احبتي الاكارم اتمنى ان تنال هذه الابيات المتواضعة استحسانكم ..
ما كان قصدي
-------------
ما كان قصدي أجرح القلب وأدّميه=واجري غزير الدمع من عينك انهار
قصدي بكفي لمّ شتاته وأداويــــــه =وأعيد فيه الروح بعد الذي صار
وازرع شرائيني ونبضاتها فيـــه = وأموت واترك فيه لي ألف تذكار
وارسم على الثغر ابتسامة تناجيه = وافرش من الخفاق لك ورد وأزهار
واكتب حروف اسمك على الورد واسقيه=من طرف دمعاته على الخد مدرار
والحزن من كل القواميس بلغيه =لجلك وبطمس مفرداته بالاحبار
قلبك من الاحزان مافيه يكفيه =يامن فؤادي فيه لك والحشاء دار
بالروح مثلك يا منى روحي افديـــه = وافدي تراب أرضاً عليها القدم سار
والعمر لك حاضره فدوى وماضيه=والأرض لك والشمس فدوى والأقمار
مثلك حرام الهم والشوق يغزيه =والدمع له تبقى المعالم والآثار
لا تنشغل بأول زمانك وتاليه =فكر بيوماً فيه الإحزان تنهـــــــار
اطلب وأنا لك كل مطلوب ألبّيه =والله ما قدم لطلباتك أعذار
ما به احد اهواه في الكون وأغليه =مثلك ولا به من على سمعته غار
لو قدموا لي أعظم الناس مابيه =عندي أنا تسوى من الناس مليار
وان خيروني بين مرّك وحاليه =غيرك أنا والله لا يمكن اختار
شعر / عبدالله مبارك الجعيدي
الأثنين 2011/10/24م