[خالد بن مهنا]

ياالحبشي والجماعه مايهونون,,جبت لكم حزيه وكتبتها كما يوم جيبها باالوصف والباقي عليكم واذا حد مافهم معنى كلمه ولا شي يوضح وانحن بانحاول نوضح له معناها:

كانوا في ثلاثه زقور قدهم لاباس بهم شباب وابوهم وامهم قدهم الا شيبان مساكين ابوهم معاد يقدر يشتغل وامهم عجوز ياالله انها تلقي لهم عيشه ,,,
المهم قرروا الزقور بايسافرون من شان يترزقون الله
وسافروا وخذو هبّه وشافوا ان ماشي فائده رجعوا كمايوم سافروا والفقر يلوّطهم
ورجعوا للدار حقهم وحصلوا امهم مسكينه قاعده تحت فاي الستره وسلموا عليها
ونشدوها من ابوهم قالت لهم ابوكم توفى ياعيالي الله يرحمه قعدوا يبكون شوي وبعدين مسحوا دموعهم ونشدوا امهم
قالوا لها يمه ابونا ماخلف لنا شي؟؟... قالت لهم اللي خلفه ابوكم شفوه في الفاضله
وطلعوا يتخابون للفاضله,,
حصلوا ...هره...ومشعبه...ومزمار
قالوا وايه نلقي بهذه ياراعه لذا للبو لي ماخلف لنا شي الا ذي الوهيات,, المهم
كل واحد من الثلاثه شل له نصيبه من الاشياء اللي خلفها ابوهم وتوكلوا على الله,,,
جينا عند اللي شل الهره:
سرح للقريه ويدرج فيها وبعدين جلس تحت فاي ستره هونا في القريه
وكان مقابل دار واحد حرمته مهي ريضه ويراقب الحركه وشاف الرجال الصبح يوم ثار جابت له الحرمه كزمه يابسه
وفيجان شاهي ما,, صلاق ..وسرح لشغله..
يوم سرح الا ووصل رجال ثاني وجات وذبحت له ولقت اللحم في التفال ورفعته فوق المغاسج والقت له عصيد
ولقته في التنار ويوم قد رجالها بايضوي طوت صاحبها في السلقه وسندته في الغرفه ..
هذا كله شافه راعي الهره ..
المهم ضوى رجال الحرمه وشاف المسكين ذا جالس قاله ارحب تفضل وقده بغى العذر قاله جيتك...
طلع به الدار وقال لحرمته هتي ان شي معش عيشه عندنا ضيف جابت لهم شي ماحد يقدمه كزمتين يابسه وشاهي من الصبح..
وقد صاحب الهره عارف مصايبها ,,
قبص الهره ماانتبه له الرجال صاحب الدار ورجع وقبصها
بعدين قاله ايه باالهره حقك تناوي قاله هذه هره غريبه عجيبه تعرف اشياء ماحد يعرفها ولا حد يفطنها الا انا
قاله وايه تقول ...قال شفها تقول لحم فوق المغاسج..قام الرجال حصل اللحم وبعد ماكلوا اللحم..
قبصها وناوت قاله ايه تقول هرتك ...قاله شفها تقول ان العصيد في التنار ندر يخب وحصل العصيد وجوله ولهمدوه
وبعد فتره قبصه قبصه زينه..وناوت بصوت يفلق الراس قال ايه تقول هرتك.. قاله ماذلحين ماباقول لك,,
قال الا والله ان تقول لي قاله معها امر خطيييييييير قال قلي به
قاله باقول لك لكن بشرط رح هت اثنين صمل ,, راح وجاب الصمل .. قاله شفها تقول رجال مطوي في السلقه ومسند
ميلوا السلقه وعمدوا الرجال باالصمل وكلن يرشخ فيه لمان قده معكون,,ههه
المهم صاحب الهره قال انا ذلحين باروح في حال سبيلي قاله وين ماتروح انا بغيت الهره هذي منك قاله ماباتفطنها
قاله علمني انته كيه تقول يوم تفطن كلامها قاله بس شفها غاليه وحدد له مبلغ خيالي بعدّي ذاك الوقت
وراح مسكين وتديّنها المهم اشتراها منه وقاله انك بغيت باتفطن كلامها محظ عليها في التنار10ايام وبعدين تعال وندرها وبتفطنها ايه تقول لك...
الرجال شل عدي الهره وذاك بعد عشر ايام نقض المحظ حصلها ميته,,,
والهره اللي خلفها له ابوه جابت له رزق... ومنت داري وين رزقك ياابن آدم....
باقي صاحب المشعبه
والمزمار
صاحب المشعبه:
سرح للقريه يدور ويزمل ويقول يامردد العوجان يامردد العوجان
وذه حرمه رجالها دوب يقول لها ياالعوجاء لا جاء قال لها اصه ياالعوجاء
دعت على صاحب المشعبه قالت له تعال ياوجه الخير انا رجالي يقول لي ياالعوجاء وبغيتك ترد عواجي
قال لها ابشري لكن بشرط رحي وحطي الاقليد حق الخزانه اللي فيها امواكم تحت الفرش عند الباب
وتعالي وانا بارد عواجش راحت حطت الاقليد عند باب الخزانه كما يوم قال لها
وجات لاعنده وعصبها في المشعبه والخلاء به راح وفتح الخزانه وشل الاموال حقهم وطش...
المشعبه ضوت له رزق..ولنت عارف ياابن آدم رزقك في ايش...

صاحب المزمار:

سمع اثنين في القريه بنت وولد بغوا بايتزوجون لكن اهلهم مهم راضيين
المهم قال الولد للبنت بانهرب وبنعمد غار الفلاني ماحد بايجي علينا فيه(( حتى ابليس بمزماره))
يوم سمع الكلمه هيذه شل نفسه لاعند اقرب عجوز يسأل عن الغار
اول عجوز ماحكت له قصف رقبتها والثانيه قالها باتتكلمين ولا اقصف رقبتش قالت ماني عارفها
قصف رقبتها ...والثالثه سالها وحكت له باالغار والولد والبنت تواصوا ان كل واحد يسرق اهله ويشل من المال حقهم الذهب وماادرك ماالذهب واشياء كثير شلّوها معهم ..
وصاحبنا قدم قدامهم وعمد الغار يوم جو البنت والولد وفسخوا ملابسهم يبغون يرتاحون,,,
المهم,,البنت نزلت عليها كلمه قالت والله يافلان من صدق ذا غار ماحد بيجي علينا فيه حتى ابليس بمزماره
يوم سمعها قالت هوكذا نفخ في المزمار غرموا والخلاء بهم شريد خلوا الاموال
وندروا من الغار وصاحب المزمار شل اموالهم ورجع وهو محمل ..ولنت عارف ياابن آدم رزقك في ايش...


اخيكم /بن مهناء