السلام عليكم ورحمة الله وبركاته
هذه مساجلة بين الشاعر سالم عمر البدوي بلحمر والشاعر سالم عبدالله بن حشحش المشجري
سالم البدوي :
من قلب آهات له في كل شارع وبيت = يصبح ويمسي من البعد المجدد حزين
ارسل سلامي واشواقي لمن لادعيت = يجي على الصوت مايهمه دحين الدحين
ضاقت بي الأرض ياسالم ومابعد شكيت = ماهو من القل لكن من عرب مبعدين
أبوي قد مات في الغربه ونا لابطيت = خائف من القاع تدفني زواخي وطين
المشجري :
واصل سلامك ولك مثله ولو ماوفيت =حقك وحق الرجال الأوفياء المخلصين
يامن تصدرت ديوان الأدب وعتليت=جوهر كلامك حكم والحرف معدن ثمين
ذكرتني أرض من ماها الكرع مارتويت=سافرت منها وزادي ذكريات السنين
حالي كما حالكم لصبحت والامسيت=قلت الزمن لاقسي يمكن علينا يلين
سالم البدوي :
حياك يارأس عالي في كلامك كفيت = ووفيت في الرد سقفك معتلي الزاهرين
جاني ونا في سهونه كنني مانسيت = ذاك الذي دوب يعطينا الكلام الحسين
أما الوطن واغتياله يوم أنك قفيت = ونا وغيري شرد خلاه للطامعين
وكلفتني قول لك حاجه إذا مادريت = لحقاف فيها السمر كرهت شجار الضبين
المشجري :
توزن بعقلك بلد ون خذت والا عطيت = ماتقبل القاصرة في عامة المسلمين
من حقي اعتز واتشرف بكم لنتميت =للاهل والدار لي فيها المكان الزبين
لي وحد الراي بين المملكة والكويت =بيخلي القطن تتنكر لاهل العنين
لتقول لما هنا يابلحمر وانتهيت = لازالت العين عامال الخوة لقربيــن
سالم البدوي :
قومي. ولاهي على كيفي أنا مابغيت = النوب يفرق يهب ليسار والا يمين
يامحسن الجمع لو مافيه عبضة سبيت = أو رمح بوزيد ذي شق قلبنا والريين
لكن عاد الأمل وعليه شفني بنيت = ومنتظر فجر ضوه سدنا بايبين
والمال لا راح غيره بايجي لعتنيت = عاد الموارد مليه تكفي الصادقين
المشجري :
من حب مذلوح صافي في الحجل لاذريت=باتوخذ الصيت والشهرة على الثانيين
وخلاصة القول يامن بعت وإلا شريت=لاتقارن الريدة العلياء بسيلة قرين
عاداتها تختلف ونته بنفسك رأيت=في مجتمعنا الأمانة تاج راس الأمين
أما صحاب النفوس الكايدة لامشيت=يمكن يسوون لك في كل شارع كمين
سالم البدوي :
عندي سوى كلهم وعلى كذا قد مضيت =وتوثق امضاي عند الاوفياء الشاهدين
وكيف اسحب كلامي بعدما قد رسيت =قطبي بغبه عميقه عمقها اربعين
والحب عاده مكانه في الوصر مانذيت =به في جروب الخوه الأتقياء الصالحين
ون كان شي حل عندك للقضيه بديت=بلقيه مخرج وربي في العسر بايعين
مع فائق التقدير والإحترام ..