ورى بو شيخ على خيله بلا معنى عطى شقحه=علنها حرب ما فكر في المطلاع والمندار
يلف ويدور بو فيصل وجنب من طرق سمحه=يقصع في خلى خالي بلا معنى ولا مقتار
طرح لي طرح ماتفسر ولا تحدد لنا طرحه=جبرني دير في راسي مئة فكره من الافكار
ولكن بعد ما تمعنت في درسه وفي شرحه=عرفت القصد والمقصود قبل اغلط وسوق النار
حمد قصده الى ترزح قبل شمسان من رزحه=جبل عيبان بايرقل وباتهتز جبال الكار
ولي في القدر بالملاس بانعرفه حل قدحه=بصل والا طماطم او بطاطس داخله وخيار
على صبر المداره باتقع رشحه قفى رشحه=وبا يقع خذ وهت لان الحبال امزرزره زرزار
انا مانا من اللي يعشقون النوم والسدحه=غسل وجهي سبقها قبل ماتشرق على الاصبار
متى ما شفتها تعكت معد فكر في الفرحه=قلس مسبتي في قصعي وسل القاطع البتار
على كتفي معي بلجيك نذخه يسبق القرحه=ومشوافه على الشعره يقد من حيث مانختار
الى موتت عالمشواف قل للطير حل ذبحه=لاني ماخطي دايم نصيب الطير لي هو فار
كفايه قال بو طارق عمر يكفي من الشبحه=تراني باكوي فوق العلم لا حمر المسمار
ولا باتعرف اللي في الوعا لما يحل نضحه=نصيحه يالعمودي لا تخلط حلوها بالقار
لان الخرف لاقد ثار مهما طال به مضحه=معد باتنفع العربان ياحافظ ويا ستار
نصيحه دون العنوان بالضمات والفتحه=وقلي هو لابن البار او للسيد المحضار
هذه قصيدة عمر الذيب
وهذا ردي على قصيدة الذيب
مايهم العمودي قول حاقد وحاسد = مامعه رجل لي يرزح بها عالقويه
بانرحب بمن جانا وجاء بايواعد = وعدك الا محرم في الطريق العكيه
بين مارب وصافر بايجيك المجاهد = حامل الكنش والبارود والمدفعيه
شفت ابوطارق الليله دخل بايعاند = جابلي حبل ملوي فيه عشرين ليه
قصده الا بغى يوصل لبعض المقاصد = لايعدي طرق وعره طرق ملتويه
خلها الا لنا يالذيب ساعد بساعد = مانهاب الخطر نمشي بهمه قويه
بانخليه يعوي لادخل ذيب حاقد = بانخلي العرب كلين يسمع عويه
جبت غلفود حوله ألف جني و مارد = بانقيد عمر لي مايجي عالبتيه
عندنا السكود يرميها مقدم ورايد = بايرقل جبل شمسان ساعة دويه
من دخل للمعارك وينه اليوم عامد = = يعرفوني وانا القايد وهم لي رعيه
يوم حنت رعود الخرف حادر وصاعد = صاحبك قد تكنن ياعمر بالعشيه
وين لي قال عندي كم عساكر وقايد = وينه اليوم وينه بان وقت السريه
وين ليهو علينا بايكيد المكايد = بحتفل قال ابو فيصل بساعة مجيه
لي دخل يارفيقي مادخل هو محايد = ليه يدخل وهو دايم رجوله حفيه
مامعه جيش يعجب مامعه جيش حاشد = في فنون المعارك مامعه شي دريه
دام دمك يقول الشيخ في الراس راكد = باكوي لك على كل فصل بالجسم كيه
باكوي لك بمسمارك ولي قلت جامد = انت تعلم وغيرك بايحط الاذيه
مامعاكم يقول الشيخ صادر ووارد = مامعاكم سوى خيشه وخبره خليه