ولازالت خيول الشعر مسرجة ، الجمتها بيد كبار شعراء السقيفة ، يمتطون ظهورها ويقودنها حيثما شاءوا ، ويوجهونها كيفما أرادوا ، كل شاعر له وجهته وله هدف ينشده ، والجميع متفقون على إدانة كل قاصر يأتي للدنية ، وكل فاسد محتال يتخذ من الخسة والواضعة سلوكا مشينا له ، ويلجأ للنصب والإحتيال طريقة للسطو على أموال الناس .
من على صهوات خيول الشعر المسرجة ينطلق شاعر السقيفة عبدالله الجعيدي يقود البيان والمعاني ، وعلى ذلق كل حرف نستشف فيه طعنة توجه لمن يستحق الطعن .
مرحبا قول من شاعر يهز المشاعر =نظم الأبيات لي ماشي كماها شعاره
فالصفوف الاوايل طول الأيام ظاهر =ما خلف يوم عن صبر الشنف والمدارة
يعشق الشعر من صغره ويبنى عماير = لنتهى من عماره فيه حط في عماره
هرج متقون قد جابه يفض المنابر =يختلف عن هروج اهل النكد والقواره
من وصل خطه المغري وانا بات ساهر =كيف جوب على شاعر يحب الصدارة
واستعنا نهار السبت هذا بشاعر = لجل يهمز مقص بندقه ويسوق ناره
ياحسن فالزمان العيف شفنا مناظر =مثل ماشفت واكثر وانت عاراس قاره
كيف لو شفت لي طالع علينا ونادر =مامعه شي خلاف الخطرفة والصواره
من يحط القدم والناس خلفه تدافر= كل واحد بغا يجلس دقيقة جواره
رحبوا به وفرشوا في دروبه حراير = والتعاشير له من كل قرية وحاره
وان دخل شيخ للمجلس لقوا صوت ناير=حد يسبه وحد يرمي عليه الحجاره
والذهب بار والالماس فالسوق باير=والنحاس ارتفع سعره وشكل تجاره
نخلنا فيه ما باقي خلاف المثامر=والمذنب من اول ما سمعنا خباره
واحسن المال في سومه ثلاثه مكاسر=والسواقي ملانة بالحطب والقذاره
ضيعونا قلال الخير في خط صافر = سعف سواق ماله فالسواقة مهاره
مامعه في وسط موتره مفتاح تاير =ماكذب كل من سماه سواق طاره
والادب ضاع واهله كلهم فالمقابر= من ذكرهم لهم فالشهر يلقي زيارة
بعدهم تحزن الاوراق هي والمحابر =عالقلم لي نقص وزنة وقل اعتباره
لاغرب نجم يظهر في سماء الجهل زاهر = والسبب مدح بعض الناس له ياخساره
مايقولون ذا راسب وهذاك شاطر =ويل من كانوا أصحاب الجهالة ضماره
كم نصحنا وحاولنا تفوق الضماير =من سبات استمر معهم وزاد انتشاره
طال تاريخ بالابداع والعلم زاخر = فيك ياموطن الحكمة ونبع الحضاره
واصبح العيف متربع وفينا يحاضر =والمواكب على يمناه والا يساره
والمثقف صبح مزقول ما حد يناظر =فيه بالعين او فكّر يعيد اعتباره
اهـ في اهـ شف قلبي على الظلم صابر =حيث مد النظر ماشوف غير الحقاره
وانت مثلي عيونك دمعها مثل ماطر =لا سبل دمر الوادي ونقّر شجاره
الزمن ماتغير .مثل ماكان سابر =مابدا يوم ليله قال بسبق نهاره
من تغير هم أصحاب البقش والمواتر =والذي ع الادب شنوا وع العلم غاره
بالخطب لي ترددها عليهم حناجر =يحسبون انهم بايمسكون الاماره
من تعصر صبح حروي وزين الميازر =ماعرف وين يا بقديم يطرح سباره
طاوع الوقت لو ماطاوع الوقت. وآمر =اهل دارك ويالله بك تحصل اشاره
منهم يشعرونك بانك انسان ثائر =تعشق الزين اما العيف تبغاء دمارة
لاتدقق اذا دققت يمكن تهاجر=من مواطنك لي ربت من اول نماره
وان توجهت في ليلة لعربان زاير = شف بعينك ولاتدعي برد الزيارة
صاحب الدار لا باخرك خله يباخر = وان سكت لك. سكت منه وقدرقراره
باتحصل على موقده براد فاير = من على جمر منه ماتحس بالحرارة
شل فيجان لو دارت عليك المعاشر =ان بغيته شرب ولا نذه تحت داره
ذا كلامي قبله ان زاد وان كان قاصر =واطلب الله يعجل لاهلنا بانتصاره
__________________
.