[سالم باخضره]

5

فصل والثاني وصل ..بعد المسافات الطويلة
سالم احمد بلخير باخضره 30.08.2014

فصل والثاني وصل بعد المسافات الطويلة
غاية العاشق ملاقا الزين فاالسوق الطويل

والتقينا كلنا .. داخل عدن بعد ألف ليله
ليل ياالعشاق .. والعشاق مسراهم بليل

هوّن السرعه.. دلا والادمي عقله دليله
والذي ماحد يدله ظاع من ماله دليل



عبدالله بالحمر
دوب باخضره يشاركنا باﻻقوال الجميله
وينكم حان السمر ياهل المروه والجميل

عذر ماشي عذر بنشل الخفيفه والثقيله
والجمال الموشره تطرب على الحمل الثقيل



احمد بن لحول ابومهدي
الدول ماتقوم ياسالم على أحكام القبيله
للدول دستور مابين المعلم والقبيل

بعد مقتل بن ربيعه انتها دور الجليله
ليش ياجساس تقتل صاحب القرن الجليل



خالد بن قاسم
مرحبا بقوال من شاعر يجيب المستحيله
عنده الابداع يطلع سهل ماهو مستحيل

يامقهوي حوج القهوه بعرق الزنجبيله
خلني عدل مزاجي بالجفل والزنجبيل

قبل حط النار والباروت فاطراف الفتيله
يانمر شاجع وفيك اشناب مفتوله فتيل

خلنا نسمر وكلن مننا يسند صميله
والمحبه بالرضا ماشي محبه بالصميل



يسلم بن صالح بن عكعوك
با دقيل الجيد ماضني يترك في دقيله
ما رباط العز من سابق محلت بادقيل

مامعي كاتب ونا شيبت قد رجلي عقيله
عام لول قد عقرته في غنيمة بن عقيل

ياالشبيبي لاتذمه عبقري ولد الجفيله
وانت ماتعرفه سابق يضرب الصيد الجفيل



خالد بن قاسم
صاح بلحول على مخلوق عابر في سبيله
هو يهاجمني وانا عابر مع خط السبيل

كلما مديت باشرني برجمه فالفليله
ياحمد ماتقدر الذره تشل خرطوم فيل



سالم احمد بلخير باخضره
رد لي باالصوت والبارق لما خيل مخيله
حن راعدها وكل ظامي يحول للمخيل

رحمتك باالجود وادعوا باالكرم وباالفضيله
يسقي الظامي كرع لاقال فضلك يا فضيل



احمد بن لحول ابومهدي
انت ياخالد فصيله نادره ياطم فصيله
من سلاله طيبه ياحي هاذاك الفصيل

ماسخي بك للاذاء ياذي تحامش عاالفتيله
ادري انك من عرب ذي يفتلون الماء فتيل



يسلم بن صالح بن عكعوك
قل لبن قاسم ترفع وايش تبغي فاالمسيله
دونها وادي نحب وشعب ذي جنبه يسيل

دونها جرو النمر ماهو مروح من حجيله
وانت عادك فاالهوى ترقص لنا خلف الحجيل



خالد بن قاسم
قل لبن عكعوك تركة جدنا تركة دويله
ليش تنكرها وقدها من على زام الدويل

وانت يااحمد عارفك انك من الناس القليله
كاسب الجودات بلحول ومن شقه قليل



عبدالله القطامي
السلا والصفو يا خالد شفه ما شي مثيله
ووين بومهدي يجيب القول ذي ماله مثيل

ومن حضر منا يشارك بالكثيره والقليله
واسمروا ساعه وهذا اليل بقا فيه القليل



يسلم بن صالح بن عكعوك
ايش من تركه معك قد جيت من خلف الطويله
من جبل قاحل وشجرة بن سانقها طويل

عارف التاريخ كله لا تقول اني هبيله
وانت تركني قبل ملقي هويبا ياهبيل

ان لقيت لك قرص ياالصمصوم من يد النزيله
انته ادعي للنزيله ماتقصر فالنزيل

ماتشوف الزير سالم قيم من دون الجليله
وانت عش في دار خالك شهم من سابق جليل



خالد بن قاسم
بننا محمي ولاكن نخلكم لادن خيله
جا له الشارح ومنه شلله خبره وخيل

وانت تعرفني قدك لاجيت في مسمر وقيله
انت وابن الصمبحي رويكم انجوم المقيل



سالم احمد بلخير باخضره
تم يا الشعار .. والغاية تبرر للوسيلة
والهدف واحد وللغايات نوصل باالوسيل

والختم صلوا على المختار . مافاالحمل ميله
والطرق متساوية والحكم للمشوف ميل ..



اللهم صل وسلم وبارك على سيدنا وحبيبنا محمد
وعلى آله وصحبه أجمعين