[abo ahmed]

بخيته شافت اللوز المقشر = ومبخوت المسن رايه مطّشر
وشافو ثعل في المطراق كشّر= وقامو صدقو كذّاب بشّر
عطاهم من جرابه اكل وسنوت
طمع فيهم بغو بسكت ومنقه = بغوا من راس هام او راس عنقه
بخيته ماكره كسحه وشنقه = ومبخوت الغبي له الف حنقه
بغو يستبدلون التمر بالتوت
والا كانهم في راس وادي = ولا حد جنبهم قاسي معادي
يلبسون المقاطع والروادي = وناديهم يلق ياخير نادي
وماهم ينشرب من ثـبـر وقلوت
وجاهم في زمن ثعلب مع الذيب = وعذبهم بدون اسباب تعذيب
وغربهم بارض الله تغريب = ولا فرقّ مع الشبان والشيب
وخلاهم بلا احساس وسكوت
وحط برقابهم اسروت وحبال = وحملهم بضيق الحال احمال
و لا خلا لهم لا حال او مال = بغو سيل المقد والسيل ما سال
تلافوا العلب لحقو العلب محتوت
وربطهم مع المكار تربيط = ولحقو نفسهم مع بعض مخليط
بلا تفكير او رؤية وتخطيط = يدقو راسهم في الحيط والحيط
يوكلهم سلت مع خبز وشفوت
ومبخوت السبب والا بخيته = بخيته ان مشت مبخوت حيته
تعنى بين شاهيه وزيته = ولاهو منتبه با يموت فيته
وهل هو باعها والبيع مثبوت
وهل عاشي بصر ياهل المعاني = بخيته بت فرج مما تعاني
وذا مبخوت شف له ظهر حاني =بغوها المخرجه من ظلم جاني
يعدي الوقت ياغوثاه ويفوت
ووين المخرجه ياهل البصائر = بخيته حايره مبخوت حاير
وما بين الدواير والمتاجر = صبحو ملطشه من كل باير
فريسه كوّروا في باطن الحوت
abo ahmed