سقيفة الشبامي - قصيده للشاعر حسن سعيد بن سويدان مرسله للشاعر والفنان سالم محفوظ باسنبل

هذي قصيده مرسله للشاعر سالم محفوظ باسنبل
ارجوا ان تنال اعجاب الجميع
وانشالله نشوف رد الاخ سالم عن قريب

يالله يامن لك التصريف والقدره=ضاقت علينا ولاغيرك لها حلال
بذكر النبي كل مومن ينشرح صدره=صلوا علئ المصطفئ وصحبته والال
قال الفتئ بو عمر قدطالت السفره=الله يعين المسافر ع السفر لاطال
لكن باصبر زجا بامكن العصره=وبانحط الشقر عالشال والدسمال
بالله ياذي مقرر عالسفر بكره=لاارض جده تجمل خذ معك مرسال
مرسال من عند شاعر قد طفح بحره=بحر الهويه وحملنا حمول اثقال
لاعند شاعر محنك يصنع الفكره=بو فضل سال وقدم له عسل من صال
واهده سلامي وهذا موجز النشره =رموزنا واضحه عنده بلا فصال
قولوا لابوا فضل قلبي قد نفذ صبره=والحال ضيق ويامعسره ضيق الحال
العين تبكي ومن كثر البكا حمره=والكير في الجوف شف قد له سنه شعال
والقلب من بعدهم لاصي كما الجمره=والدمع مثل المطر فوق الوجن سيال
وتالي الدمع دم قطره قفا قطره=الدم كله تكتل والعروق اوصال
واسباب هذا التعب هو غصن في شجره=ضيعت عمري وانا له عالقدم رحال
ضحيت لجله عبرنا في طرق وعره=لكن خساره علينا تحطمت الامال
وضاع مني خساره خذتني الكبره=وكلام جا من لسان الساعي الدلال
رجعت عظ اصبعي من القهر والحسره=سهران ليلي وغيري مستريح البال
ماباه يابس وهو مغمور بالخضره=لاما لفيته لقا تحته نسم وضلال
لاني هلالي وصون الود والعشره=مازال ذكره معي في خاطري مازال
هت لي خبار الذي هو قد فنا عمره=في العشق واليوم عديته من العقال
الشهر لازاد عمره بان في الغدره=والمعدن الزين تظهر لمعته لادال
ياليت يرجع زمان الغشم والصغره=ويعود زين القبل بالخال والخلخال
في حجال وادي عمر ياليت لك نظره =من بعد ذاك المطر والسيل لي قد سال
نخل القزه من زمن ماشي كما تمره=هذه السنه قد زحي به يضربوا الامثال
ومال في صوح له شانه وله شهره =ماشي مثيله وكل حبه كما مكيال
وذري البطانه يهيض ينفض الهبره=يابخت من هو نشاري فيه او موال
والعفو ياسامعين لاجات شي قصره =هذا كلام الهواجس ريا وخيال
بذكر النبي كل مؤمن ينشرح صدره=صلوا علئ المصطفئ وصحبته والال
ماشي مكاسب اذا قد ضاع راس المال

بسم الله الرحمن الرحيم

اتقدم بالشكر الجزيل للاخ / ربيع بن سويدان
لنقله قصيدة الشاعر / حسن بن سويدان (بو عمر)
الموجهه لي شخصياَ
والتي لم أطلع عليها إلا يوم أمس برساله وصلتني على جوالي من أحد الأصدقاء
نرجوا المعذره من الشاعر بن سويدان عن تأخير الرد في الحال
وإليكم ردي المتواضع
نرجوا أن ينال إعجاب الجميع

مع التحيه / سالم محفوظ باسنبل

ابدي بمن هو نصر موسى على السحره=يارب سالك إلهي تصلح الأحوال
صلوا على المصطفى لي جاهد الكفره=قام الشريعة بحد الصارم القتال
أنا من المنــتدى مرة علي فتره=لمان شفت الرسالة أمس عالجوال
قد كنت مشغول بالحمراء معي سمره=عاشاطئ البحر لحمر مع رجال لأعمال
قالوا دخل للسقيفة در وخذ نظره=في قسم عذب القوافي باتشوف أقوال
شف بو عمر ولد بن ماضي عطه جبره=شاعر موجه قصيدة لك وشكوى حال
بيتت سهران دير العقل والفكره=لما فتحت المشفّر وأتضح الإرسال
وإحفظت رقمه ولا بحكي لحد سره=لا يفرح الخصم والشاني مع العذال
وعرفت مقصد حسن وبان لي أمره=وحلان ودخل بنفسه في حسر وجبال
يمشي على نهج سالم ولد باصره=في العشق والشعر تتضارب به الامثال
وقعّت باليد له وبصمت بالعشره=شاعر يصوغ القوافي يحكم الاقوال
ولعاد بافهّمك وأنته معك خبره=لما متى وأنت باتبقى على ذا الحال
ما باك تدحق برجلك في طرق وعره=من قبل ما تعرف المخرج من المدخال
يقول سالم تناويش الهوى خطره=الله يعينك على حمل الهوى لا مال
حداد أم الهجر قالوا خذت عمره=والمفلحي من هوى الهجرين عقله مال
وين السماء مبعده من الارض والزهره=بينك وما بينها آلاف من الاميال
الله يجازي الذي كانوا حجر عثره=ما بين الإثنين قطعوا الخط والإرسال
وبغيت لأهل السبب من أرضنا نقره=لي شغلهم ينقلون القيل هو والقال
حليت جار الجعيدي من بني مره=لي يقهرون العدو لو كان شاجع فال
وذكرت مال البطانه مال خذ شهره=له صيت يتناقلوه أجيال بعد أجيال
والنخل لي فيه خيله يملي الخُبره=وصعب ينتال للغشمان والجُهّال
سيب الطمع يا حسن يكفي من البطره=وخل خِلك معك في الحل والترحال
أصل المحبه لواحد لا تحب عشره=والآخرين أرمهم في سلة الإهمال
من حب جم با يبات الليل في همره=لأن المحبه تعب وأهوالها أهوال
إعزم لمكه وخذ لك ذي السنه عمره=بسمع كلامك وبتجاوب معك في الحال
والختم صلوا على من جاهد الكفره=قام الشريعه بحد الصارم القتال