04-27-2010, 02:05 AM
|
#1
|
شاعر السقيفه
|
سمرة دان في عرس بن جبير والغامدي 20/4/2010
اقيمت هذه السمره في مدينة الرياض في قصر
الاسطوره
بمناسبة حفل عرس بن جبير والغامدي
بدع الشيخ صالح بن سحاق
وقال
ابديت بالرحمن قال الشيخ صالح في السمر=يوم اجتمعنا كلنا في عرس فائز بن جبور
والفي صلاة الله على احمد عد هشات المطر=واعداد ما البراق يبرق عد ما الشاره تثور
وسلام من عندي على كل من في الصاله حضر=وسلام من خاطري قال الشيخ صالح للحضور
قال عمر الذيب
حيا وسهلا قال ولد الذيب بو طارق عمر= تعداد ما بان القمر واعداد ما كوكب يدور
غن يا مغني قال بو طارق وزر الصوت زر=ليلة فرح فائز حمد بن جيب باقات الزهور
قال طالب باتيس
يا مرحبا حيا تراحيب المخيله والمطر=بقوال من شاعر عبر بي حيث ممنوع العبور
قل دان يالمعمور باغني وبازر الوتر= باشارك الجاويد في ليلة فرحهم والسرور
قال سعيد العوبثاني
يامرحبا بقوال من شاعر كما نقش الحجر=حط المدر عالساس وبناله في البرحه قصور
وسلام من عندي عليكم لا يامصابيح الدرر=وعلى حمد بجبير لي عشق وخلاها تدور
قال سعيد المشجري
للان قال المشجري مابان في البحرين بر=وانتو بغيتو بو ثرياء يا عمر غصبا يابور
ما با يبور القرش قرشي قال شاعر بي ظفر=مختوم قرشي وافحسه بين الاصابع والظفور
الحمد له والشكر عيني مبصره مانا عور=لا بادحق عقرب ولا بدحق على حنشان عور
قال القثمي
حيا صوات الدان لي جلت همومي والكدر=الله يديم الانس ويديم الفرح هو والسرور
وسلام من عندي على الجاويد عده الف كر=لي هم على يمناي ويساري ولي سدي ظهور
ايقول بو هيثم رفعت الراس وابعدت النظر=وشفت لي هم ما يشوفونه ورى موج البحور
الله يعين الناس في مسقط ولي هم في قطر=حد ثار من حيثه وحد ما حاق من حيثه يثور
قال باني
يامرحبا حيا بكم يهل المعاني والفكر=حيا بمن جاء عاطلابه مالقى ايت عذور
مني ومن اهل البلد في السوط والوديان جر=ومن عند بو فائز حمد له سطر زائد عاالسطور
ويقول بو صالح وصلني يا عمر عاجل خبر=قالو الذره والبر في الاوصار تلقطه الطيور
قال باواكد
ابليس والشيطان ياباني زقلبه في صقر=والناس لي صلحو لهم جنات ياصاحب وحور
يالهجس جملني يقول المخشبي بحرا وبر=في شان بو فائز حمد قطع اشارات المرور
قال العوبثاني
جينا على الواجب في الزحمه ومن كثر البشر=مقدر سمع كلمه وهذا شوركم ياخير شور
كل من يعز مخلوق يسريله على ضؤ القمر=ويعبر الكفرات عا حاجب وعا ثنتين قور
هذا حمد باجبير ما هو شخص عادي يعتبر=لونه عمد غبه لقيناله سلالم للعبور
قال بن سحاق
من شان بو فائز ركضن الهجن واشتد السفر=يومه يقدر قدروه اهل البنادر والبرور
جو ناس من جده ونا تعنيت له من روس سر=مانا مقصر في الرجل لي ما يجي منه قصور
قال الذيب
ليلة فرح فائز نباء ليله كماها ماعبر=ليله عليها نور من ربي وزاد النور نور
لاكثرو العوران في الدنياء لقف وادي عمر=خل الطمع واصبر على عيشتك ومتاع الغرور
حقي وعند الحق لو لحمي وعظماني طير=باجيب حقي قال شاعر من غراغير الطيور
كل ما قبضنا طير قال الذيب ثاني طير فر=ونا من البارح ونا كبدي على يسلم تفور
لان السنه ماهي مثيل العام في ام الهجر=قالو لنا كسرات في الوادي على شرح الحجور
قال المشجري
من لا لحق صاحبه في الدنياء تعذب واحتسر=ولا طلع عقبه ولا يقدر يفحط في الحسور
الراس حن والهجس حن مادام حنين الزبر=بقراء في الفرقان والتوراه مره والزبور
ما با تخبا بينكم لا ياصحابي با ظهر=لاني رجل معروف وافرح بالدعايه والظهور
قال القثمي
ذا وقت بانا رين كلفني على قضيم الصبر=صبرك على الميلات والقصرات يالقلب الصبور
بطلب عظيم الشان لي بيده تصاريف القدر=بترك بنادم لي من افعاله يفورون القدور
قال طالب
لاحول لاقوه دخلتوني في البحر الحمر=ونا صغير السن معرف للشواطي والبحور
قال باني
يستاهل التقدير لي يذرع بذرعه من شبر=والقدر له عنده محل ياسعيد لايوم النشور
لاغابو الشراح مالك بي صبح قسم النشر=نبغى شرح للمال لي صاعد وليهو بالحدور
يالعوبثاني بن بكر قد دق ناقوس الخطر=والله يعلم ايش لي بيصير في مسقط وصور
قال العوبثاني
الناس تتفاهم بسر وانته زري مابغيت سر=يا تفاهمو والا دعينا عا مبارك بن سرور
والغش ماهو زين ذا غاسي سود ماهو صفر=تخرط على غاسي سود بين العشيه والصفور
قال الذيب
كل ما قبضنا عود قال الذيب قضقض وانكسر=لما متى ما جبرة القسمه لنا دائم كسور
وانك بغيت الصدق والواقع صدرلي ماصدر=ونا عمر ما نقبل الباطل وطباخ الصدور
وان قد طلبتو الحق من باني تداعو للوصر=نبو على لحياء ونبو عالذيهم في القبور
وبا يقع شله وحطه بين لندن والمجر=من بعد ما شلة علينا المال وامات النحور
قال المشجري
اهل الكلاكنشوف قال المشجري وامات جر=جارو على الجيران شو ماحد على الصاحب يجور
قف واستقل والدهن يالمعمور صبه في المغر=خل الخجع والعجرفه والكبرياء هي والغرور
قال بن سحاق
حيو بغامد واكرموهم ياجليلين العجر=ذولا صهور الشيخ فائز مرحبا نعم الصهور
|
|
التعديل الأخير تم بواسطة عمر الذيب ; 04-27-2010 الساعة 02:09 AM
|
|
|