عفوا اخواني كتبت المشاركة عند مشاهدتي للفصل وحز في نفسي ان الغيها بعد مشاهدتي لباقي المشاركات اذ تكررت بعض القوافي . وارجو ان تقبلوها بما فيها من عيوب . تحياتي
أبديت بك يا فرد يا منان = يامن بكل الأسرار تعلم
يا للي خلقت الإنس هم والجان = وأخلقت للمسقوم بلسم
في هذه الصفحة مع الأخوان = يا الهاجس الليلة تكلم
وانثر حبوب اللول والمرجان= واطلع ذهب من كل منجم
شفت السفينه في غبب سيلان = مالت ومُقدمها تحطم
واللوم با حطه على الربان = لي بالخلل ما كان مهتم
يا أهل الزوامل شعركم للآن = طعمه صبح فالفم علقم
من بعد غيبة جيتكم زعلان = والحزن فوق الراس خيّم
خربتوا الزامل وصوت الدان =بابيات جم تُكتب وتنظم
ياريت بوراضي رفيع الشان = يرجع ويرجع بن مسلم
والقحم يطلع من وسط لكفان =يبناك يالحصن المهدم
باترجع الدنياء على العدان = والهرج با يصبح متمم
الدين له خمسه من الأركان = لو قامها الإنسان يغنم
والشعر لي يبنى على عمدان = بالقافية والوزن يحكم
باينكتب بالتبر في ديوان = الكيف وسطه زاد ع الكم
ابو راضي / المقصود به الشاعر الكبير سالم باتيس رحمة الله عليه وحفيده هو شاعرنا طالب حسن باتيس وهو احد شعراء وادي عمد الكبار وله العديد من القصائد المشهورة .
بن مسلم / هو ايضا احد شعراء وادي عمد الكبار رحمة الله عليه وقبيلة بن مسلم بها العديد من الشعراء المشهورين
القحم / هو القحم العمودي رحمة الله عليه وهو احد شعراء وادي عمد الكبار ومسقط راسة شعبة عمر .