سقيفة الشبامي - الدخول الى سيئون بـ 3 شلنق

طبعا كلنا لنا فى صغرنا وصبانا هفوات وبراءة الاطفال . وكل عمل نقوم به بطبيعة الحال لايحسب علينا الا شقاوة اطفال لاننا فى زمان لاندرك عملنا خطاء كان ام صواب , ولاننا ذو رغبة لتحقيق الشى ايا كان وحتى لو صدرت لنا كلمة عتب من ابائنا الى ان الهدف يبقى قائما حتى تحقيق الامنية . ولاننا صغارا لم تكن لنا الامانى المنشودة حاليا فكل منا يحلم على قد عقله ولم يكن طموحنا اكبر من ان نجد شيئا فى النظر الحال تافه جدا .

اترككم مع موقف لاينسى ..

صاحوا فى ارجاء البلاد بكره رحله لسئيون كل الطلاب لازم يجيبوا كل واحد 3 شلنق ويروح يسجل اسمه عند الاستاذ اذا كان بايشترك فى الرحلة .. من منا لايحلم ان يشوف سيئون .. يشوف الكهرباء .. يشوف الرصعه ..
سيئون لها طابع خاص بالنسبة لاحلامنا كاطفال .

اهم شى نبغاء نشوفه قصر السلطان حسب الوصف يقولون كبييييييييييييير كبيييير والكهرباء والسيارات التاكسى .. المهم انا واخوى لازم نروح يعنى لازم نروح مع الرحله مع ان الاهل يرفضون سفرنا الى خارج البلد والمبيات هناك ليلة سوى كان مع المدرسة او حتى مع اللى يقع .

بداء التسجيل واستاجرت المدرسة سياره ( باشعيب ) زيزو وواقفه فى السوق ونشوف اصحابنا كل واحد معه بطانيته وسارح يسجل ويركب .

دخلنا عند الشيبه نتسحب وسلمنا عليه وقلنا له نبغاء نروح الرحله .. افتك فينا .. رحله ؟ در ندرت عيونكم . هي قموا من هنا . باتروحون لمان سيئون ؟ هى قوموا لكم قيامه .. ونزلنا نتراكض . وجلسنا فى زاويه فى البرنده نتشاور ونتفاهم ونحوك حيله حتى نحصل ولو على اقل قدر من المال من الوالد بغض النظر رضى او لايرضى .. هذى رحله ماتتسيب . وسيئون ..

ايش نسوى .. ايش نسوى .. ايش نسوى .. الرحلة طبعا تبداء بعد صلاة العصر .

ايوه .. لقيناها .. لانام الشيبه بانروح وبانفتح الكمر حقه وبانشل مصاريف الرحلة .. اخوى قال : تمام والله والله انك ذكى ياخوى .. ايوه بانشل العدى كلها . انا عادنا فى خير قلت له لا يامغروم لازم نخلى كمه شلنق فى وسله مسكين خاف مامعه شى حق التمباك . قال صح صح صح والله ابوى مسكين خاف ماشى معه تمباك .

انتظرنا وتغدى الشيبه . ومز له بورى . وانسدح . ....... خليناه لمان يروح فيها تمام .. دخلنا نتسحب على طرف صابعنا والكمر حقه معلق فوق الشميز فوق راسه ..انا طويل شوى . وبدأت بتنفيذ العملية واخوى فى برج المراقبه عند الباب يراقب وشوى شوى شوى شوى نفتح الكمر وهو معلق ونسحب السحاب شوى شوى .... ااااااااااه ..

انا سحبت السحاب وشوى الا والشلنقيات الفكة حوالى 18 شلنق فى كمر الشيبه تتساقط واحد واحد على راسه . تحنحن .. قام الشيبه مفجوع يفتكر ان السماء تمطر فلوس .

نحن الخلاء بنا الجيد لى شل كراعه . ثوبك فى فمك والرجال لى تشرد ..ومعاد ندري بحالته .. والرحلة باقى عليها ساعات وتنطلق .. عمى مدير المدرسه شافنا جالسين . قال ما سجلتوا قلنا له لا . قال مارحتوا لبوكم قلتوا له قلنا له رحنا ووافق وقال شلوا من عمكم فلوس لمان يصرف .. قال خلاص .

عمى جزاه الله خير دفع واعطى كل واحد منا مصروف خاص .. قال لى اخوى حرام عليك ياويلك تكذب على عمى ولا رجعنا ياويلك من ابوى ..قلت له بعدين يحلها الحلال . قم ركب . وركبنا بعد ما جبينا لنا بطانيه من عند قريب لنا .

وتحركنا لسيئون وانا ماسك الدمبك وجالس على الخشبة حق الزيزوا والسيارة ملانه ومغانى واناشيد والعلم فوق السيارة والمشرف يقول لا قربتوا على سيئون كلكم بصوت واحد .

بني الحماة والوطنى ++ من منكم يحبها مثلى انا مثلى انا
نحبها من روحنا +++ ونفتديها بالعزيز الاكرمي
من روحنا ودمنا ومجدنا وعزنا
صونوا حماها وافتدو من يحتمى . ودافعوا عنها تعش وتسلمي
ياحضرموت اننا ابناؤك الغر الكرام .

هذه كانت انشودة الدخول الى سيئون . المهم رحلة كانت موفقة وشفنا القصر والكهرباء . .. ياسلاااااااااام

لكن الحال تغير فى المرجاع ( العوده ) مش عارفين نواجه الوالد باى شى .. لانطول عليكم .. وصلنا البلد ودخلنا السوق ونحن بصوت واحد كلنا الطلبة فى السيارة .. بلادى .. بلادى .. فداك دمي .. وهبت حياتى فداء فاسلمى .

مرينا والعالم تتفكر وتصفق لنا الا والشيبه مسكين واقف وواضع يدينه من خلفه ويتفرج .. حزرنا .. ابتسمت فى وجهه وقلت له .. ابوى .. ايوى .. ا هه هه هه .. جبت لك بسكوت ابو ولد وحلاوه باطاسه ..

ماعليكم الشيبه تعجبه هالحاجات حتى حبة نع نع تسكته .. الله يرحمه رحمة الابرار ..
تحياتى ..