أبديت بك يالواحد المنان= يأمن بقدراتك غرق فرعون
في بحر طامي فيه جم حيتان = طحَنت عظام الفاجر المهيون
يأمن خلقت الأنس هم والجان = و اخلقت في كل عين تخلق نون
الأمر لك والنهي ياسبحان = يا خالق العاقل مع المجنون
لو قلت للشي كن بسرعة كان= بأمرك وتصريفك يدور الكون
وبعد بكتب بالقلم عنوان = لي ما دروا به خلهم يدرون
مابي فزع من شيخ او سلطان = حمسوا علي والا علي يرضون
( الهرج له شوكة وله ميزان ) = والشعر له معنى وله قانون
يركب على صوت الغنا والدان = ما هو طُلق بالقافية مرصون
معناه لو ما حرك الوجدان = يصبح كما سده بلا كالون
تِدخل عليك الطين والكثبان = والبرد لي به يشتهر كانون
والوزن لو ما هو كما البنيان = مرصوص عابوا ع الذي يبنون
والشعر لي نقراه بعض أحيان = لا طعم له نطعم ولا له لون
واصبح كما الببسي في الدكان = مولا البقش يوخذه بالكرتون
ما لوم شعراء تالي الأزمان = لوم الذي دائم لهم يقرون
لوم الذي يكتب في الديوان = بو زيد ما لومه ولا مدهون
لي ع الحرير الزين قالوا طان = والطان سعره عندهم مقرون
بالتبر والألماس والريحان = والذايبي والكنش والمرشون
الشعر في الوقت الردي يخوان = قالوا لي انه في الثراء مدفون
مع ناس من نوح ومن سيبان = ورجال من غورب ومن قيدون
والنهدي اللي عندنا له شان = مع بن مهنا هو وبن هادون
والمشجري لي قابض السكان =واخوان في السيلة وفي نفحون
و اعيال من كنده ومن نعمان = لي ما يسيروا في طريق الهون
وأحفاد خاتم الأنبياء عدنان = لي يلبسون الشال والصارون
واخوان في الصفراء وفي بيحان = واصحاب من دوعن ومن سيئون
لي في سواحلنا وفي الوديان= موزون دائم شعرهم موزون
يا اهل المعاني عادكم للان = مبعد وصلتوا طبقة الأوزون
لي للفضا ء طلعوا بلا ربان = للأرض ماشي عذر ما يضوون
الكذب عند الناس بالأطنان = والصدق ساسه عندهم مطحون
بالرخص باعوا غالي الأثمان= في سوق له من كل محل ياتون
دنيا ترويه العذاب ألوان = لي ما مدح زايد ولا طحنون
عرفات لجله ما بكت الأعيان = واليوم يتباكوا على شارون
النوب يجنا من طرف الأغصان = ع الخمق ما يجنا وع المرقون
والنمل لو طيرت له فيجان = جا . والذبر يجنا على الصابون
والصقر ما هو عينة الغربان = لو ماتت الجيفة عليها يجون
ما كل من دندن صبح فنان = ماكل من يعشق كما مجنون
ما كل من صاموا من الريان =مدخالهم سعف النبي مضمون
والختم صلوا عد ما الرعدان = حنت وما بارق برق بمزون
على رسول الواحد الرحمن = لي في ثرا خير البقع مدفون
ملعـ...ون في ملعـ....ون في ملـعـ...ون=ملعـ...ون عند الله وخلقه
كل من يساند أو دعم شارون = في غرب عالمنا وشرقه
من طال رأسه من بني صهيون = يا ربنا عجّل بحلقه
هم مصدر الإرهاب لو تدرون = وأسباب كل سقطه وزلقة
الميم طاء والكنش والمرشون = لازم يحن رعده وبرقه
فوق المنافق من بني صهيون = طلقه وراء مليون طلقه
ياشعب عربي حرر المرهون = رجّع لنا ما راح سرقه
تنديد واستنكار تلفزيون = ما جاب للمظلوم حقه
لو نسيوا الحكام لا تنسون = يا شعب لو فيها مشقّه
ردوا لنا الأقصى ولا ترضون = لحظه بتدنيسه وغلقه
القدس تبكي وأهلها يبكون = لوعه بها عيفه وحرقه
واحنا نتابع فسق جم ومجون = في كل برنامج وحلقه
بيجن ومصاص الدماء شارون = مطلوب تقطيعه وخنقه
واللي يمد للوغد يد العون = حكموا بتصليبه وشنقه
يا شيخنا ما متت رب الكون = حطك بجانب خير خلقه
لي ماتوا الحكام لي با لهون = رضيوا 0 لهم ياشيخ غلقه
ببدأ بذكر الواحد الفرد الصمد = الخالق المعبود رب العالمين
اللي جمع شملي بشمل أهل المقد = وإخوان من دوعن وصنعاء واجدين
جو لجل دعم الرئيس الشهم الأسد = لي هو على الفجرة قضاء والملحدين
والمؤتمر لي هو بنوابه حصد = في ما مضاء مجمل صوات الناخبين
باسمي وباسم أهل أوديتنا والرّيد =حيا وسهلا بالرجال المعمدين
الشيخ بإجمال والوزراء عدد = ما طاف بالبيت العتيق المسلمين
واعداد ما بارق وما راعد رعد =في رأس كل منشي وكل طاهب يزين
لي شرفوا خيلة وعبد الله حمد =بقشان لي قد حازها دنيا ودين
هوكوا على رأسه ولو واحد نشد = قولوا صبح شيخ العرب متجمعين
وهلال لي سهران طرفه ما رقد =قولوا معي له كلكم متشكرين
فرحوا بكم مره ونوّح والكند =وبني هلال ايضاً ونعمان أجمعين
واكبر قبُلنا لي عليها يُعتمد =سيبان لي دائم بها مستامنين
والعوبثاني ولّد حلال العقد =من ارض جاء فيها نمارة قاطنين
وآل العمودي وأهل ريدة باعبد =وأعلام وادي حضرموت الطيبين
عقدوا جميع العزم والرئيس عقد =عزمه على تحقيق حلم الحاضرين
سر حيث ما ترغب بنا يا بو حمد =وإحنا على يسراك دائم واليمين
ما شي في الموقف تغيَر واستجد =من مؤتمر وأعضاء و قادة بارزين
كل من يقدم للوطن وأهله مدد =له با نقدم شُهد في فيجان صين
وأرواحنا له با نقدّم والولد =يرخص لبعض الناس كل غالي ثمين
قلبي معك يالشاجع الشهم الأسد =وقلوب لي حضروا ولي هم غائبين
من ذا الذي يقدر يصير اليوم ند =لك وأنت من حافظ على كل شبر طين
يشهد لك التاريخ عن اباً وجد =يا من طفيت النار لي ترشن رشبن
انته مرشحنا ونحن لك سند =عند الشدائد دوب جنبك واقفين
وانته لنا رئيس وقائد للأبد =والشعب خلفك كلهم متوحدين
مالك ومال أهل الفتن وأهل الحسد =لي قتلوا الغشمي وقتلوا سالمين
حافظت ع الوحدة بصبرك والجلد =وأمنتها بأرواح شهداء طاهرين
من زمرة الإلحاد طهرتوا بلد =دين أهله الإسلام والشرع المتين
عمران لك تشهد ومأرب والعند =والعاصمة صنعاء والأعداء شاهدين
خلّصتنا من حزب سنوات استبد =في الحكم دستوره وقانونه لعين
سكّره بالتموين والرز ما يجد =والصيد ما نطعمه واللحم السمين
شل مال خلق الله وطرّد من طرد =والسحل منه ريت شعبه سالمين
اكبر عدو له من ركع وألا سجد =والناس لي في شهر تسعه صائمين
والمال قالوا لا تزكونه ابد =وان با تحج للبيت قم هت لك ضمين
وان تشهد إن الله هو واحد احد =سحبوك نصف الليل واهلك غافلين
صارت كتب لينين دستور البلد =منبوذ من يقرا رياض الصالحين
شعبك شبيه البحر في جزره ومد =كل من سعف للبحر شمسه ما تبين
فتحت الأبواب الكبيرة والسدد =في وجه الاستثمار والمستثمرين
قائد لغير الله ربه ما سجد =رأسه تناغيه النجوم الزاهرين
هجمات جم شعوا لها قاوم وصد =واحنا بجنبه كلنا متكاتفين
رئيس وضع للجهل بالتعليم حد =صالح وكل صالح عياله صالحين
ما باتروح أصوات عشاقك لحد =لو تنطحن يا رمزنا بقعاء طحين
الشعب في عشرين ذا الشهر استعد = بأصوات لك . فيها خصومك طامعين
في يوم عرس الانتخاب المعتمد =لا تبخلوا بأصواتكم يا السامعين
قولوا نعم للروح لي في كل جسد =قولوا نعم للمؤتمر يالناخبين
هذا هو اللي يستحق حكم البلد =واحنا جميعاً له جنود مجندين
شعبك إلي آخر علم يمني وحد = للفوز يا صقر العرب متّلهفين
كل من وقف ضدك من الخوف ارتعد =وأصبح يدور عن حبوب البنسلين
ما حد بعشق أرضه كما الرمز انفرد =من بين حكام العرب والمسلمين
شعب اليمن كله على الماء قد ربد =واختار للمنصب مرشّحه الأمين
قِف يا قلم قبل أن تخط في المستند =عند اسم من به في الشدائد نستعين
يا مؤتمر شعبي بمنسوبك تحد = والفوز لك وإحنا بفوزك فائزين
شعبك بجنبك دائماً يداً بيد = ما باتهزك ريح يا الحصن الحصين
من قبل يتعشى عدوك به تغد =لا للتخلف لا وللمتشددين
لي مالهم مبدأ ولا جودة تجد =صح ما بغيناها على اسماهم تبين
ما قصدهم شي غير تفتيت البلد =ورجوعنا للخلف عشرات السنين
واللي عليه الباب بالقفل أنقلد =خلوه يبقى دوب لأفكاره سجين
لي ما عرف الاثنين من يوم الأحد =على هزيّمته البشر مستعجلين
ماله مكان أن قام عندي أو قعد =أو عند لي بالمال له مستأجرين
أن حر لا حد يلتفت له وان برد =كلمات ع ألفاضي بها يرطن رطين
لو قال مهما قال لك ماهو بند =يا فارس الفرسان يالحصن الزبين
لي بالجهر ربي بلاهم والرمد =ما حد بغاهم يوم له مترشحين
حاجات جم تنقال في هذا الصدد =ذي بعضها وانته فطنها يافطين
التبر والألماس غالي والرشد =سعره كما سعر اللخم والساردين
كل من زرع له ورد من ورده حصد =واللي زرع له شوك يصبر ع الونين
يا ابن اليمن نجمك إلي العليا صعد =والفضل يرجع للرجال الصادقين
ولّت سنين الغبن وأيام النكد =ولّت وحلان اليمن مستبشرين
بالخير لي به قائد الوحدة وعد =والحلم يصبح بعد ما يوعد يقين
بالرغم من كل ما تحقق واعتمد =لعوام خمسة في خططكم قادمين
بنقل مطالب حشد في الحفل احتشد =من عمد والحوطة وحورة والعنين
مطلوبهم معهد ومستشفى وسد =وفصول تستقبل بناتك والبنين
في كل مركز من مراكزها وحد =ارض الشهامة والرجال المخلصين
والكهرباء مطلب ضروري للبلد =وإنشاء طرق زينه تسر الناظرين
والهاتف الخلوي يقرب من بعد =يحتاج له الإنسان كل ساعة وحين
والرخص في سعر الطماطم والثمد =مطلب ينادي به جميع الحاضرين
والزيت والبنزين حتى لو شتد =سعره بغينا دولة الوحدة تعين
والثار له حط يا شديد البأس حد = بالعزم والإصرار كل قاسي يلين
وأخر طلب ع القات شد العزم شد = وازرع محله ياعلي في الأرض تين
طهّر يمننا من ملاعين الكبد =والمرتشية والكذب والسارقين
من كل متملق ومتمصلح تبد =مثلك غلب رأسه يظلّ الفاسدين
مالي طلب شخصي ولا بامد يد =مطلبي من مطلب جميع الحاضرين
وأخر كلام اللي على المنبر قصد = كل عام وانتم يا صحابي طيّبين
والختم صلوا عد زخّات البرد =ع الهادي العدنان سّيد المرسلين