الفتى بو نـور في العشقه يصـالـي
فـي زمـن غـدّار مـا واحـد يـبـالـي
ضاعت احلامي وضيعت الطريـق
الـمـحـبّــة بـحـرهـا دايـم عـمـيـق
كنت شوف الخل دايم بـدر عـالـي
صار يقطع دون رحمه في حبالـي
لا مـتـى يا قـلـب بـتضلـي غـريـق
الـمـحـبّــة بـحـرهـا دايـم عـمـيـق
هكـذا الـدنيـا تـرخّـص كـل غـالـي
والـغـلا عـنّـه يقـولـوا ثـوب بـالـي
كيف صار الفـالصـو مثل العـقـيـق
الـمـحـبّــة بـحرهـا دايـم عـمــيـق
غابت ايام الفـرح هـي والتسـالـي
وانسكب دمعي على ذيك الليالـي
لـكـن اللـي صـار مـاحد له يطـيـق
الـمـحـبّــة بـحـرهـا دايـم عـمـيـق
ذي يقول العشق بحره دوب حالي
الحقيقه الوصف في ظني خيالـي
كـيـف بايصـبح لنـا المـالـح ذويـق
الـمـحـبّــة بـحـرهـا دايـم عـمـيـق
بعتـرف بـإن الهـوى ماهـو مجالـي
وانكسر قلبي من اللي قد جرا لـي
واصبحت عـظماني الصلبه دقيـق
الـمـحـبّــة بـحـرهـا دايـم عـمـيـق
لو يجي ندمان قصده في وصالي
او عـلـى قـلـبـي يظن لازال والـي
بـايـصـلـه الـرد بـافـعـالـه يــلـيــق
الـمـحـبّــة بـحـرهـا دايـم عـمـيـق
ليش بـاكـدّر على نـفـسـي وبـالـي
دامني مرتـاح مـن دونـه وسـالـي
واكـتبـوا اسمي بـلا خلّ وعشيـق
الـمـحـبّــة بـحـرهـا دايـم عـمـيـق
قصّـة العشـاق يصحاب المـعـالـي
الـمـشـقّـه فـصلـهـا الاول وتــالـي
والبشر تمشي ورا الحكي الرقيـق
الـمـحـبّــة بـحـرهـا دايـم عـمـيـق