برقت وراعدها رعدْ = خصمت على كل الريَدْ
ذلحت وذالحها خبال = بيض شناطيب الجبال
جادت ولا خلت شِعِيب = (( يانجم ليتك ما تغيبْ ))
برق السعادة لاتقد = جاب البشارة بالولد
نشمي وجاهز للنزال = يكرم و لا له رأسمال
مبعد ونا شوفه قريب = (( يانجم ليتك ما تغيبْ ))
بدوي يقد القلب قد = جازم و لا يفكِر بحد
شرّع على أطراف الحبال = دسمال محقوط الذبال !
خلاه عا يسحب سحيب = (( يانجم ليتك ما تغيبْ ))
العشق ما يعرف بلد = لاناد رأسي ياحمد
بعزم و با شد الرحال = جمال واعرف للجمال
ماشي على مثلي صعيب = (( يانجم ليتك ما تغيبْ ))
لي ركبوا الموج الزبد = سرحوا و لا حد شاف حد
هبت على البحر الشمال = و الموج غلبت عالرجال
من صاح ما حصل مجيب = (( يانجم ليتك ما تغيبْ ))
و الخيل لي فيها المدد = ضاعت و قالوا بالعمد
شردوا بها انصاف الليال = و علموها الامتثال
في قيدها تنحب نحيب = (( يانجم ليتك ما تغيبْ ))
من بعد مالباب انقلد = دار الرحى بين السدد
قالوا سلامتهم محال = ياعزة الله والجلال
كل من لجا له ما يخيب = (( يانجم ليتك ما تغيبْ ))
قالها الشاعر/ سالم بن احمد بن عمر بن عبدالله باذيب الشبامي
10/07/2002م
----
اعدها م . ع . باذن الشاعر