[الواثق بالله]

اخواني في سقيفة الشبامي اليكم هذا البدع والجواب بيني وبين الحبيب على بن طالب
عبر الجوال هذا اليوم الاربعاء 16-5-1432هجريه
بدع الواثق بالله
ذافصل كل واحد على مبداه=ماحد يخرب شوكة الميزان
والنوب ذي داهل على مجناه-لايوخذ اليسره ولا ليمان
جواب على بن طالب
طعم البغيه زين يامحلاه=قولوا لسالم هت دواء لبدان
دايم تكرسع عامد المرباه=عالصيد ذي يشرب على المعيان
الواثق بالله
الهاشمي بايجيب من ناداه=من زام جده مكرم الضيفان
واحنا وصلنا له بلا تعناه=نبغى كرامه تروي العطشان
علي بن طالب
ماشي عليكم زود لا والله=وانتم ضماري ياقبل نعمان
باتعم رحمه من عدن لاساه=لاحن راعدها مسى رشان
الواثق بالله
قامه ومد السيل في مجراه=عسى السلامه من عظيم الشان
تسلم ويسلم نخل عالمعداه=وذي في القطعه وفي البستان
علي بن طالب
الله يحفظ من دعاء ناجاه=وانسان عاصي ايش من انسان
يقبل ويقرع باب يترجاه=وهو يضلي سعف للشيطان
علي بن طالب
الوعل ماديف وقد صبناه=بالقرن ناشب عاينوا اثمان
خايف يقع جعثت بني مغراه=تنشب عيالك قل لبن علوان
الواثق بالله
الضرب في الخوره وعالمحلاه=ماشي وقع له ضرب عالاعيان
خايف يفرع بعد ياعيباه=ويخلي الشجعان والرميان
علي بن طالب
وقع بلنتي امس في مرماه=شفنا الحكم صفر وهو زعلان
وظهير ليمن مجتمع وياه= ظن المدرب جاه من لبنان
الواثق بالله
الشوط لول شفه قد مشاه=والضرب على القده وعالعمدان
داهل يراوغ كل من قد جاه=وبالقدم يلعب وبالسيقان
علي بن طالب
الكرت لحمر مابعد شفناه=علي محسن ماسك الاركان
لابد من طرده وكف اداه=وشل كاسه دون ما اثمان
عالغدرقلي بالذي رباه=حرباء تلون كلها الوان