شكرا للاخ مرعي بن سميدع
على استضافته الشاعر المرحوم احمد بن سالم بن سميدع
وهذه القصيده للشاعر بن سميدع
ببداء بذي في سماه الشمس منصوبه=تشرق وغابت ولما الصبح لاقد بان
لايالله اطلبك واعط العبد مطلوبه=يامالك الملك ياقادر على ماكان
يارازق الطير عالجنحين والنوبه=تجني مجانيه لاسرحة في الخليان
كلن برزقه من المولى وتركوبه=والرزق مقسوم مابين انسها والجان
رزقه مسبر على ذي مكتلف دوبه=ماهو على حد خلافك ياعظيم الشان
يارب لاتاب عبدك تقبل التوبه=تصلح جميع العمل لازان والا شان
وان جار ذنبه عسا انك تغفر اذنوبه=يالله معونتك يابلجود والغفران
جارك من اهل السبب والحسد والغوبه=واهل السياسات ذي ماترضي الرحمن
الظاهره طيبه بيضاء ومقلوبه=والغابيه كنها الا من حمة هرشان
لاتعاجوا اثنين ثالثهم فرش ثوبه=سلقه على بير والقوا دحقة العميان
يعطيك عروه وقد عروته مقطوبه=وانته مصدق وهو مبلي من الشيطان
لنواك للذبح والا التاليه صوبه=ماتدري الا وصوبه حز في العظمان
شفرته للحم مسنونه ومشطوبه=يقطب اللحم مايقطب بها العيدان
اتقول من معنقة بلجيك مصبوبه=رصاص ذي من معانقها يجي حمسان
ملا عسى اللطف من بلواه واصقوبه=ينهاش ياذا الطيور السود يالغربان
وبعد قم يالمعنى ظهر مندوبه=حاشيها ماخلق مثله في الحشوان
ذي مابداء شدها الجمال محجوبه=تبرك مناخ الجرب والغش والقردان
من بل لقموش محسوبه ومنسويه=او هي تربة وترعى في جبل سيبان
واجزع في العين يسقيها من اشبوبه=لاقده رؤس المناشي حنت الرعدان
في صاط باحفص باتجزع ومذروبه=ذي كنها الصقر لاعمد على الجنحان
يوخذ طريق الضليعه فوق مركوبه=لاتضوي الا القويره منقع الحقان
عالباخريبه على فصله وماجوبه=سلام عالشاب والشيبه وعالغران
ذي من ضواه العتب يجلون معتوبه=فوق الزبر والمخالع تضرب العمدان
قل جيت من صاط مسقي بالكدر دوبه=صاط ال على ذي من اول في الزمن ذي كان
لاصاح صياحهم يلقون لبلوبه=تقول ينثر من المعلم كما الصران
واليوم قدها بضاعه جات مقلوبه=بارت جميع البضايع ذي في الدكان
ولعاد راس ارتفع مطلع وعزوبه=سارت شبيه الحنش في كيس بن علوان
ان عاد شي صوت ثاني باتغنوبه=والا صبرنا على القبصه من الثعبان
تميت قولي وكلن سار في شغوبه=والختم صلوا على الهادي بني عدنان