الطين خامر يالمقاول
يالله بحسن الخاتمه والنصر منك والظفر=ياواسع المدات جودك يالكريم المستعان
بامرك وتقديرك مسار الغيث ونزول المطر=انت ألأله الواحد المعبود لك هيبه وشأن
وألفِ صلاة الله على الهادي محمد الف كر=وأله واصحابه جميعاً خيرت الناس الزيان
الهند مزروره وباكستان في زره وحر=والشاذري وسط المداره شل بصوت الغيبعان
أيش الذي خلاك يابوشذر تعلن بالخبر=ليه ماتشاور بومسامح ولد فلانه بن فلان
شاع الخبر في الناس يابوشذر والراس انشطر=عجله ولاشي من قفاء العجله سوى زلت لسان
نا قلت لك ريّض ولكن لي بجوفك ماصبر=معذور مالومك ابد جوفك من الباطل ملان
الهامله مرضت وماتت عمر في الدنيا قصر=ماتت وهي قيمه بطعنات السيوف الهندوان
لي كان يذبح في التيوس المشحمه لحيه انكسر=واليوم شفه الا شبيه الهيج ماله شي مكان
وقعت حلاقة غصب بالفوران وبذلق المحر=ماهي حلاقة موس عالموضه كما هذا الزمان
من يوم مانطرحت قدم عاشور في بندر عمر=ضاعت مفاتيح الخزينه والوسل لي في الثبان
وظهرت علامات المجاعه والتذمر والخطر=وأشياء عديده منها شوك السنم والسيسبان
والفقر لي ماله مداوي غير ربك لا ستر=يستر على عباده برحمه واسعه تروي الضمان
ينزل علينا الغيث للنشره ولضعاف البشر=ويفرّج الاحوال بعد الضيق ويحط الأمان
ياما تفاءلنا وولعنا مصابيح السمر=وياما تبخرنا بعود المسك وانقاص اللبان
وياما نسينا وضعنا السابق وكل ماهو عبر=لكن تفاجأنا بأشياء صابت الناس الجنان
ميمي كما ويوه وقرن الثور ينطح في البقر=وعبود بن هادي يلخبط في الوثيقه والبيان
طالت بنا المده وطعم الحلو في البلعوم قر=ولي قسّم التركه ميه قسمي وهو قسمه ثمان
يامدرستنا الجامعه لما متى نرسم صور=بغينا العلوم النافعه والفوز بعد الامتحان
وان كانه الأ رسم وبرسملك صفر وألا حمر=سقله في الهداه بايرسم صور كوفي عنان
الطين خامر يالمقاول قم وسبّر بالسّتر=واحنا علينا المحض والطرقه على الناس السمان
لي خلو الجذنه بضربه قاضيه خمسه طيّر=من دار بن عيمور ضربوا عالمراكز واللجان
والختم صلو عد ماتسري الكواكب والقمر=وعداد ماقمري ترنم عالغصون الخيزران