ما همني قول الشواني والحسد=في الشعر لي اسمي ولي سمعه وشان
ليمن وليسر يعرفوني والريد=والديس والبقرين تعرفني كمان
والدان والمدروف في يدي سند=وعضيد اهل الهوك لي فيها بيان
كم من عضيده بالزوامل بتشهد=لا هاك هائكها وقال الوعد حان
ما هم قلتها ولا كثر العد د=لو عرضها والطول بلغ العيلمان
نقصد بها في سعف كل شاعر قصد=ونكيل ما في الراس من ذلق اللسان
حاضر بحاضر قل لكل منهو نشد=في الصف لول ما عرف شي صف ثان
لاني على القافي معي سطوه ويد=لاهو الحديد الميس رديته لبان
طوعه للموقف وما جد واستجد=ساعه لبان القيه واخرى هندوان
ذا الباب لول انما الثاني بجد=يومين لي زعلان والخاطر ملان
ما هو من اصحاب المشقه والنكد=مشتق من اهل الدار واصحاب المكان
لي خيبو ظني وباعو بالعمد=حق الشهاده بيع بالصمت المدان
كم شقبي لي هو توارى يا حمد=خلف الستاره في نهار الامتحان
من بعدها تاكدت ان ما حد لحد= يوم احتكاك الصفر لي كل امر بان
صيحت في صيحت مطلعلي بيد=لي كنت شوفه قدوتي في كل شان
يوم التقا الجمعان خلاني وند=وذلاقها تا خذ وتعطي في المتان
وكم غيره كان عندي معتمد=وكنت حا سبله من الماطر كنان
فرع بنفسه يوم راعدها رعد=واترك عمر من بعد ما لحق له امان
ما با عذر حد منهم الا الاسد=لي ما سمحله الوقت وغدره الزمان
مغصوب تركني وعن عيني بعد=لكنني نسمع زئيره حيث كان
عبره كسبنا منها بعض الفيد=ماشي خساره بي ولابك يا فلان
بس بان لي ملقي لها غرضه وشد=ويحط حمله سنح حملك باتزان
با ينفعك في الضيق لا قالو اشتد=في ساعة الشده وزحزاح الوثان
اما الذي توارى وفي داره قعد=في حسبتك عده كما ايوب خان