[ملك اليمن]

#مبارك باعكيم

أبوي ربّانا على العز .. والشرف .. والنومسه !!
ما قال لي اسرق وغش والا شهد باطل وزور

والعائلة لي ما لها عاقل تقع في المهيسه ..
والبير لي ما فوقها شرحان تأكلها الطيور !!

والمدرسة لي ما تزيدك علم ما هي مدرسة
والآدمي لي ما يحس بالناس .. ما عنده شعور

ومدرسة الايام هذي طلفسة .. في طلفسة
الزقر يلعب والمدرس ما يواظب عالحضور

والتربية إصلاح .. ما هي قبيلة أو غطرسة
والجهل عدوى، لا عتدى عمار با يعدي عمور

بداية العشق الهوى .. وبداية الطب عسعسه
ونهاية اللفات عا السيكل متاهات وغرور !!

راقب عيالك ياعوض .. وحيا حياه مقدسة
من قبل ماتندم .. وترجع ياقهوري بالقهور !!

لا تحسب انه من سرى للمصيعة والمهجسة
با يعبر الغدراء .. وبايسلم من الكلب العقور

فكك من الي صرص الخوره وزرزر ملبسه
الاصل يبقى أصل .. واللفلوف والباير يبور

حياة نكدة ناس مبسوطة .. وناس امجرّسه
الله يستر .. لانقع في نوف وألا في حدور

غن بارك الله فيك كثرت في البلاد الهلوسة
لا تقولي زاد الغلاء والغش فيها والفجور

ما دامه الشيبه مهلوس، والعجوز ملهوسه
لا عاد تتعجب وتستغرب في افعال الزقور !!

طبيعي .. أولاد الفلس يتعلمون المَفلَسه !!
وانت فهمها وحزها .. يا با المعاني والفكور

لا تقول لي ما تبينت .. قم فوق ذريك وافحسه
وادفنه .. لا تتركه للجرذان لي وسط الجحور

وادري على الماطور لا شفت البلود ملوسه
من قبل لا يخرب .. ويحنبن البساتن والقيور

واذا حنب هت له مهندس محترف في الهندسة
وان كانك الا عا المهندس لولي .. مابيثور !!

ما كل من لقى محل وكتب عليه مؤسسة ..
يعني مهندس، قد عرفنا هندسه صيعر خمور

بدوي مهندس !! ليه يا سر بالطرب والقنبسة !!
وليه يا وادي جيعيمه بالحدايق والزهور !!!!

وليه يا بدوي القِزه بالميكله والخنفسه !!!!
صدق انها تداول الأيام والدنيا تدور !!!!
… باعكيم مبارك



*عدنان مقرم*
كدنا فهمت القول وعرفت الخفا والطلمسة
كم صيحوا العقال في الجهال بس ماشي حضور
اصلاً عيال اليوم شافوا من هليهم تملسة
قاموا وبطروا بالسياكل مادورا حق المرور
تلزلزوا وتحزقوا والشعر ناعم ملمسه
ياخوي راح الخرف كله لا سقط بابك وسور
كله كذا يلمع تقول الا عروس معرسة
والعطر ماتعرفه هو حق بدر والا حق بدور
كل الاهالي عارفة لكنها متعامسة
كم ضاع من (سايق) ولكن ماعتبر واحد وقور
والناس تعرف من حفظ و من اموره معكلسة
لامايفيد السر والاحداث تعطينا خبور
مادام هذا "الواتس" يسري والصور و "الفسفسة"
شكله بنبطي هكذا نسبح وباتفر "الطيور"
واللي تفكر باتجيه الهدرسة والهلوسة
واللي يقول الحق كل الناس من عنده نفور
احفظ عيالك لا كبر ابنك ضروري تسايسه
لا لاتخلي الشر ياكل فيه وانت ماتحور
الاصل يبقى اصل لازم من تعب في المدرسة
لكن عقبى الصبر مضمونة وصاحبها شكور
بالدين بالاخلاق حصنهم مهو بالوسوسة
رتب امورك بعدها لو قلت دوري .. باتدور

*عدنان مقرم*