليكم با يكون اتكالي = في المهمات بعد الله رب البرية
حيث حط القدم با سير والراس عالي =ما توطت قشاع اوعالي المربعية
يوم لبوا مطاليبي ودخلوا مجالي = واستقاموا وساروا عالطريق البتية
حملوني جمايل جم تفوق احتمالي =بوصي الابن وأحفادي عليها وصية
جاني اليوم رد منهم على نص سؤالي=باقي النصف الآخر يا رجال الحمية
لي يخص قال بلجذم عمر ولد خالي = لي مسجل في الدفتر علينا قضية
والذي ما مشى في سكته باعتدالي = لاتخلوه يمشي في طرق ملتويه
والغشيم الذي همه يشل راس مالي=ما عدل ياصلاب الروس بين الرعية
الجنوبي بعينه ماهو مثل الشمالي =ذاك مبعد وذا قرّبه منه شويه
وان بقي هكذا بصبح زعيم انفصالي =له حدوده وله موطن ويملك هوية
واختم القول يا من لو سمعتوا قوالي =كل واحد يصلي منكم ع نبيه