هذه القصيده للشاعر صلاح احمد القعيطي اليافعي ويعقبها الرد
من السيد محمد بن هاشم
-------------------------------------------------------------------
ابديت بك وادعوك ياجيد وغيرك مايجود=
ياحي ياقيوم يامطلق من الساق القيود=
أسالك غفرانك اذا بيتت وحدي في اللحود=
قال القعيطي طول ليلي ماتهنيت الرقود=
لا هم في دنيا والا من عشق منسوع الجعود=
شيبه في التسعين متوجه الى دار الخلود=
عسى يقع مسكني في الجنه وعالحوض الورود=
ولا علي قاصر ولا السلطان يطلبنا نقود=
ساكن في الدكن بلد عثمان سلطان الهنود=
سلطان بن سلطان بن سلطان عالعزه يذود=
لكنني تأثرت من خفض الشرف بعد الصعود=
أخبار بلغت ماتسر القلب من ارض النجود=
راحت جهت لحقاف لحمة فاس سرحت بالبرود=
راحت مع الصاحب بلا قيمه ولا عسكر يقود=
وشيدو فيها الكنايس والبراكس للجنود=
أه على لوطان ياغبني على مثوى الجدود=
كم صحت كم ناديت كم بينت به قبل الوجود=
لكن انا معذور واحد عود ما منه وقود=
اين الدول اين أل عبدالله وهمدان الاسود=
واين بن مطلق وين ربعه وين بن سالم عبود=
اين القعيطي اين يافع ذي تطرف في الربود=
ذي يعرضون السيل محري يطلعونه في سنود=
اللي لهم عادات بالجودات من عاد او ثمود=
وين التميمي والمناهيل وين بن عبد الودود=
اين الشنافر اين نهد اللي يزرون الشدود=
اين الجعيدي اين كنده ذي تعزو بن كنود=
والعوبثاني هم وياسيبان شرحان الحدود=
واين باصره وبن صالح محمد بوعمود=
اين الذي قالواحميناها باسرار الجدود=
هم حضروا البيعه وكانوا على البيعه شهود=
وبايعادون المدارس والمساجد والسجود=
والخمر في لسواق باتبسط به افراخ اليهود=
وتبرجن حلوات في لسواق حمرات الخدود=
ياحر جوفي ياحياة الذل ياحر الكبود=
قده احسن المسراح والمسكن يقع بارض الزيود=
ابن الامام العادل المنصف على رغم الحسود=
وجاور الكعبه وزور المصطفى فخر الوجود=
عليه صلى الله دائم عد حنات الرعود=
هذا جواب السيدمحمد بن هاشم
ابديت بك يالله ياجزل العطايا ياودود=
يافاتح الابواب ياوهاب تشملنا بجود=
اغفر خطانا واستر الزله وبلغنا القصود=
والفين صلى الله على الهادي الورى نور الوجود=
ثم قال من بيت يدير الفكر ماجأه الرقود=
جاته قصيده زعلت به مثل منظوم العقود=
من لحمدي شيخ القبيله ذي عمد بارض الهنود=
يهري على يافع وعاهمدان والشيبه عبود=
مشتق من السيل الذي عم التهائم والنجود=
رحمه بها وادي العجل يرقص وينعش بالبرود=
كثرت بها الافراح وارتاحت حسينات الخدود=
ولى العناء زال البلاء والحق قائم عالعمود=
دانت وزانت لرض من نجران لما قبر هود=
أمان ضافي يمسي الراكب بنفسه بالنقود=
من بعد ماكانت مخافه يملي الجور البدود=
الظلم عم والشر جم ولعاد حد يوفي الوعود=
فسدت قبائلها وخانوا واستهانوا بالعهود=
كم من بري يسعى على عياله وفي الدنيا يرود=
يتو عياله وارملوا حرمته وامسى في اللحود=
احوال شنعه منكره غبرى تقشعر بالجلود=
حتى عيالك قد شقوا لبليس حناة الكبود=
هومن نفع والا رقع بل زادوا الفتنه وقود=
والمقبل اعيف باتقع ليام من لهمال سود=
ويش بايقع لو عود في وادي بن راشد صك عود=
من بايرد السيل شي دوله قويه باتذود=
وان شي غضب ما بايخص بل تقع صيحة ثمود=
ما ظن بك ياشيخ يافع ذي البلاده والجمود=
تكره لنا التأمين والانصاف ذي غاض الحسود=
يحيا انجرامس ذي جبال الارض من خوفه تنود=
بالهيبه اصلحها بلا ضوله ولا عسكر يقود=
قيد ذيابتها وبايحكم بتقييد الاسود=
احيا الشريعه وانتصر للحق والشر له يذود=
والكاف بوسقاف ذي جاب الجميله له يسود=
كانب وخاطب وامست الفتنه بسعيه في جمود=
لا تجحدون الفضل لهله حس لوصاف الجحود=
والسيل جارف في اوروبا شفه رابط بالحيود=
وان ما وقع ذا بايقع ذا لا تزاحمن الوفود=
وذي عرفته خير من مولى الحبش له ما يعود=
وماذكرته يارفيقي في حكومة بن سعود =
دعوى اذا هي صدق باترغم بها انف الحسود=
وأسال ثقات ام القرى عنها وذي حلو زرود =
والعدل مايكرهه حد يابوعمر الا اليهود=
واطنبت في عثمان واثنيته وزليت الحدود=
هل شي معه قوه ترد الماء اذا عمد بسنود=
وذكرت في يافع ومدجح هم وهمدان الاسود=
قولك سوي لكن مضى ذي قال في زام الجدود=
وانت رزوم العش ماخلفت سوى دغشة كنود=
قامات زينه كأنها الا تبل في جلد القعود=
ماحد ركض في منتره ربيو على بيع الفرود=
خمسين عام اليوم مرت عالوثيقه والشهود=
هذا جوابك في القوافي ياصلاح احمد شرود=
وان زدت زدنا وان رجعته باتناقش بانعود=
والختم للهادي سلامي في قيامي والقعود=
رد صلاح الاحمدي على السيد =
سبحان بارينا تسبحه الخلائق والرعود=
الله جل الله قاهر الشياطين المرود=
خضعت لعزته الرواسي والسلاطين العضود=
قال الذي بصفح عن المذنب ولا طبعه حقود=
ذا فصل ياحيا وياسهلا عدد مافي الوجود=
بابيات من شاعر محجب صقر في روس الحيود=
بلغت الينا ماعرفنا من محب او من حسود=
يعذل على يافع وهمدان القواسم والعمود=
قم يارسول الخط من حيدر أباد ارض السعود=
ارض الرخا والعدل والراحه وتحصيل النقود=
من خيرهل كلين ملا كيسه ورحلوا للنجود=
وتسلطنوا والقوا حكومة حلم طاري في رقود=
ارخو خطمها حولها اهل الطماعه والوعود=
هذا سخا الدكن وهذا جودها خير جود=
هذا كلام الصدق بايشهد به الخصم اللدود=
هيهات من باينتقد عثمان والا بن سعود=
اللي عمد مكه وقام العدل فيها والحدود=
ياناظم الابيات ذي سيفك موفر في الغمود=
رود شوي عالهجن لا تلغب وتبرك في المقود=
انكرت تنبيهي على همدان والشيبه عيود=
راع المجوره لا تخنق خاف للشاره ردود=
صبت الغرض في البعض واما للبعض جاوزت الحدود=
كله كلامك في القبائل صدق مامنه جحود=
ذلت شجاعتهم ونذقوا بالبنادق والفرود=
وغيرهم وقعوا كماهم في الجهاله والجمود=
بلوى مع دعوى بلا حجه ولا فيها شهود=
ولعاد حاجه خل بقعه مستره يابن حمود=
والعدل ما يشناه عاقل من كذب له مايعود=
وذي ذكرته في عيالي صوب ماجابه كمود=
ذكرت في بعضه ولا صادقك في بعض المدود=
هبت على لحقاف نفله باتيبس كل عود=
والبخص عالتجار والشيبان ذي فيها قعود=
مانا في التسعين عالمعكاز وعيوني صهود=
والضيف ذي جاكم مقايس شي في الخطمه صيود=
ماشي متن واوراك ذلا عظام غبرى في جلود =
كله وطنكم شبر سبحه هامله بين الحيود=
قوت اهلها صفرى وخوريه وقد تمسي هبود=
لا حب في المدفن ولا في الكيس خمسية نقود=
واما الشريعه يارفيقي باتوارى في اللحود=
والشاب بايفلت وبايفلتن حلوات الخدود=
وبايقع تقبيل في الغره وتجميش النهود=
هذا الحدث لكبر وعند البادري فسخ العقود=
ومن حفر حفره لغيره في وسطها بايعود=
وتقول في شعرك وفي نظمك صلاح احمد شرود=
غلطت في قولك جبل سيبان ما هو بالرقود =
والله عالم من طوى فرشه وبكر بالبرود=
مالو معي في الراي قبضه كان شديت العدود=
لكن من الاهمال ساد الثعل وابعدن الاسود=
ومن ترك نشرته همل للخيب امست فيود=
والسيل لي ماله موازع بايطير بالربود=
هيهات قل له كان بالحارث يشبه بالقرود=
ومن العجب ان قلت بن طالب يشابه باربود=
لو عاد بوغالب بقي مابا يذلين الاسود=
يومه اذا قد قال نودي يالشوامخ باتنود=
والكاف بوسقاف بحره ماتبلده البلود=
وان حد بقي له رز داره ماتفارقها الوفود=
من قام في حجه يصيب الامر غصبا بالجهود=
والله عالم بالسراير والضماير والقصود=
ماظنها الا جات حذفة شقف من لندن تقود=
هتلر وموسوليني الجولهم لتحصين الحدود=
والامرنافذ قده ذالا زاد رزحه عالربود=
عاد الامل في الله ياشاعر وصالح في الوجود=
ايظا ولا تنسى علي وبفضله العالم شهود=
ليث المغاره يصلح الهفوات في اليوم العنود=
له ذهن ثاقب يخرج المحرج مع وقت الورود=
هو يا علي منصور في المجراء وفي المعنى سدود=
خو جعفر المعروف بالحكمه يفككها عقود=
وانشد على المحضار حامد قل له المجلس يعود=
بيني وبينه عهد والاجواد تةفي بالعهود=
وان بايعاشينا وله شي مصلحه مانا حسود=
عسى بها تغفر ذنوبي لي انكتبت في الرصود=
والختم صلى الله على الشافع لنا يوم الورود=
صلاه على المختار دائم في ركوعي والسجود=