على وجه الصبر شفها تجاعيدي تناديلك = حضورك منكسر والورد مات بمسكة يديني
ذبح ذاك اللقا بُعدك وكذبك في تعاليلك = وانا شمعي قضى بعضه على بعضه وسط عيني
تركّد يالخفوق الحرّ وجنّبني سهر ليلك = كرهت الليل والقمرا وشوق ٍ في شراييني
وانا لوكنت انا مخطي .. ترى نقطة وسط سيلك = أغيضك واقهرك وارجع واضمّك بيني وبيني
حبيبي والهوى مظلم وفرحي في قناديلك = سحابي مثقله غيثه ولكن وينك وويني
باغضّ الطرف ماكنّي رأيت الفجر يبكي لك = ولا .. كنّ الشفق عيّا يفارق بسمة سنيني
حبيبي لا تبكيني وتهديني مناديلك = عيوني سوّ ما ودك واحذر لا تبكّيني
على وجه الصبر شفها تجاعيدي تغنيّ لك= نبت من لهفتي لشوفك زهور براحة يديني
هذه القصيده نقلا عن منتدى عزوف الخليج - للشاعره نهى التركي ، آمل أن تحوز على إعجابكم