الأخوه الأدباء والأديبات كتاب سقيفة التجمع الأدبي ..
إليكم أخوتي هذهِ القصيده بين أيديكم فلاتحرموها العدل والتجريح وخاصه النقد الهادف ..
والوقوف على كافة أبوابها من عمنا الأستاذ جمال العطاس .. وخالنا الأستاذ حسن البار ..
وكل الأخوه الكِرام..
فكلنا آذان صاغيه لكم ولما تقدموه لنا من نصح وإرشاد ..
وإليكم النص عسى أن يفوز منكم بالقبول..
{{ عـالـوادي الـمـعــمُــور سَــلِّــمْ إذا مـــرّيتْ }}
عمري في الغربه وأيامي بِلا معنى = من هو رزين العقل في منفاه يتهنى
رغم إنني مستور لكن ماقِد تهنيت = عالوادي المعمور سَلِّم إذا مريت
ياعابر القارات لاموطني عبِرنا = وشلني لربوع دوعن لا تعودنا
بلغ تحياتي وأشواقي إذا عديت= عالوادي المعمور سلم إذا مريت
يالوادي المعمور طيفك مايفارقنا = داخل صميم القلب متربع وله مبنى
لبيك ياموطني لو أشرت أو ناديت= عالوادي المعمور سلم إذا مريت
ياماضناني الشوق واخبارك تطمنا = تحيي أمل في قلب دقاته تذكرنا
زهرة شبابي في مطارح كم لها حنيت = عالوادي المعمور سلم إذا مريت
آمال وأماني أكررها وأتمنى= أحل في الوادي ولي قصرين في الغناء
واحد لأحبابي وواحد لي إذا ضليت= عالوادي المعمور سلم إذا مريت
ياطائر الأشجان غرِّد واحكم المغنى = واشرح لهم أبيات منظومه مع المعنى
وادعي لهم بالخير كلما زرت أو حجيت= عالوادي المعمور سلم إذا مريت
ياما أسرني الشوق للوادي وهيضنا = وخيال طيف الأهل والجيران يتبعنا
واخوان لي في ديرتي من بُعْدُهُم قاسيت= عالوادي المعمور سلم إذا مريت
تم إغتيالك ياوطن وتهدم المبنى = ماسك عصاء الترحال للترحال أتعنى
ولا يعاني إبن ماجد مثلما عانيت= عالوادي المعمور سلم إذا مريت
يافلذة الأكباد لتسيروا كما سِرنا= أبائنا واجدادنا عاشوا كما عِشنا
في الهند ومصّوَع وجاكرتا وفي لكويت= عالوادي المعمور سلم إذا مريت
لاحد يفكر منكم بأنا تمتعنا = بحياه في الغربه ومنها قط ماجبنا
غير البدانِهْ ! والسّمَنْ! وكرسترول الزيت= عالوادي المعمور سلم إذا مريت
ماصار في الماضي لأنا ماتضامنا = ولا على قلب واحد في الوطن سِرنا
بُعدوا من الواقع وماحسوا ونا حسيت= عالوادي المعمور سلم إذا مريت
يابلكرم سالك بِأسمك لاتعذبنا= في الوادي المعمور بالخيرات متعنا
إجمع مُحبيني وبُث نورك على كل بيت= عالوادي المعمور سلم إذا مريت
ومن العجب يابحر أمواجك تلاطمنا = إسمح لنا نزخر بساعينا ومركبنا
هلل وكَبِر في قرين البار لو رَسّيت = عالوادي المعمور سلم إذا مريت
أخوكم ومُحِبكم ..
حامد البار..
*********