السلام عليكم ورحمة الله وبركاته
من اسبوع تقريبا دخل الوالد المستشفى لمرض الم به وسووله عملية قسطره وبعد كم يوم بيسووله عملية غدد
وفي يوم وانا جاي ازوره حصلت عند راسه ورقه كتب فيها قصيده وانا خذت القصيده وهو ماهو داري وقلت بنزلها في المنتدى
ولده عوض بن يسلن بن عكعوك
اعمليلي دوى نافع يعالج قليبي = قلب تعبان نبضه قل هو والتحراك
والمرض جابني صدفه وهذا نصيبي = والابر في يدينك والدبابيس واشواك
عقمي موقع الوخزه وظلي قريبي = قولها صدق من قلبي على شان روياك
عالجي جرح مزمن والله انه صعيبي = حسبه طاب من جيت صباحك وممساك
ليت ماحد معك يمشي وخلفك رقيبي = باتسمر معك يازين محلاك محلاك
حس بالضيق والموقع محله رحيبي = رغم كل الوسع حسيتبه ضيق وضناك
ودي انك لحالك بس تبقى طبيبي = باتعالج اذا مرت على القلب يمناك
الصراحه انا ماريد غيرك حبيبي = انته الكل في الكل قلب عاشق تمناك
وانت لول ولآخرفي شبابي وشيبي = وانته شريان قلبي ذي بها السلك مشكاك
وانت روحي ودمي يالعجيب العجيبي = في بنات العرب ماشفت في الغيد شرواك
ياقمر خمس تعشر عننا لاتغيبي = باترجاك يابدر السما باترجاك
وان تبى فوقنا ضابط برتبة نقيبي = انته آمر ونحن اجنود في خدمة ارضاك
وان تبى القلب لك عطوه ولا له طليبي = قلب تعبان من جور الزمن خذه يفداك
هكذا الزين يجبرني غصبني غصيبي = يوم شيبت شفت اشكال من ذا ومن ذاك
شاعل النار تعصدبي وهو مادريبي = قالي يمكن الشيطان يا حاج غراك
قلتها داخل المفرق وقلبي عطيبي = قد شرايين قلبي سيخوها بالاسلاك