الحقيقه والطموح
الهجس طامح والحليله طامحه=ايبروزون اسمي على راس النظير
يارياض كل ماجات فرصه سانحه=بايطرحوني حيث مانا نستخير
هم مصدر الهامي بما نا شارحه=من فخري ابشعري ومعناه الغزير
وان حد مناطح مستعد باناطحه=مهما طول بايعود من عندي قصير
مادام روضة الحليل الجامحه=انا الملك واقرب منا فس لي امير
نا شاعر البارح وقبل البارحه=واليوم والليله وبكره يامدير
شاعر ولي في الشعر بصمه واضحه=غطت في الشارع على بصمة جرير
سلطتي عالقافي كدوله مانحه=تعطي ولا تاخذ ضريبه من فقير
كل مفرداتي حضرميه ناصحه=افخر بها بين الصغير والكبير
تتمتع اقوالي بذوق ورائحه=ذوق العسل والرائحه مسك وعبير
وابيات شعري كالثمار الناجحه=لي منها العصار يستخرج عصير
شادو بها اهل العقول الراجحه=لي يستقو المعنى من السان الخبير
لي اسم في الزامل براس اللائحه=والدان قدني فيه لي رتبة مشير
قولي تردده الجموع الكادحه=من ريدة الدين لغيل الباوزير
في حضرموت المجد خيلي رابحه=داخل ميادين السبق اسمي شهير
الشارده والضاويه والسارحه =ماسمح لها من حيث ما سا رت تسير
لجل المواطن من خطى ما سامحه=ضد الخطاء موقفي وعتابي كثير
الظلم بانواعه بشعري كافحه=واوقف مع المظلوم لاجا مستجير
مهما دفع مسؤول مانا مادحه=ما دام هو فاسد و معدوم الضمير
لان الفساد اثرخسائر فاذحه=في وضعنا تاثيرها واضح خطير
وان حد مكذب رتبو له فاتحه=مادام يتظاهر لكم بانه ضرير
خلوه عاراسه تنوح النائحه=وينقضي عمره وهو في عين بير
هذا سبب فخري وتحتك طارحه=يامن بيدك فيه تقرير المصير