نكمل المتبقي في وقت اخر لعدم وجود الوالد
محاوره شعريه في سمر بين الاخوان احمد محمد باقديم وحسن محمد باقديم
احمد باقديم
انا حبي لصنعاء فاق وصف الناس ذي توصف وتتكلم =
لان العاصمه وجبالها الخضراء =
جميله خلت الهدهد يخبر عنه اسليمان=
حسن باقديم
الى حبك لصنعاء حبنا لام القرى والبيت ولزمزم=
وللهادي وبا الحسنين والزهراء =
وللصديق والفاروق ولعثمان بن عفان=
حسن باقديم
خرج ذا فصل لازال الحوك في الشحر لك شيذر يحوكونه =
بغوا شيذرك له حوكات متقونة=
الى تنشرت به يحسدك حال الديس والبقرين=
احمد باقديم
خطانا العيد والزينه خطت والحيك في وعده ومسهونه =
ولاكنه بطاء هل باتردونه=
يسرح وعد في التسلوم ويبري الذمم والدين =
يقولون العجل شيطان والراضه لها خيرات مضمونه =
وكل من راض جاب الوعل بقرونه =
وضرب العفش ما جاب المحجن حاني القرنين =
احمد باقديم
رياض السلحفه وبطاتها في الزحف اغلبنا يكرهونه=
تخلي الذيب فيها يغرق بسنونه=
ويقسمها ربع وثمين وانته تفحس اليدين =
حسن باقديم
تدور الكائنه عاكل كائن زل عاحده وقانونه=
ولا كل دابه للبطش مرهونه =
لما كنن البهايم من ذياب الشعب بايضوين=
احمد باقديم
نصيف الله في ذيهوا يكل عاالحم ورفيقه يكل تونه =
وهم في صرم واحد سيب يمسونه=
بنا دم في الوفاء قرص الذرة بايقسمه نصفين=
حسن باقديم
يسرح بالوفاء المخلوق من داره وخلق الله يجحدونه =
ووافي الشرع والصادق يذمونه =
دهاة العقل في حيرة وهم من وقت بانارين =
احمد باقديم
كلام الناس يكثر مايقل كلين يتفاخر بصارونه=
الى ماشي عجبني بالقف بونه =
بها السبع العجايب في مدنها والحرير الزين=
حسن باقديم
لقف بونه وغب من خلف بونه حال سونه بايضوي سونه=
وهو لاقلب له عشقته وفنونه =
الى تولع بشي وهويه عنده يعقل الرجلين=
احمد باقديم
بغينا غيث له بارق قوي ورعود في القنفان حانونه=
على وادي النبي والكار ودجونه =
وحول با المصبح في المجاري ساقي الهجرين =
حسن باقديم
خزينه ماليه بالخير كل من قال جودك فاض ماعونه=
وجوده مايغب عا ارض مزمونه =
قصد باب الرجاء وابشر بجوده طين غمضت عين =
ذكرتني ابياتك بسمره قديمه ملخص الحديث تراكمت سته زواجات ذا بعد الاخر بطي وجونا البرجف وقالوا حل الوفق ياباقديم وانقسمت انا والمرحوم حسن برجف بشق نشل ثلاثه زواجات وسمرت انا وياه اول زواج وتحركنا للثاني وقمنا باالواجب وتحركنا للثالث مباشره وضوى الشيبه رحمه الله تعبان وسهران وبداء السمر وهو ينعس بدات انا بثمانيه ابيات وهو نيم في السمر ولا كني رجمته وباروته يثور رحمه الله واحفظ مايلي ..
قلت له ..
نحنا نعمنا في الحضاره والبوادي في كبد = والقبوله ماتت رحمها الله وكم من جيد مات
قال برجف ...
شيبه في السبعين لا كنه حياني خو حمد = وردني لا شاب ولا قد رجولي هاملات
من مات مايحيى ولاكن عادها معها ولد = بايجيك متعلم ويقراء في حروف العاديات
قلت له ..
وان جاء الولد في مذهب الشيطان لاحان المهد = معاد باينفع حنا لاقد الفتايل راشنات
الموت عاالهلكه سقط وبليس لادم ماسجد = واعلى دني اهل الزمن واخفاء النجوم الزاهرات
قال برجف
..
ياخو حمد لا قد قبضت الفقر باتجيك الرقد = ورقده وراء رقده وشف رؤس القصور العاليات
عيالها حسرى ولا فيها لبن قدها جلد = لا كنها درت كما الدنيا الى هبت وجات
قلت له ..
ان ذا كلامك لفهم شفهم طير راس المقد = فروا رياعه والزمن هذا مشتتهم شتات
قال برجف ..
بايلفهم ذي كون البراق والراعد رعد = وكون الرحمه وصبت عاالشعاب القافرات
وفي نفس السمر عاصوت ثاني
بدع برجف
يامن جمعنا في هذه الليله الرضيه
طاب السمر جبر العمودي ذي عزنا راس روشان
باقديم
يامرحبا لا ياالوعول المربعيه
يامرحبا لا هي بخيره عبروها سبع وثمان
برجف
باعطيك كلام وده الخاسكيه
للكسوري ذيهوا مسوس ولاعطف عاكار سيبان
باقديم
بانوصلها الى الكلمه بتيه
وانك عوج انا مانوصل هرج من ناس عوجان
برجف
قدني سمح من قبل يخلق بن عطيه
ولا يحل في جول فوه ويلقي ثلاثين دكان
باقديم
سمحوها باتقع شربه هنيه
ياحول حول باالمطر والغيث والرعد حنان
مامعي طربه ولاعندي هويه
ذلا على شانك كلفت الهجس يدخل غبب بحر سيلان
برجف
ياحبيب الروح باضرب لك تحيه
ماهي بمدحه ياحسن شليت خاتم سليمان
وهذا زامل للشاعر المعلم محمد صالح باحفي رحمه الله نطقه في زواج شخص وكان والدنا لم يسمع بهذه الابيات ابدا ولاكن حس انا الابيات ليس لهذا الشخص واليكم ابيات باحفي
باحفي
لي سنه كامله والجيش والحرب ثاير = عاقناة السويس اربع قرانات كبرى
مصر فازت بهن والباقيات الخساير = عافرنسا وعااسرئيل هي وانجلترا
رحبي يابلاد الهند ياام المنابر = ذي جبالش وعيدانش عجيبه وخضراء
صبح الجيش باالقوات لش والضخاير= فوقهن عضمت السلطان بن شمس لمراء
مجلس الامن صرح للملوك العشاير = والذي مادري خلوه يعلم ويدرى
اعلنت كلها السلطات لهل الدوائر = ان ملوك العرب فازوا بديوان كسرى
رد باقديم
يغفر الله لمن اداء النسك والشعاير = لا صبح الصبح في الختمه يرتل ويقراء
التجاره معه مامن تجر في العماير = لوبناها وشيدها على نيل مصرى
ريت مسكني في جرول يقع والحفاير= صبح البيت وتطوفه فجراّ وظهراّ
لو عليه هموم الكائنه والدوائر = عند وقفه وباحصل من العسر يسرى
وهذا زامل للوالد حسن باقديم
ياالادمي لا ماحفظت الدين = لاخير في مالك ولا دنياك
العروه الوثقى تقود اللين = واللين به سيد البشر وصاك
واس اقربائك وارحم المسكين = واخفض جناح الذل لمن رباك
ربك يساعد فوقها ويعين = دنيا ندم فيها تعب واهلاك
وهذا زامل الوالد حسن باقديم
رابطوا في جبلكم والحصون الزبينه = ورث شيبان يامغلا السواس الدويله
لاتخذكم طماعه في حلال المدينه = فاح فيها بلآ منزل وحاله رذيله
صفوا للوغد فيها والتقي في الظعينه = والدني يخطم العالي وحامل صميله
اخر زمان فيه المروء يهرب بدينه = لاخبوت الخلا تحت الدقام الطويله
والتقاء والنقاء حرز والنمر في عرينه = قالها سيد الرحمه ومولى الوسيله