ابديت بك . يا واسع السلطان . يارب الجلال = يامالك الملكوت . يا علاّم باسرار القلوب
طالبك تغفر زلتي . يامن عليك الاتكال = وتشل من راسي فكر .. وهموم في صدري تجوب
ياريس الدوله . تسمّع يوم بن حيدور قال = ابيات من راس التميمي .. باتفك كل العصوب
مسؤول عند الله يوم الحشر . مافيها جدال = ما ينفعك كرسي الرياسه . هو والاطقم . والجيوب
المال والسلطه . وكل لي تحت يدك . للزوال = ولعاد يبقى عند ربك . غير حسنات . وذنوب
المتقي .. يشرب في الجنه , كرع صافي زلال = والمفتري .. له نار حمرا .. منها عظمه يذوب
اختر طريقك . وين تبغى لك .. بعد موتك حلال ؟ = حسب العمل . ربك يجازي . والنوايا فـ القلوب
با يسألك رب السما . مرسي شناطيب الجبال = عن شعب . حط فيك الامل .. وألقاك عا روس الغلوب
با يسألك . ليه الوظايف . والترف . لاهل الشمال ؟ = والفقر . والحاجه . وقصر اليد . في شعب الجنوب ؟
الكلمه العليا لهم .. لو طال فـ الدعوه مطال = شلّو لراضي . والمباني قسموها . طوب طوب
ليه الطغي . والتفرقه . والعنصريه . لا تزال ؟ = وليه حد ماله نصيب .. وحد معه بقره حلوب ؟
ليه اليمن كله .. قنابل قابله للاشتعال ؟ = ليه الفساد . اصبح قدر مقضي . ولامنه هروب ؟
ليه القبايل تحت حكمك . في صراع وفي قتال ؟ = ليه السلاح المنتشر .. مثل الورق لي في العلوب .؟
ليه الريال الوحدوي .. ماحد يعدّه راس مال = رغم النعم . والخير . والثروات . لي من كل صوب
بترولنا .. له تسع تعشر عام .. مثل السيل سال = والبحر يزخر بالسمك .. غير المزارع . والحبوب
الخير واجد .. والزمن يعبر .. ولا شفنا ريال = الا قليـــــل .. من الكثير اللي تنذّيه الهبوب
ليه المواطن مغترب .. عند الدول . في خس حال .؟ = شعبك مشتت ياعلي .. ماهو كما كل الشعوب
والللللله مابايغترب .. لو جبت له لقمه حلال = يستر بها حاله .. وسط ارضه . ويصبر عالعيوب
ليه البطاله .. والرشاوي .. عندنا . مضرب مثال .؟ = والامن ضايع .. والفسد حاطوك من كل الدروب
مافيــك شــك .. انت الذي دايم تدور . للكمال = لكن حولك شرذمة .. من ذنبها مابا تتوب
شله خبيثه .. ينهبون الشعب . ماخلو مجال = تصبح جبوحك خاليه يابوحمد .. من غير نوب
يابو حمد .. هت لك بطانه . من نزيهين الخصال = خل السرق لي قصدهم .. مـلي المخابي . والجيوب
نحنا مع الوحــــده .. ونفديها بالانفس .. والموال = نحنا معك . لو كنت فعلاِ . باتعالج كل صوب
باقولها من خاطري . لاااا .. والف لا .. للانفصال = لا لأنقسام الصف .. لا .. لا . للمصايب والخطوب
خلااااص . راااحت . وانقضت ,, فترة خبيثين العمال = ذي لبّسو شعب الجنوب . الذل . في سبعين ثوب
شلّو موال الناس .. واعطوها مقاطيع الحبال = واستعبدو الانسان .. واسقوه المراره .. كوب كوب
غااابو . وغابت شمسهم . يالله عساها . للـزوال = بـلاّ الشموس الشارقه . ماباش يا شمس . الغروب
خلاص كل مافات مات .. ورااااح زام .. الانحلال = ولعاد حاجه .. للمشاكل .. والدعاوي . والحروب
ما بيتغيّر دلهم .. قوم التشتت .. والضلال = طال الزمن ولا قصر .. ماهم ,, حشا مابا يروب
يابوحمد .. سر بين شعبك . بالسـوآ . والاعتدال = لا تعطي الفرصه . لقوم النهــب .. واصحاب الكذوب
يابوحمد صلّح بلادك .. فعــل ,, ماهو بالقـوال = تاااابع .و راااقب .. وانتبه . لما تصفّي كل شوب
والللله . ثم والله . محاسب عـالخفيفه . والثقال = سبحـاااانه الخــلاّق ,, رب الناس .. علاّم الغيوب
ان كان شي وحــده .. تقرّب ياعلي .. بين االرجال = ولا جــلس . واقطف من الشامي .. وخل غيرك ينوب
صلّح بلادك ياعلي .. مازلت قابض بالعقــال = من قبل ما ترطس بك الحــرّه .. ويتعبك الركوب
ماقلتها الا من محبــه .. لـك بقلبي .. لا تزال = ولـــشعب .. ياريس علي .. يطلبك بالجهد الدؤوب
والختم صـلّو .. عالنبي بعداد حبات الرمال = الهاشمي خير البشر .. لي وحّد اطياف الشعوب
عساه يشفع لي من النيران .. في يوم الهــوال = لاقد دعا ربــك عبيده .. واقبلو من كل صوب
.
اللهم صلي وسلم على سيدنا محمد وعل آله وصحبه وسلم
وسلامتكم