ياعظيم المقدره
رب ياسامع دعانا ياعظيم المقدره=فك علينا يامُهيمن كلنا تحتك عبيد
من فعايل بن عميره ما استقرت بربره=أيش يبغاء بن عميره ياجماعه وأيش يريد
أن يباء الا الصلح بالقوه وسيف العنتره=مايقع شي صلح بالقوه وباطراف الحديد
وأن يريد الصلح بالحكمه ولُب المخيره=يمتثل للعقل والحكمه وللرأي السديد
وأن يباء حبل السره تبقى عصوبه مزرزره=يانكاله من علي محسن وسالم بايزيد
خيروه ألفين مره قربوا له المبخره=ردوا أيام السنه وشهورها جمعه وعيد
لكن المقرود مايهوى سوى الا الفشخره=فشخره عا قِل بصيره عمرابوها ماتفيد
هكذا تالي زمن فيه الامور مشفره=قدر الله بانصابر والمصابر مستفيد
ياغبوني عازمن عدى اموره ميسره=ياغبوني عازمان النخل والتمر النضيد
فصل والثاني فسحنا فيك يا بن هرهره=ما استفدنا من خطابك شي خلاف الا الوقيد
مابناء غير الكوارث والمحن والكسوره=مابناء غير المعلم والمقاول بن فريد
باعوا الموزع وساسه باللعب والمسخره=والمكاسب قدموها للمقدم والعقيد
وانت يالشعب الابي تشبه بعير المعصره=بالفدامه طول عمرك والسلاسل والحديد
انت لي تبني وتزرع قمح واصناف الذره=وانت لي تسهر وتشرح عالقريبه والبعيد
والسماسر في عماير فاخره ومنوره=شغلهم ياتي مكمل عبر صندوق البريد