وهذه قصيده غزليه للمرحوم الجد / سالم بن محمد باتيس ابوراضي (الاول )
ارجوا ان تنال اعجابكم
قال المقعنى في الداجي فقد رشده = قاسى شدايد وغيظه بالحمق مكظوم
لاعتم الليل بوراضي يجر قهده = ساعه تقلب على جنبي وساعه قوم
يالله عسا اللطف لي من واسع المده = ضني ومشكاي لك ياحي ياقيوم
ذبتني اشواق من ذي قد فرق خده = وفي جبينه كتاب الفارسي مرسوم
اهيف ترف له شرف مايختلف وعده= والغره الباهي مثل القمر مقسوم
وتقول كفلت شبك لاقد نسع جعده= يغذاه بلمسك والعطر الشذي المشموم
واعيان حور الحدق تقتل بلا هده= كل من نظر لمحت اعيانه ضوى مغروم
والخشم منصوب كأنه سيف في غمده= والعذب بين الثنايا يشفي المسقوم
وكعوب حفّل كما الرمان في وهده= والصدر ميدان للظمّر تجي زمزوم
والبطن طاقه حرير اخضر من الكده=اصلي من العال جاء من مصر وارض الروم
والخصر كأنه لبو يدرج على الجده= وتقول ثعبان ذي هو بل حمه مسموم
والعجز مركب منول لاقدا جده = خاض القلازم وبحر الهند والفيوم
في خنه الخمر يسكر من بلغ عنده=افيون مفنون فيه الطب للمحموم
سيقان فيها الهلب شده قفاء شده = واقدام لاديعوا وداي ضوى مرحوم
ياهركلي يارضي ياخيل في قنده =يافايق الغيد ياخرعوب يامهضوم
سالك بخير الوراء عبدك يصل قصده=عالباب واقف ولا هو في الهوى مليوم
القصد قصده ولا بايختلف وعده = مازال عاد النسم يجري في الحلقوم
انه يباء مال بالعطيه لايده=بعطيه جاوه ومسقط والحبش والروم
وارض الاروبه وباريس الذي سده =واراض مدراس ذي فيها خزين القوم
والصين والشين والبصره مع صعده =والهند والسند هو والشحر ذي محكوم
والفين مهره تربت داخل البصره =والفين بكره عندي في العدد ملزوم
والفين ميزر جرامل ذي لها رده = والفين ميزر جرامل عالمقص محكوك
هذا في المهر والتقدوم بامده= الاف واكرور من جنه الذهب مختوم
وقهوة الخال يوخذ عطفة الجعده= وارض الكثيري ويوخذ صاط باكرشوم
هذه ملاكه وبلقي فوقها بنده= والناس في خدمته راضي وحد محتوم
وانه يباء السيد بوراضي يقع عبده =باسير في الامر من تحت الطلب محكوم
والختم صلوا على من لانبي بعده =صلاه تغشى ضريح الهاشمي المعصوم
والال والصحب والنورين من بعده= وعمر وبوبكر عندي في العدد ملزوم
والرابع الشهم لي سيفه روى حده =واهل المدينه ومن هاجر معه في القوم
مع تحيات ابوراضي الثاني