[شيخ القبايل.]

مهرجان البيع الكبير قرّب ، وكبرى الشركات مزهبة حالها للاشتراك ، اللي عنده بضاعة واللي ماعنده ، اللي معه راسمال واللي مامعه شي كلهم ناويين يخشون في البيعة ، والبيعة دسمة .
اول ماتعلموا التجارة كانوا يبيعون على خفيف ، يعني جمهور محدود في ملعب الكورة ، كم بنات ، شوية سكار ، كم كيس مخدرات ، حزة من لزة ! بقايا شعوب (استوك) ، مقابر نفايات نووية .وغسيل اموال سبع مرات احداهن بتراب . لكن السوق تحسن والعملية كبرت . مثل اي تاجر (عصامي) يبدأ على الخفيف وربه يفتح عليه شوي شوي والتجارة تزين .
والان المهرجان الكبير قرب .. البايع يلتقي المشتري ، والمشتري كوكب لامع بارد وكبير ، وميت ، لكنه مستعد للشراء والجماعة بايبيعون بللللاش .
والسوق مبهرج والحكاية جد . حتى الولي ياجماعة دخل تحت المعرص ، معاد حد اولياء الا انا ونتو ، كلنا كنا نقول لا حاصت ولاصت معنا الولي هو حصانتنا. مبدأه واضح وتجارته نظيفة ، رشرش مدارته وفتح ابوابه وعلق اليافطات !! والا بايطلع من السوق . معذور !! . وان خرينا النقطة شوي بانقول مغدور !! ماصدقوا قال كلمة جاوا بالطيران يزفنون .( شوه قال شوه باع!!.. من بغا يغرف القاع ) .
جلست الى جوار بو راشد منزعج ايش الحكاية . قال معاد حد تجار ..مابقي الا خرا التجار – سلامة السامعين – فنيات التسويق وارضاء الزبون خلت نحنا معاد نفكر ان شي ثمن لما نملكه ، ياخزياه يومهن بنات يفحصن شريفات حطيناهن هدايا ترويجية على بضائعنا الزين منها والشين .
وعلى كل حال المهرجان بايبدا والنقط فوق الحروف واليافطات معلقة والمزاد رجاله حاضرين ، بس في ملاحظة .. المفروض يسمونه مناقصة مش مزاد لان المشتري اذا قال بسبعين قالوا له شل باربعين !!
ونسيت اقول لكم ، لعل بعضنا عنده عزم بايحضر البيعة .. البضايع هناك متنوعة وعلى ثقيل ماحد بايقدر منكم على شي منها(....)كاملة للبيع ،مبادي مقرطسة للتوزيع ، مقلنسات قديمة للتصريف ، صداع واوجاع ، وجهود سنين طويلة من الصبر والمكافحة في بناء السوق وتليين العملاء جاهزة للتصفية والتقبيل . ايش الفايدة بعض البنات لم يبق منهن سوى الذكريات عند المعابر خل الباقيات يسلمن للتقبيل !! .
وقبل ماودعكم في نفسي شي . مشغوب والله من عبود ، لابد في دكانه وعاده ماظهر بشي ، كل اللي يوزعه بلاش شوية مقعقع وقليل صبعبع ، وعنده كم الف منت داري ناوي بهم على ايه ؟؟ بايخليهم في القرية ولا بايحملهم الى ارض المهرجان فوق بساط الريح !!
والعذر والسموحة ...بانلحق البساط .
رزق !!