[عفاف]

اقتباس : المشاركة الأصلية كتبت بواسطة عمر الحبشي

خنبق و ذكاؤه ياحزبحزيلكم منذي مرَةْ عرست على رجال عقب حبلت و ولدت جابت وليد سمته خنبق عقب مات ابوه و بعدما مات ابوه هو كبر و طلع شقي ماحد كماه ابدا و لاحد يقدر فيه يمرس للخلق لمان شله السلطان وحبسه عقب جات امه تبكي عند السلطان و صورت به (( تفضل فكه شفني و حدي ما معي الا هو و با إدبه عقب قال السلطان للخدم هدوه هدوه عقب فكوه و خنبق ذا معروف بشقاوته . بعدما فكوه من الحبس من كثر الحمق لي فيه قام اشترى له حمار كل يوم يفكه يخليه يعصد الدنيا عصيد و يطارد السقل و يقضم المزارع و يطير بالحاجات حق الخلق في السوق لمان اشتكوا الخلق عند السلطان عقب السلطان قال للخدم حقه ذا الحين الساعة هاتوا لي خنبق و الحمار حقه ، الحمار با نرصنه و خنبق باندفنه و هو حي و قاموا الخدم جابوا خنبق و رصنوا الحمار . و عقب راحوا و قالوا لأمه خنبق خلاص باندفنه و هو حي تعالي تودعي منه قالت لهم عادكم خلوه يومين عندي بتودع منه و عقب شلوه الا وجاء اليوم لي بيدفنونه فيه . قال لهم خنبق: الحفره خلوها تو عند الضيقة حق امي يومها عجوز و كل يوم بتخرج باتزورنا كذها قريبة علي . عقب بحثوا الحفره عشية و قالوا له : غذوه الصبح توا باندفنك جهز نفسك توا بعد الفجر . من كثر شقاوتة سرى بالليل و الخلق نيام حفر خلص من القبر حقه لمان الدار حق امه و جاء الصبح و نبوا على الخلق و جاؤا بيشوفون و طرحوا الطين علية و دفنوه. عادهم الا دفنوه تو دخل من الخلص لمان الدار و عقب وصى امه للسوق تجيب له تفاح و عنب و تين .... و فواكه جمينه و عقب ولا لبس الثياب بيض و رادي خضر و راح يقرقع على باب السلطان و معه الحاجات لي اشتراها فتحوا له الخدم و قال لهم قولوا السلطان خنبق يتخبر عليك عند الباب . قال لهم السلطان خنبق كذ مات و لا بيرجع قالوا له الخدم نعم هو بنفسه . قال لهم وين السلطان . قال له : شفنا جيت من الجنة و شف امك و ابوك ييسلمون عليك و شف ذا منهم و يا بوي !! لا شفت الجنة بتغرم كلها بقعه خضراء و زينة و فيها و فيها ... و يكذب عليه. و عقب السلطان قال له انا لو بتدفنوننا رضيت ؟ قال له خنبق : نعم ! تو يوم ندفنك يومك الا حي بيطرحونك في الجنة و السلطان وقع اهبل قال للخدم حقه : حفرو لي حفرة كما حق خنبق . و حفروا له حفرة كما حق خنيق و دفنوه فيها و قعدوا اسبوع و اسبوعين بغوا السلطان يطلع ما طلع راحوا يتخبرون خنبق ، قال لهم : انتم مغاريم إن حد دخل في حفرة عاده بيخرج منها و حاكاهم قصة الحفرة حقه . بعد كم ايام تضبحوا الخدم على خنبق و اشّاوروا على انهم بيزقلونبه في البحر طرحوه في جونيه و قيدوه وسطها و عصبوا الجونيه و وقعوه في الليل عند البحر و قالوا له : الفجر بنزقلبك في البحر و في الليل بعد ما روحوا من عنده جاء بدوي معه البعير حقه الا و يحصل خنبق يصيح في الجونيه ياعيال الحلال ياعيبرين الطريق شوا عيال حرام عصبونا في الجونيه فكونا عقب رثاه البدوي و قام فكه يقوم خنبق يمسك البدوي و يعصبه في الجونيه ! كذا البدوي يصيح الا و جاؤا الخدم الفجر على انهم بيزقلوا بخنبق سمعوا الصياح قالوا له تكذب علينا تم محلك . و جمعوا الخلق و زقلوبه في البحر خلاهم اسبوعين و هو مضموم في الدار الا و يخرج الفجر من الدار لمان سوق خارج بلاده و اشترى اللول و المرجان و........ و رجع لبلاده و يسير في السوق ياخلق اللول و المرجان تعالوا اشتروا و كل من حد شافه قال ذا الحين من انت - عرفوه الخلق - قال لهم انا خنبق ، تخبّروه كيه يوم طلعت غير زقلوبك في البحر ! قال لهم : نعم زقلوا بي في البحر لكنا شوفونا اه لي حصلته في البحر؟ قالوا له :ذا الحين كله ذا من البحر، وإنقطعت .

قصة تعلم الشطانه ,,,, ياخس خنبق الله يعين امه عليه بايقع ياذيها .
اخي عمر الحبشي يؤسفني ان القراء على صفحاتك لايقارنوا بعد الردود ,,,, عندي قصه لحريم يدخلن
ولكنهن مايشاركن ويقلن عيب كيف اكتب لرجال !! لكن الكثير هنا رجال وكلنا يحب تاريخه وماضيه
ليه مايردون وهذا اقل شي للتشجيع ولكن المطلوب منهم هو اضافات .
منتدى غريب ,,, لك مني خالص الاحترام والتقدير واني متابعة وحريصة بس مادريت انك حطيت حزيه يديده
الا اليوم مدري يمكن ساهيه .