[حنطبه]

استراحة آخر الأسبوع .
قال العم الشاعر المعروف عبدالله محمد باصره مايلي :

ياريتني عبد لك مملوك يامن هواك = بليت به وأنت يمكن ربنا مبتلاك
أوكون واحد من اهلك دوب عايش معاك = مسئول عنك من اصباحك الما مساك
لدعيت مني بنصف الليل باقول جاك = عبدك على الباب واقف بايلبي نداك
لانمت بحرسك لما يصرخون الدياك = وإن سرت باسير قدامك وساعه وراك
من شان بحميك من ذي ينصبون الشباك = ومن الاذى والمخاطر باحجي من قداك
بخدمك باجيب لك قوتك وباجيب ماك = وإن كان ماء البير عفته مايبرد ضماك
باقع سحابه غزيره ممطره في سماك = ومن الفواكه تمن باجيب من ذا وذاك
ولاتشل فرشة الاسنان عند السواك = باتخدش اللول ذي زين حناكك وفاك
أنا لأجلك وشانك بنقلب عود راك = باقول حظي سعيد مادام عيني تراك
يوم العسل في جبوحه خذ حلا من حلاك = قلبي وعقلي وروحي في المحبه فداك
وفوقه العذر هو والعفو لاماكفاك = منته بشر في عيوني شوفك إلا ملاك

مداخلة سالم عمر البدوي بلحمر :

يستاهل العز ذي خلاك تؤخذ مداك = وتقول أبيات توصف في الهوى من سباك
وصار لروح توأم طول عمره قفاك = سناه يابومحمد مستمد من سناك
اكيد ومن المؤكد باتتبع خطاك = لأنك أستاذ في العشقه ذكي من صباك
عليت مبناه لكن ماتعدى بناك = ون احتيوته ببسمه قبل هو احتواك
ون صرت له عبد مابظني لمره عصاك = سعيد من حب مثلك ماتجرأ شناك
ون صرت له اوكسجينه بايقع لك غذاك = ون ضاق حالك إشاره من حبك شفاك
من حب من صدق ماملك ونسق لقاك = وإذا طلبته بطيبة نفس بيده عطاك
ون بعت من غير تقصد مابخل في شراك = وان قد جفيته سكت منك ولارد جفاك
في القيض لاعطشت من عذب الزلالي سقاك = ومن الشواني وحساد المحبه حماك
في نون عينه اذا نسنس عليكم خباك = وصار رمشه من الماطر وجفنه غطاك
ومن البرد والعواصف وسط قلبه لقاك = هذا الذي تدركه بالروح يوم الدراك.