[حد من الوادي]

فهم يافهيم !

الجمعة 9 يناير 2015

هنا حضرموت



لي بغيتـه راح ثـم

يـوم شافـك مستلـب روّح بعيـد

بعد ماحطّ النقط فوق الحروف

قال مالي سيب في اللي بايصير!

ربنا وحده بأسراره عليم

وانته فهم يافهيم!!

ـــــــــــــــ×××ـــــــــــــــ

أيش من عاقل قسم

قسمة العاجزعصدبوهاعصيد!

شل منك ثوروعطاك الخروف

مـارحـم فينـا صغـيـَّـرأوكبـيـر!!

ضيّع المعروف والعهد القديم

وانته فهم يافهيم!!

ـــــــــــــــ×××ـــــــــــــــ

هكذا دنيـا (الـنـدم)

حد لبس بالي وحد لبسه جديد!

والذي فيها ولف ضرب(الدفوف)

مارحم (مسكين) مايقـدريسيـر!!

ضاع فيها صاحب القلب الرحيم

وانته فهم يافهيم!!

ـــــــــــــــ××××ـــــــــــــ

ويـن ماخطّ القلم؟!

قولها لك.. هـات منك نستفيـد!

أصبح(الجلاّس)في لحظه وقوف!

والذي هوماسمع قول (الشويـر)

صارحمله فوق ظهره(جيم)(ميم)

وانته فهم يافهيم

ــــــــــــــ×××ــــــــــــــــ

انتهـى قـولي وتـم

شل هـرجي خبـِّره إللي تريـد!

عادشي ملفوف لك فوق(الرفوف)؟

اعرض(المبنى)على عاقل خبير

والأمل مقـرون بالـمـولى الكريـم

وانته فهم يافهيم!!

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـ

*نشرت هذه القصيدة في صحيفة (شبام) في الرابع من يونيو

2008 ميلادية العدد رقم (465)

وقد تفاعل معنا حينها الصديق الشاعر(علي عمرالصيعري)

قائلاً :

سين مايحتاج جيم

ــــــــــــــــــــــــــــــــــــــــــــــــــ ــــــــــ

لي بغيته..إفتهم

ياحسين القول أكّد ماتريد

والمخبى بان في طيِّ الحروف

والقصيده (نون) صلوا ع البشير

خذ جوابي..كيه فسِّريالحكيم

(سين مايحتاج جيم)

ــــــــــــــــــ×××ـــــــــــــــــ

الطوالع(خص)و(تم)

مالمخرحها ومدخلها قليد

شفت شي زاهرمعلق بالعكوف

غـيـرذا الـفانـوس لابطّـن يـنـيـر

قل لنا مالفرق؟..وافهم يافهيم

(سين مايحتاج جيم)

ـــــــــــــــــ×××ــــــــــــــــــ

ذيب يرعى في الغنم*

قالها(بوالحرز)من سالف بعيد

بعد ماكانواكوادرفي الصفوف

إلادواهي..أيش قولك يالخبيـر؟!

شي فرق بين الذيب وعيال الرجيم

(سين مايحتاج جيم)

ــــــــــــــــــ×××ـــــــــــــــــ

أيش من ظالم رحم؟!

قولهـا لك..هـات منـك مايفيـد

من تربى ع الشتاتي والصروف

ويـن بايرحـم صغيّـرأوكبيـر!!

والدّفن قل لي متى يرحم رحيم؟!

(سين مايحتاج جيم)

ـــــــــــــــــ×××ــــــــــــــــــ

ذي إشاره من (سقم)

من جهة(دوعن)تعيد العيد عيد

لاصلبها(الخنبشي)بايزم يوم الوقوف

وياحسين الصبرعانصح الشوير

شي مدت قصبه تطاول ع الشريم؟

(سين مايحتاج جيم)

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــــــــــــــــــــــــــــــــــــــــــ

علي عمرالصيعري

*المكلا الفاتح من جماد الآخره 1429هجرية

الموافق الخامس من يونيو2008 ميلادية…