من صميم القلب حبيت واحد = حب ماشي له حدود
يشهدون الناس والله شاهد = والكواكب به شهود
=والمدامع والخدود
=تشهد أن الحب فيما بيننا ماله حدود
على ألوفا عاهدت خلي وعاهد = والتزمنا بالعهود
ما خلف لي وعد لو يوم واعد = ملتزم لي بالوعود
=باللقاء دائم يجود
=ما يخون العهد عاهدني و أوفاء بالعهود
نجمنا من تحت لا فوق صاعد = والمحبة في صعود
ود واستلطاف و إخلاص زايد = من طلب شي جاه زود
=مثلنا من في الوجود
= ما هبط مقياسنا في الحب دائم في صعود
بطلبك يأمن لك الطير ساجد = والخلائق لك سجود
حبنا تحفظه من كل حاسد = قاتل الله الحسود
=ما بغينا له وجود
=بيننا يا من دعوتك في ركوعي والسجود
مشكور . كلمة على ولد البطاطي قليلـــة= والمدح في مثل بو يحيى كثيرة قليـل
شيخ المشايخ إذا حطت على أرضه مخيلة= شمراخ من نخل حيضانه بخبرة وخيـــل
دائم جماله تنود بالحمول الثقيلـــة= ما هو من اليوم من صغره يشل الثقيــل
فيه الوفاء والشهامة والخصال النبيلــة= نبيل دائم عمر يحيى وجده نبيــــل
واعي وطيب ومتواضع ومخلص لجيله= وأعمال ما تنتسي له جيل من بعد جيـل
يكرم ضيوفه ولا فرط عمر في دخيلـة= وأهله يموتون لجل الملتجي والدخيــل
والضيف من فوق خيله قد روح زنجبيله= ما يوم قدم لحد قهوة بلا زنجبيـل
ما ينطفي دوب في مجلسه مرشون ميله= وان قد خرب ميل حط حيثه ثلاثين ميل
ليله في النور بن يحيى يشابه مقيلة= ما حد يغطي بمنخل شمس ظهر المقيــل
سلبته بلجيك ما يوم استلب بافتيلـة= من عند صانعه مفتولة مسيله فتيـل
يسمع قروحه من الهجرين مولا المسيلة= وأمسى يحوّل بسيل ارض القزة لي يسيـل
ياكم وكم معتقل في السجن يخلي سبيلـــة= ويميّل الشوك لي مرمي بخط السبيـل
ياكم وكم شخص يشفي باهتمامه غليلـه= ويطيب في وسط قلبه جرح ينزف غليل
ياكم وكم شخص عاجز ما تشلة رجيلـة= وقّف بجنبه وفي لحظه مشى ع الرجيل
ياكم وكم شخص من صغره عظامه شليلة= عطفه يخليه ينسى انه بن آدم شليـل
مافية حجة على النشمي عمر مستحيلة= الصعب يسهل ويسهل عنده المستحيـل
دائم عطاياه لأصحابه ولأهله جزيلـة= سخّره بالجود لي فضله علينا جزيــل
في صمت يعمل لخير الناس شيخ القبيلة= وحده ولا قال ع الموفر عطوني قبيـل
شعب اليمن ما بضني بايحصل بديلـة= والجالية ما بغت غير البطاطي بديل
قصّر مسافات كانت ع الجعيدي طويلة= ماخاب ظن من عرف مخلوق شرعة طويل
جنبي وقوفه طرحني تحت شجرة ظليلة= من بعد ما كنت دور غصن واحد ظليـــل
خسران لي ماعرف رمزالشرف والفضيلة= الفضل له لي كما رمضان شهره فضيل
في ساعة الضيق كل واحد قبض في دليله= وأنا دليلي عمر يحيى ونعم الدليـــــل
يا وعل حامل ميه فوق القرون الجليلة= جم ناس شافوا وانا قد شفت قرنك جليل
يحفظك ربي من اصحاب النفوس الرذيلة= ويجنّبك درب ما يسلكه غير الرذيـل
يأمن تخفف معاناة القلوب العليلـة= والدمع تمسحة وتعالج بن آدم عليــل
يا حصن شامخ في الهجرين ماشي مثيله= والغلب لي فيك والروشان ماله مثيـل
في العصر هذا وفي كل العصور الدويلة= حصن البطاطي جديده مرتبط بالدويـل
والختم صلوا عدد طش المطر في المخيلة=و إعداد حب الثمر لي في طرف كل خيل
على الذي ليلة المعراج كلّم خليلــــــه =المصطفى الصادق المرسل لنا والخليـــــل
أهلاً هلا باللي حضر = ذا نورك أو نور القمر
=ملاك في صورة بشر
=رقّه وخف دم ودلال
ما شافت أعيوني مثيل = في الناس مثلك يا جميل
=أنساك ذا شي مستحيل
=ما ينتسى هذا الجمال
جرحي بدونك ما يطيب = يا أول وآخر حبيب
=أنت الدواء وأنت الطبيب
=وأنته مرادي والمنال
يا صاحبي كل من رئاك = مثلي يقول انته ملاك
=والكل يتمنا لقاك
=في حلم وإلا في خيال
ما للفرح عندي حدود = بالوصل لي لما تجود
=وكآن ما حدٍ في الوجود
=مثلي تهنا بالوصال
ربي لدعوتي استجاب = رجّعك لي بعد الغياب
=وارتحت من كثر العذاب
=ياشمس عمري والظلال
وحشني صوتك الدافي = وبسمة ثغرك الوهاج
ومنظر بحرك الصافي = ونسمة عانقت الأمواج
ولمسة تنعش أطرافي = وحشني صوتك الدافي
وصالك أول أهدافي = أذا ماشي عليك إحراج
ترى ما حل بي كافي = من الآلام و الإزعــاج
علامك يا المحب جافي = وحشني صوتك الدافي
هواء في البحر مجدافي = وبه تتلاعـب الأمواج
وجرحي لم يزل خافي = وفي وصلك دواء وعلاج
بكلمه تضمن إسعافي = وحشني صوتك الدافي
تعبت أمشي وأنا حافي = متى بمشي على الديباج
متى بشرب عسل صافي = لكل قطرة أنا محتاج
علي ثوب الظمى ضافي = وحشني صوتك الدافي
تعالي وين ما كنتي = على الميعاد لاهنتي
=أنا بس والقمر وأنتي
=جمعنا في الهوا ميعاد
تعالي وامسحي دمعة =على خدي لها لمعة
=وأقيدي للأمل شمعة
=بـأول عيـد للميــــلاد
على صوت النداء عوّدي = وردّي الروح في عودي
=بوصلك واللقاء جودي
=يجود الله على من جاد
إذا ما تم لقيانا = يجوز الحزن ينسانا
=من أول كان مرسانا
=على مرأى من الحساد
حظي معاندني على طول الأيــام = في كل شي دائم حظوظي رديه
لا واقع (ن) يصدق ولا تصدق أحـلام = يمي السعادة نسيت الجاذبيــة
يا راسم البسمة على ثغر الأيتـام = ارسم على الثغر ابتسامات حيه
عمري قضى ما شفت به غير الآلام = والحزن والهم والتعب والاذيـه
حتى الذي حبه رمى القلب بإسهام = تنزل على قلبي سهامه قويـه
لا قلت هانت لاقي الصعب قــدام = واندم على أيام الشقاء الاوليــه
فاقت همومي ها ألسنه همي العام = ودموع عيني فوق خدي هميه
من كثر همـي اسهر الليل ما نام = لا فرق عندي بين صبح وعشية
والحزن في قلبي عزف لحن وأنغام = ترقص على إيقاعه جروح ٍ خفيه
الناس فرحانة وأنا صــارع الآم = من شافني يشفق ويعطف عليه
مليت من دنيا التباهي بالأرقــام = وأهل المظاهر والعلوم الرديـه
يا لابساً مثلي من الحزن هنــدام = الله يفرجها عليك وعليـــّـه
مبروك من قلب صادق يا لمهندس وليــد = مبروك يوم التخرج واستلام الشهــــــادة
مبروك مبروك لك يا جيــد يا ولد جيــــد = قليل في الأرض حد مثلك تحقق مـــــراده
شرّفت يبعث كما شرف جمال الصعيـــد = لما رفع في سماء الأمجاد راية بــــلاده
النيل بك يفتخر والقاهرة ياوليـــــــــــــــد = وارض اليمن تفتخر بك يا بطلها زيـــادة
ما جاك بالواسطة مجدك ولا بالبريــــــــد = و إلا برشوة ورأسك مرتخي ع الوســــادة
جاء با لتعب والسهر والاجتهاد الشديـــد = ثما بدعوات من لـ . الله خلص في العبــادة
طمنت والدك وإخوانك وجبت المفيــــــــد = ما جيت من مصر با لعلم الردى والبلادة
غيرك يجيب الشهادة بعد جهدٍ جهيـــد = وانته على وجه عشاقك رسمت السعـادة
تعجز حروف القوافي في بيوت القصيـد = توصف وحتى القلم في الوصف يعجز مداده
العلم لي كان مشواره ودربه بعيــــــــــد = وليد قّصّره با لعزم القـــــــــــوي والإرادة
ما خاب من في بنوك العلم جمّع رصيــد = مثلك بعزمه وجد ه يا لوفي واجتهـــــــاده
ما خاب من في بحور العلم يبعد بعيـــــد = حتى ولو ما تهنا فوق فرشه رقــــــــاده
واصل مسيرك وحذرك يا لعمودي تحيــد = خلك كما كنت عنوان الشرف والريـــادة
من قال سر في دروب العلم رايه سديــــــد = عكس الذي قال با نفتح ورش للحــــدادة
كل من تعلم يمر وقته وعمره سعيـــــــد = والجاهل الله يعينه ما يذوق السعـــــــادة
بالعلم يقدر يحقق لادمي ما يريـــــــــــــد = وينال بالعلم نيشان الشرف والقــــــــلادة
كل من تعلم بتعليمه يفل الحــــــــــــــديد = ويقرّب البعد ويبيّد المصاعب إبــــــــادة
يا طالب العلم لك كرر كلامي و أعيـــــــد = من يزرع العلم يتمتع بلحظة حصـــــاده
اليوم ذا عند من يعرف عمر يوم عيـــد = مادام حقق له ابنه ما تمنــــــــــى وراده
لك حق تفخر بهذا الشبل يا بوليـــــــــــد = والرأس ترفعه بعد اليوم هذا زيــــــــادة
شيخاً على الجوّد متربي وفعلة حميـــــد = ما خاب ظنّه ولا خيّب وليد اعتقـــــــــاده
مبروك مبروك يا معدن ونوعه فريـــــــد = مبروك لك يا طبيب المشتكي والعيــــادة
أكيد حبك وحب من هو يحب أكيـــــــــد = من ما يحبك ولا ينبض بحبك فــــــوأده