ياغبن قلبي
ياغبن قلبي على حرة رخصتوهـا = وتناتفوها عيال ابليس والشيطان
في كف نجسة الى الدلال شلتوهـا = حرَج عليها بعالي الصوت في الميدان
لابـارك الله فيكـم حين عفتوهـا = ذي أمكم حد يعاف الام يا خيبان
زفيتـوا الشافعية قل دفرتوهــا = في عرس غفلة رميتوها لإبن علوان
ماخذتوا الشور منها بل غدرتوها = والعقد ناقص غلبه الشك والبطلان
حروش ذهبها وأنتم ما حميتوهـا = ملبوسها العار والتهميش والخذلان
لا تدعـون إنها وحـده أقمتـوها = ذي أي وحده تبيع الأرض والإنسان
ذلا لأغراض شخصية علنتـوهـا = وحدة مصالح توصلكم إلى الدكان
ضيعتوا النفـط و الثروة سرقتوها = و الشعب مقيود بين الفقر والحرمان
رشوة وباطل وسرقة لو جمعتوها = سياسة الغاب والأقوى له السلطان
قلنا لكم من زمن غلطه غلطوهـا = ما حد سمعنا و رديتوني الغلطان
سطرتها في قصايد ما قريتوهـا = لحنتها في أغاني ضاعت الألحان
لعبة كبيرة إستهوتكم لعبتـوهــا = ولا حسبتوا عواقبها مع الحنشان
والله ماهي غشامة بل نويتوهــا = و بنفس شينة تمنيتوا لها الخسران
في ليل مظلم بلا شفقه نحرتوهـا = قطعتوا أمتانها أوصال للوزان
حية وترمز في الحفرة زقلتوهـا = و هي تصيح طويتوها في الأكفان
غيبتوا الرأس والكرعان جبتوهـا = لا روح الرأس وش حاجتي بالكرعان
ياليتها مثل ما كانت تركتوهــا = شطرين كل شطر يتحرك على كردان
بعد المعزة في الطلبة طلقتوهــا = تشحث رمقها وهيبتها من الجيران
ذا وين كانت كما ما أنتم عهدتوها = مرفوعة الرأس ما تنكس ولا تهتان
يا أهل المكلا شرارة لو علقتوهـا = با رودها با يلعلع من جبل شمسان
يافع وشبوه قبائل لو نخيتوهــا = فيها مراجل تكافي دحنة الطوفان
وضلوع دهما في الضالع غرستوها = با تطحن الأرض لا قد قتَم الدخان
أبين وشقراء لها صوله عرفتوها = فيها كراشيم تتسلى بشيخ الجان
رايات بيضاء في المهرة طويتوها = فيها المعاذير للمشقاص و السيطان
جارت عليها الليالي ما رحمتوهـا = دركاه دركاه شونا خاطري مليان
كبدي كما الحنظلة يا من شويتوهـا = قفلت ووصلت معي لا درجة الغليان
اليوم يوم المراجل لا عدمتوهـا = مشتاق مشتاق للبارود يا ردفان
وين العهود القديمة لي قطعتوهـا = وين الذي عاشرفها حلفوا الأيمان
يا ليتكم مثل ما أعطتكم عطيتوهـا = يا ليت جازيتوا الإحسان بالإحسان
ياليتكم حين ما لدغت رقيتوهــا = من لدغة إلهام لي هي تنخر العظمان
يسري البلاء في بدنها ما سعفتوها = و الجوع فيها يغالب حسنها الفتان
يا من على محمل الفطره عشقتوها = ما كنها أمكم ساعة قضيتوا شأن
إن عاد في الدم شي نخوه ورثتوها = طلقوا رسنها وباترحم على الشيبان