[محمد حامد]

شكرا الاخ عمرالحبشي وهذه حزيه قديمه

كان ياماكان في قديم الزمان يوم كان باقديم يوكل الطلي بلا ديم فيه رجال عنده ولد ويوم قده بايموت قال ياولدي باوصيك لاقدك باتعرس خذ لك حرمه عمياء وتشوف وصقعاء وتسمع وعاقله ومجنونه المهم مات ابوه وبعد فتره راح يدور له حرمه على حسب وصاة ابوه وكل ماجاء عند عرب وقالهم بشرطه قالوا ماعندنا بنات بهذه الشروط وفي يوم وهو في الطريق رايح الى بلاد قابل رجال ويسيرون هو وياه قاله شلني ولا باشلك قاله الرجال لا تشلني ولا باشلك ساروا قال للرجال انته راكب ولا تسير قال الرجال ماتشوفني انا وياك نسير المهم ساروا ولما قربوا البلد شافوا الحجل فيه موسم زين والسبول ماشاء الله مثل الكدوم قال هذا المال مصروب او بسبوله قاله الرجال بسبوله ماتشوفه قدامك وساروا مروا على المقبره شافوا الناس يدفنون ميت قال هذا ميت ولا حي قاله الرجال اش فيك حد يدفن حي هذا ميت ولما وصلوا البلد قاله الرجال ارحب تفضل عندي قال لا باروح البيت الكبير قال بيتي اكبر بيت في البلد قال لا الرجال راح بيته وعنده بنت وقالها اليوم قابلت مجنون في الطريق وجاب قصته قالت ماهو مجنون والبيت الكبير المسجد وهو الان في المسجد وشلني ولا باشلك يعني جب وصف يعبر الطريق ولا انا باجيب لك وصف وراكب ولا تسير يعني حافي ولا متحذي والمال مصروب ولا بسبوله يعني هل اصحابه عليهم دين ولا لا والميت حي اذا حد وراه خلف رجال وميت اذا ماخلف قال ابوها هذا مجنون قالت احضره البيت وباتعرف راح ابوها واحضر الرجال وقاله طلبك عندي البنت اللي تدور عليها قال تمام حضر وشاف البنت وقالها بشروطه وافقت على طول قال ابوها كيف يابنت هذه شروط معجزه قالت انا عاقله في شغل زوجي واموره ومجنونه في امور الناس وعمياء عن امور الناس وشوف امور زوجي وصقعاء مع الناس واسمع كلام زوجي وتزوجوا وعاشوا في نبات وثبات وخلفوا اولاد وبنات وجيت من عندهم وهم مبصوطين وانقطعت في ...........الصغير

وتقبلوا وافر التحيه