عرض مشاركة واحدة
قديم 01-30-2008, 08:57 PM   #2
كلام في محله
حال نشيط

افتراضي

عدنا إلى العادات ( 1 )
عدنا الى العادات من أخبار السنيـن الماضيات



نـعـــم يـابـنـا أنـا و احـبــابـنـا
أتـيـنـاكـم عـلى مـيـعــادنـــــا
وبانشـرح لـكم عاداتـنا
إذا ماعـنـدكــم منهـا صفات

زواج الــعـام قــد ولـــى وكـان
وأمـا الــيـــوم قــد أن الأوان
إلى وصـف الـولاده والختان
سـوى كانــو عويله أو بنات

عـــروس الـعـام حـبلـه ذي السنـه
تـعـبـر يـومهـا مـتسهنه
مـلـقـت للـمـعـرس ون ونه
إذا شافته قالت هات هات

وقـالــت أمهـا بنـتـي فـقـاع
مسيـكينـه تــظـلي هــاع هــاع
بغت حـومربغت واحدصباع
بغت كبدةبغت سكرنبات

إذا ماجبـت مطـلبهـا يقيـن
عـلامـة باتـأثـــر فـي الـجـنـيـــن
تـقـع فـالفخـد والا فالجبين
وشرغة كم شرايغ عالمات

وخـل أمـك تـعـقبها قليل
وخـلـوا الحمـل يـعبـر عـالجـمـيـل
وصاحي لاتـحملها ثقيـل
إذا عندك خواتك قاعدات

وبـعـض امــات قالــن بـنـتـنـا
بـغـيـناهـا تــلــد في بـيـتـنـا
وحـيـابـك إذا مـاجـيـتـنـا
ولـكـن سـلـم النفقة ميات

وأم الـزوج فـتحـت بـابـهـا
وقـالـت نــحـن مانــسخــى بـهــا
علينـا فـرشـهـا وعـرابـهـا
ودهلتهـا وكل الواجبات

وقــال الــزوج ســــووا كـل شـــي
ورونــا أنـا مــا هـــو عـلــي
بسيط الجم عندي والشـوي
امام الناس مانبغى الشمات

وقالـن لـه بـغـينى كبـش زيـن
يكون اسـود و ملـقي خصوتـين
زي الحرز من حسده و عين
ومن شر النفوس الحاقدات

وهـت عـادك قـعـاده واطيــه
ومفـرش للنفـاس الـغـالـيـة
ومغطى فـوقها و سباعيـه
جـديده والـذبال معثكلات

وعادك هات للسقلـه مـهــد
ســوى كانــوا بنـيـة أو ولـــد
ووط الصوت لاتحكي لحد
وشوف عاد الجنين الا حوات

وهـات عـدي لنا من اجــلها
لـهـا بانـقــرب الــدهـنــه لهـا
ونحـن فـي الحقـيقة أهلها
ونعرف مـذلب المتولدات

عليـنا بانوصي بالصبر
وبانسحق هُـرد معنا ومـُــر
وعاد الكحل ينفع مـايـضر
تفتح به عيون مغمضات

وبانجيب الهضيـمه والقرض
لبطـن الطفـل لاجاه المرض
ولاشي شر ولاكنه الغرض
يـكــون للحـواج مقربات

وبانجيب اللبان الحاسكي
وشي يعطي وشي يروي لكي
من الشيطان مابانشتكي
إذا قدها المقاطر عاكرات

وبانجيب الظفيره والظفـير
و وصله من ظوافير الحمير
كذ المحلب معاالمرالفطير
وعاد الورس يتفتفت قتات

وبانوخذ عسل في مرمره
وجبنا دهـن شغل المعصره
وبانوكل تنعشر مقطره
تكون مرندقات مخـدرات

وبانوكل فلانه محمـيه
ولابد من غـريـمـه ثـانـيـه
تكـون مــصالـيه ومربـيه
وتحضر في المظل هووالمبات

ونبغى ثوب إضافي للنفاس
يلقونه مع النفسـه لباس
ولاشي فيه قرمه أو
كياس يعرفنه كثيرمخيطات

ونبغى صدرللطفـل الصغير
ومسفر لاجل مايملي الحصير
لما قده على رجله يسير
ويعرف وين ظلي وين بات

ولاننسى في الدهـن الحرير
يبعد كل شر منك بعـيـد
على قول المحاكي والقصيد
من عجزان دوم مخرفات

بـذلنا لاجلـهـا كل الجهـود
وكـل غـالـي تقربـه النـقـود
ومايقصرعلى ( سالم عبـود)
يتمم لي الخصال الباقيات

تحقـق حملها زاد الظهـور
ومـرت كاملـه تسعـه شهـور
وفي ليله سمعناها تثور
وحست بالولادة يوم جات

عدنا الى العـادات من
أخبار السنيـن الماضيات
  رد مع اقتباس