[حنطبه]

رقم 66.

(ما كل مرة تسلم الجرة ).
في نهاية حكمه يبدو كأنه يتحشرج ويحتضر ببؤسه ,ثم يبدأ يفشي اسراره وإذا تناسى كان كمن يمحي حوادث عمره ,وهو المعروف بالذي بدًد في الهباء والسدى ,بعدما كان ولازال يتجبر ويتكبر وفي كل الحالات يكذب ويزيف الحقائق ,وفي نفس الوقت يعاني من كبريائه , فهل نقبله يكمل مشواره أم نقول له (ماكل مرة تسلم الجرة ).

الأولة عبرت وأما الثانية = سقطت قناعاتك وزيفك والغرور
تكذب على أمة عظيمة راقية = وتعاملك مكشوف بشهادات زور
واليوم أوتارك رهيفة بالية = والكبرياء لازال في نفسك يدور
ولكل متكبر نهاية قاضية = على الحقيقة مايظل مبنى وسور
قال صالح أحمد باسد المشجري :=
لا نثت العيدان عاد السارية=يابو عمر لك باتقل سبعة قصور
اعمل باصلك والعمد عالتالية=مثلك غلب ماشي يجي منه قصور
مبناك من فوق الدقام العاليه=حوفه لك الشاهد علي مر العصور
ويش لك بذي ماله كفف متساويه=لبنة عربها خالفو عربان صور
كان ردي عليه :=
حيا بذي هرجه جواهر غالية = ولها ثمن عندي وعن كل الحضور
جاب القوافي في جمل متتالية = والقصد واضح ماختفئ بين السطور
وسلام مني ع الرجال الوافية = ذي هي في الشدة على الظالم تثور
بالعقل والحكمة تصد الطاغية = وتمر بقوة حيث ممنوع المرور .
قال عمر سعيد العكبري :=
لاطاب كل قيّر تقر الحاليه = ماشئ يقع قيّر ولاحالي سبور
حال الزمن هذا ودنيا دانيه =حد عاش في راحه وحد قلبه يفور
مادام عاد العتم فوق الساقيه=يشرب صليب المال منه والنفور
لاتشل هم الأوّله والثانيه=والوعد ذي بيني وبينك وعد نور
ردي على عمر :=
حيا وسهلا بالقوافي الضافية = من عند شاعر في مواقفنا جسور
للعمق ينزل ماهتم بالطافية = العكبري في حلها لازم يحور
بالحاضرة يهتم وينسى الماضية = ويدخل البهجة نفسنا والسرور
الأوله والثانية والجايه = في اعتقادي كلهم لمة زقور
قال صالح أحمد باسد المشجري =
الجبر باقي والنوايا صافيه=
والحل والترحال عادات الصقور=
واليوم ماتخفى عليكم خافيه=
لا لي في المعدي ولا لي في حنور=
ذلا تقلاب الزمن بالعافية=
خلا كنينة في حسابات الحجور=
من بعد ماكانت ردوني ضافيه=
لا ضرك هميته ولا عشرة حسور=
ردي على صالح المشجري :=
ذلا جروحي من شغبهم دامية = وصداع في راسي وفي جسمي فتور
ضاقت بنا والغدر من كل ناحية = يالمشجري لاتقول لي وقت السحور
هت لي كلامك والعلوم الكافية = منك تجي والعيف من قولك يغور
لكنها شفها علينا واليه = دخلت وجلست حاسبه القهوة تفور .
قال عمر العكبري :=
تصلح لكم ياهل الشروع الوافيه= ذي شوركم جبتوه لاياخير شور
يابوعمرخمسه عتوم الجابيه= تسقي الحجل من صعد لمان الحدور
وطبينها واحد ويده واليه=لاماصلت راحته برخش بالظفور
ومعه عساكر من عيال الباديه= باروتهم من لمسة البندق يثور
ردي على عمر :=
البدو مارفضوا كلام الداعية = والحضر عمدوا في مطارحهم حدور
حسبوا كما أول عليهم حاميه = بجيوش قائدها على الغلطة صبور
أما الحجل تسرح عليه الجارية =ولالها من مالهم غير العشور
راحت عليهم ياعمر في داهية = لاعمروا جربهم ولاصانوا الذبور
قال صالج المشجري :=
جزول وماجاها من البادهية=
عاعثمها تصبر ومافيها كسور=
مالهم سوها مالهم شي نهايه=
ولا عرص ماهي فلل عاراس قور=
لاقلت كلمة للرجال الراهية=
ماخابت اضنوني علي حسب الشعور=
يابو عمر شليت حرف الناهية=
ردي على صالح المشجري :=
حرت وبردت والعقول الزاكية = سرحت ولابقيت لنا غير القشور
وإن عاد حد منها القلوب القاسية = حق ولك لامسكت بالشخص الوقور
قولوا لصالح شف طرقنا خاليه = حتى القبب ماحد في القبة يزور
والقوم في أرضي نفسهم غاوية = للشرح ع المزمار وطبول الحجور .