دينار الجنوب العربي؟ حرب البيس ... كيف حالك يا ريال؟؟

[حد من الوادي]

حرب البيس ... كيف حالك يا ريال؟؟


السبت 05 نوفمبر 2016 02:28 مساءً
عبدان دهيس


كلامنا اليوم على ((حرب البيس)) .. وحرب البيس مثلها مثل حرب بالدبابات والطيارات والمدافع والصواريخ واقصد بحرب البيس.. الصراع والمقتالة والملباجة والمعصادة ، اللي تدور الان بين الشرعية والانقلابيين على ((البنك المركزي)) وكل طرف يقول ...((البنك المركزي)) حقي انا.. ومحد لابوه فضول فيه، وبسبب هذا الصراع ..اصبح معانا الان (( بنك مركزي)) في عدن .. و((بنك مركزي)) في صنعاء – يعني يا معنى- ((ثنين بنوك)) ...مسبعين مربعين... وهذي نعمة ، و لا توجد بلاد بالدنيا كلها .. فيها ((ثنين بنوك)) حق الدولة الا عندنا .. وكل بنك يعتبر نفسه هوه ((المركزي)) – وهذي نعمة ثانية –



والحكومة الشرعية قالت ... انها با تعطي المشاهرة لجميع الموظفين حقون الدولة اللي في المناطق المحررة .. وفي المناطق اللي تحت سيطرة الانقلابيين ... سوى بسوى ، ومحد زايد على الثاني وجماعة الانقلاب قالت نفس الكلام.. وهذي نعمة ثالث .. ويا نعمة الله دومي – وفي الاخير .. لا البنك المركزي اللي في عدن اوفى بعهده.. ولا البنك المركزي اللي في صنعاء التزم بوعده ، وتحولت ((النعمة)) حقت البنكين.. في لمحة بصر الى ((نقمة)) من ((الجير الثقيل)) .. واخرتها اصبح جميع الموظفين .. مدنيين وعسكريين .. متقاعدين وغير متقاعدين.. احياء وميتين .. في هذي البلاد التعيسة .. بلا مشاهرة ولا يحزنون ، بعضهم من ((اربعة شهور)) .. وبعضهم زايد على ((خمسة شهور)) – شهر ينطح شهر- وهم في حال لا يعلم به الا الله الواحد القهار.. من حياة التعب والنكد والشقاء والشكع.. وكلهم يقولوا وا فقراه.. واجوعاه.. واشماتاه..-معناته – كل الموظفين اللي يتشاهروا من دولة اصبحوا ((على باب الله))..ومن صبح الله يقولوا .. ((يارب يا كريم .. شي معانا لله يا محسنين .. صدقة يا اهل الخير .. الله يستر عليكم .. نحنا بلا مشاهرة .. معانا عيال ملات حلوقنا)).. لا حول ولا قوة الا بالله .. الموظفين حقون الدولة كلهم اقبلوا ((شحاتين )) على ابواب المساجد .. وفي الترقات وقدّام الدكاكين .. ويخوروا ((الريال)) .. يتمنوا حتى يشموا عرفه .. او ((يتعصورا)) جمبه.. وهو يضحك يا سلام –صورة حسينة-ويقولوله .. كيف حالك يا ريال والله فقدناك ..؟ لك وحشة لنا سنين ومنين ماشي عاد نهداك .. وين هبيت ..؟ شجنّت علينا.. نحسبك مت – البقاء لله – او يمكن هبيت بلاد الغربة .. عيب عليك ياريال ...



هذي محبة والا عداوة نحنا صحاب من زمان وجيران.. وبينّا عيش وملح وسكر وشاهي وسليط ودقيق.. وكنّا نخزّن دفرة .. ولعبنا ونحنا جهال سوى.. ((بيذان بيذان حالي سويدان)) .. ويا لوماه عليك يا ريال شوه نسيتنا .. والله انك ارتحت – ما شاء الله – وخرجت لك بطن وصلعة كبيرة .. باين عليك تشرب ((موسي)) .. ايوة والله تمام ...ناقصك ((القميص والعقال)) .. هذا يشلّ لك .. وهاذوك يحطك.. وهذا يقطعك.. وهاذوك يتفلك.. وهذا يصبنك.. وهاذوك يسرقك .. وهذا ينتعك .. وهاذوك يتمرفل بك .. وهذا يتقوّت على عرفك ..وكلهم هانوك وذلوك وتعبوك.. خلاص اليوم انته معزوم عندنا.. عزومة لحجي .. ((تبا أدا وإلا تأديت وإلا المخبازة جنب البيت .. باترقد عندنا وإلا المساجد برود)) .. بانذبح لك كبش .. وبانصلّح زربيان مع فنانين ومطربين – يعني مخدرة-

وبا نعزم الموظفين حقون الدولة كلهم .. شوف نحنا قبايل ماشي كماك بخيلين ، تسك علينا ماشي سيولة – والله ما عرفنا حتى الان شوه هذي السيولة ..؟ طيب ذلحين متى بتدخل جيوبنا يا ريال ..؟ ان شاء الله قريب ، صحيح قريب..؟ يه قريب لمّا مجلس الامن يقرر انا تابع لمنوه.. للشرعية او للانقلابيين ..؟ تبا مني نصيحة لوجه الله يا ريال ..

احسن اتخبأ لمّا الحلال .. قدنا والفين على الجوع والطفر والفقر، وجماعة الانقلابيين طلعوا شطار .. ينزلوا لنا قات ((نقفة ابو ربل)) ويطلعّوا ((جواني ريالات)) هذي هيه ((حرب البيس)) فهمتوا يا حكومة شرعية..؟ ان شاء الله تفهموا .. وعيب عليكم الناس بلا مشاهرات .. بنك في عدن بلا ((بيس)) وتعرض للتفجير.. وبنك في صنعاء ينهبه الانقلابيين .. والله انها ((لعب عويلة)) ..!


جميع الحقوق محفوظة عدن الغد © {year}

[lionasd]

لا حول ولا قوة الا بالله