( غريب ) الفرق ما بيني وبينه دائماً شاســــع = أنا ترتيبي الأول وهو ترتيبه التاســـــــع
في الود والوفاء والعاطفة والطيب والإخلاص=عسى الأيام ترجع مثل ما كانت في المشقاص
تمنيته يجي واليوم غاية ما تمنيتـــــــــــــــــه = بسرعة فائقة من بيتنا يرحل إلى بيتـــــه
بطيارة يبت من فوقنا وإلا يبت في بـــــــــاص=عسى الأيام ترجع مثل ما كانت في المشقاص
طباعي تختلف في كل شي عن كامل ا طباعه = أنا القرب اشتريته كن هو يا للأسف باعه
وباع العام في لمح البصر جُمله وباع الخاص=عسى الأيام ترجع مثل ما كانت في المشقاص
حسبت انه بجنبي با يوقّف في الوسع والضيق = حسبت انه إذا حل الظماء بي بايبل الريـق
ولكنه رمى سهمه بقلبي رمية القنــــــــاص=عسى الأيام ترجع مثل ما كانت في المشقاص
تعبت ادعي على عسكري لكن مايسمعونـي=وبالإمداد في ساحة حروبـي مـا يمدونـي
نزف دمي و سباباتهم ما لمست الامقــــاص=عسى الأيام ترجع مثل ما كانت في المشقاص
متى ربي يعجل بالفرج ويقرّب أيامـــــــــــــه = متى با عيش بعد الذل هذا رافع الهامــــة
متى با يصبح الداني بعيني في ثواني قـــاص=عسى الأيام ترجع مثل ما كانت في المشقاص

المشقاص :
منطقة معروفة مشهورة بالتراث والرقصات والعادات الشعبية الأصيلة تقع شرق مدينة الشحر بحضرموت.

مع تحيات أخوكم / عبد الله الجعيدي