[الماسه*]

	معقــــــــول؟؟؟؟!!!!! إهـداء الى روح فقيد الوطن"السيد حسين ابوبكر المحضار" رحمه الله تعالى واسكنه فسيح جناته 1-معقول مرت من رحيلك عننا عشرة سنين؟؟=معقول وانت تعيش فيما بيننا في كل يوم؟؟ 2- والله ما قد غبت لحظه عن عيون الحاضرين=نطرب لاشعارك ونسماتك تجلّي للهموم 3-كل مانظرت لصورتك هملت دموعي والانين=يهز اعماقي الـم وتهب في قلبي سموم 4-يا سيّد العشاق ياعـذب القوافـي والحنيـن =يافارس الكلمه لحالك كوم والباقين كـوم 5-يامنبع الأحساس ياثورة مشاعر كل حين= علمتنا ذوق القوافي مالها غيرك يسوم 6-كأنه الا اليوم جا نعيك اليـنا ذاهلين=والقى ظلاله بالسواد وطـار مني كل نوم 7-وكأن تأثير الخبر وقعه كفقد الغاليين= حتى وَني ما.. أعرفك إلا كما شْوف النجـوم 8-أرسيت في فنك مبادي من عظات المؤمنين=وآداب في الاخلاق والأمثال في كل العموم 9-ماهزك الواشي ولا تصغي لكيد الحاسدين="لان" الفضايل شيمتك،بالفعل حيرت الخصوم 10-فعلك وقولك يشهدوا لك والملا هُم اجمعين=انّك تعايـش همّهم .. كأنها لك هي هموم 11-تاريخ في صفحات اشعارك نظمته من سنين =في حضرموت الخير اخبار الشواهد والعلوم 12-حرّضت عا ترك العوايد لي بها نحنا نشين=واعليت صوت الحق في وجه القساوه والظلوم 13-في اوبريت وفي نشيد وفي غنا دايم يبين=أهـداف في مبنـى على ساسات تحكمها وتقــوم 14-والحل فيها لو سمعنا حكمة ((احسين)) الامين= لكنّ وين العقل من أفكار تحجزها الردوم؟؟ 15-انهار شعرك تسقي الضميان بالماء المعين =غنت بها الاطيـار واسقت للسواقـي والعتـوم 16- وفي السماء صيتك علا ذكره امام السامعين=وجاوز الغيظه الى أطراف في الهند وتخـوم 17-غنوا اغانيـك وتسابق في تهافـت مطربين=نالوا شرف اسمك على الالبوم او فوق الرسوم 18-لأن شعرك كالذهب ((صارُه)) ضمانة رابحين=للمجد والا للنجاح ابمال او شهرة ((نجوم)) 19-والحان حتى للفرنجه والهنود وصينيين=قـد قدروها قدرها ، في وسطها كم من يعـوم 20-انت الملك ماحد ينازع للملك هم خاضعين=في حضرتك وانته هو الأستاذ كلن لك يقـوم 21-لا ماتقايس بحرك الهادر ولا غيره يزين=امواج في جزرك وفي مدك تطبب لي يروم 22-ماباتخفّيه الغداري يومها شمسك تبين=تضوي ليالي للمولع .. او لمن قام ويصوم 23-هذي حقيقه واضحه ماتنتكر بل هي يقين=مهما نعدد في مزايا ((حسين)) ماعـدت رقوم 24-يظهر لنا التقصير واضح لو نسطر باليمين=اسفار.. منها تمتلي وتفيض انهاره وتدوم 25- والختم صلى الله على طه شفيع العالمين=والآل والأصحاب عد القطر في وسْط الغـيوم

الهوامش:

في البيت الأول كتبت((سبعة سنين))وفي حالة ان كانت الذكرى العاشره ارجو تغييرها الى ((عشرة سنين))ولكم جزيل الشكر.
في البيت التاسع كلمة" لان" تنطق ((لن)) حتى يستقيم الوزن

في البيت الثامن عشر كلمة "صاره" الهاء عائده على الشعر ..وتدخل ضمن لهجة مدينة تريم الغناء.

في البيت التاسع عشر كلمة ((النجوم)) تختلف في المعنى عن الكلمة السابقه اي "النجوم" واقصد بها المشاهير

ملحوظه:أرجو اعتماد هذه القصيده كنص نهائي ولكم جزيل الشكر .

[/QUOTE]