بعد الشكر والتقدير لرجل الاعمال المعروف الاخ عبد العزيز بن شريشر وللاخ المشرف على هذه المسابقه محمد بن مخاشن المخشني يشرفني ويسرني ان اضع بين ايديكم
مشاركتي المتواضعه مع اجمل تحيه القرنزح
بدي بالواحد المعبود رب العرش سبحانه=وصلي عالنبي واله ومن والاه ثانيها
وحق الشكر واجب للذي جوده واحسانه=وصل للشعر والشعار لي صاغو قوافيها
و ما في الامر ويهمه وقاله لي من السانه=تراث الاب والاجداد في الساحل وواديها
علينا الدعم له واجب وخص الشعر والدانه=تراث الحضرمي المعروف في معظم نواحيها
ومن علمه لما للعلم والتعليم وايمانه =بان العلم في كل الامور اول مباديها
واول علم علم الدين والسنه وقرانه=وايات العلق يكفي البنادم ماقراء فيها
وفي باقي علوم المنفعه كلين له شانه=وافضلها علوم الطب باولها وتاليها
بعلم الطب حددنا علاج الداء ومكانه=وسيطرنا على الام لي كنا نعانيها
بفضل العلم ننقل قلب من انسان لنسانه=وتم زرع الكلاء والكبد والقرحه نداويها
نقلنا العين من ميت الى حي ما فاقد اعيانه=وله عاد النظر وابصر بعينه ما حواليها
بفضل الله والتعليم متقدم بعنوانه=قدرنا به عن الامه نخفف من ماسيها
وفي العلم الصناعي بعدما خضنا بميدانه=صنعنا الساعه اللي من دقايقها ثوانيها
وقربنا المسافات البعيده بين اركانه=وبات الكون قريه مصغره وابعد موانيها
من اقصى ركنها الشرقي الى الغربي ووديانه=بفضل العلم طيارات في ساعات تطويها
ولا سطح القمر وصلو وفتحو ورشة اصيانه=وكان انجاز اهل العلم وشهادة تفانيها
ومهما يبعدو عن الادمي اهله واخوانه=بلمسة زر يتخاطب مع من حل قاصيها
وفي علم الجريمه رغم اشكاله والوانه=برمشة عين با لبصمات يتحدد حراميها
وعلم الهندسه طور لنا في الكون عمرانه=بفضله في فضاء الكون تتطاول مبانيها
وبعد الشرح ذا كله وما تحمله بيبانه= وانجازات اهل العلم ظاهرها وخافيها
نحت في الصخر لجل العلم واطؤ الجهل باكفانه=ترى بالعلم باتوصل مراتب مت حلم بيها
وحث ابنك على التعليم واخوانه وجيرانه=وقله كل من راد العلاء يسهر لياليها
وبعد الجار خص الحي وانصح كل سكانه=واختك وابنتك للعلم ادع الله يهديها
وشيد مدرسه او مد طالب علم با عانه=وكن عون الرعيه لاطرحك الله راعيها
وقل لبنك وكل من سار في ركبه من اعوانه=وما نيل المطالب بالتمني لنت باغيها
قره واكتب ضرب واقسم طرح واجمع بكل خانه=وبا تبلغ مقا صيدك من اولها لتاليها
ترى عتم العلوم النا فعه ما جف معيانه=شرب منه وغض في القوم حاسدها وشانيها
ترى من له هدف واضح وحطه نصب اعيانه=يصله الا بشهاده دكتره ماشي يساويها
ومن حصل شهادة دكتره يحسده اقرانه=على ما حقق ابعلمه لنفسه من امانيها
ومهما حقق الانسان تبقى النفس طمعانه=ليوم اتعود للمعبود خالقها وباريها
لان الموت بيد الواحد المعبود سبحانه=عظيم الشان بعد الموت يوم البعث يحييها