(
مشتاق جم للوالده )
بدينا بالذي خلا لنا ام القرى قبله=وضع فيها الحرم لامن كريم الوجه والمتعال
جعل مكه وطيبه وأرض وسط القدس مشتمله=على اقدس ماخلق والحكم له والطوع والاجلال
وصلوا مالنبي طه ورسل الله من قبله=اتوا بالحق خالد عامدى لحقاب والآجال
وآله هم وصحبه قاتلوا الكفار والجهله=عمود الدين قد قاموه واصل للسماء مازال
مطارح لي ذكرناها تهب روحي كما النفله=قديها ريتناألا دوب في سفره وفي ترحال
وهت يا الهجس ماعندك يحن محفوظ لا أهله=مسى هو والحليله ياعرب في معمعه وسجال
نعم مشتاق جم للوالده ياالله عسى قتله=تقع لي لو نسيتش ياشبام العز والأفضال
شبام الفقري المسكين والتاجر قفا رطله=مدينه صدرها واسع حضن بدوي معا دلال
تسر قلبك مبانيها طويله شامخه عدله=وفي سرحاتها تأمن من النّصاب والنشّال
أفضلها على البحرين أو عمّان أو زحله=عجوبه في نظر عين المحب يضرب بها الأمثال
بنوها بالعَسَر لجداد ما وقعت لهم سهله=شويّه تبل خلط الطين وأعواد النبق لِطوال
ونوره من حجر وسط الميافي تحترق شعله=يقع بويه حَسَن من ماركة شيبه وعال العال
من البيئه موادك يا البناء ماشي جرى نقله=من الخارج من أرض الصين والاّ من دول لِشمال
وموزع لي عصمها لا يسول العِرم جت غفله=وفيها دور حاضنها وحاميها من الأسبال
بعون الله وألطافه مسّقي الذبر والنخله=نجت من كل مصيبه وأفرعت من هزة الزلزال
وهي في عين بوجمعان عذراء مايظن كهله=ولو اِِن الصفيراء آلاف من لِسنين عا المسيال
وقد كانت ولازالت كنان الطفل والطفله=حنونه مرضعه نذرت لبنها الحلو للأطفال
ومن عاداتها الزينه قدوم الغُرب ما تمله=يلاقي الضيف في الدمنه حَسَن ترحيب واستقبال
وفيها ماسك الفذ ماخطا حده ولا زله=أمين المال لي موثوق بأسرار البلد والحال
لكل شي عنده التبيان لو حتى طرف فتله=لأنه مؤتمن يحفظ حقوق الوقف والأبذال
وميزان العداله بالربيعه ورثُه نسلِه=عموده والكفف ثنتين والمصرى معا المكيال
ومن شعّارها منساه لا عمّار أو جحله=ولا صالح ربيّع لي تعلاّ كنّه الا هلال
وصفها بالقصايد جاب فيها أبيات جم جزله=تغزّل في هواها واِنأسَر في غُنجها وِدلال
وقصة جرب هيصم حكمها ياوحلة الوحله=صعيبه في معانيها تحيّر معشر العقال
فتاهم شعر بوعامر وحل اللغز عا مهله=كفاهم من أذى الفتنه وشر الماكر الحيّال
وفك الرمز والتشفير لي ما يعترف حله=بلب العقل والحكمه قفَل عا الهام وسط اِشوال
سبكها أبيات شعريه سلاستها كما الدجله=توضح بأن بن هيصم نذرها مقبره وحلال
لكل من عصبوا أكفانه وهو عا الدين والمله=لزوماً ينقطع رزقه من المكسب وراس المال
وختّمها بذكر المصطفى روحي فداء لجله=مع أولادي معا مالي اذا ساءوا له الأنذال
عسى يشفع لبوجمعان كل سيه وكل زله=نقع جيران له في الخلد مع بوبكر هو وبلال
ملحوظه ( مشتاق جم للوالده ) شـــــــــبــــام
الشاعر( عمٌار بايعشوت) من شعار مدينة شبام والشاعر جحله جدي ( امبارك سالم باصويطين )
وصالح ربيّع بالسود معروف لدى الجميع ( بوربيّع)رحمة الله عليهم جميعاً