باغــــــــــــــوزه في سوق الملح؛؛؛؛؛

[الخليفي الهلالي]

	صباح الخير ياحلان السقيفه القصه ومافيها وبصراحه كنت في صنعاء قبل أيام وزرت سوق الملح. المهم لفت نظري ياجماعه رجال في منتصف العمر ملقي فوطه ابوقاروره دويله جم حمراء ولابس دراعه (شميز) ازرق كله عرق وملح على الياقة والأكمام وحول الأباط وملقي كمر جلد من حقات مشايخ حوطة شبوه والشعر ياساتر منعفش تقولون امست فيه طيور وملقي حذي رُمش من تاك الدويله ذي كان يلبسها الجمًاله مصنوعه من جلد الغنم ومعلًق على ظهره مسب جلد يبان من فناه بزبز الرشبه والقصبه. وقلت في نفسي هذا الرجال حضرمي يقين مافيها كلام .. اقتربت منه وسلمت عليه وكأني لا اعنيه مابغيته يجفل ويدبر مني ولكنه رد بقولة حيا... قلت: وين سوق الملح قال هااااااااه أنته إلا فيه سوق الملح حرست يمنه ويسره يفيني غشيم وقلت له هذه هوه سوق الملح ذي يقولون عليه. قال: ذلا ماغيره ويش بغيت من سوق الملح قلت له بغيت رطلين ملح .. قال أنته من وين.؟ قلت له انا من شبوه قال لبوك راعه ذلا معكم جبل ملح في شبوه وعادك تجي لما صنعاء تشتري ملح.؟ قلت.جبل الملح شفه ذاب من زمان ولا عد حصًلنا نقس ملح ولو كل خبزنا سمج بلا ملح. قال: لبوكم راعه ياهل شبوه حيد ملح صم ذوًبتوه كيف.؟ ذلا نا قول ليش أهل شبوه مرتفع عندهم الضغط. قلت:انا حمر عين شفه ذاب من خشومها عمدنا دلاقيمه بالرصاص لما ذوبناه ونا خوك ومالها إلا حمران العيون. قال : كيه بلاه فك لي الطريق بغيت با أندر . قلت:كنك يارجال فزعت من ذكر البنادق.وسألته: أنت من وين ..؟ قال : من شبام العاليه وشفنا مانحب ذكر البنادق والرصاص وانا مغترب وجيت لا صنعاء عابر إلى سيئون بغيت شبام. قلت : ويش أسمك .. قال: محسوبك..باغوزه . قلت :أنته من شبام أعرف فيها ناس جم واحد من شبام عندنا في عتق من آل بن محيسين صاحب مطعم شبام في عتق يلقي كبسه لخم. قال :كيف بالله عليك تعرفه ذا داره جنب داري.!! وماشردنا من شبام سوى النامس والحماء. قلت : كنك أنته مغترب معك قروش وباتلقي لك مكيف يبرد على كورك وعادك هت لك من ذاك الفشاش لصفر حق النامس شفه يقتلها تو. قال : أنتوا ياهل شبوه مغاريم تطيرون عديًكم على الفاشوش .انا ملقي لي ناموسيه بعشره ريال جبتها معي وشفنا نام على الريم ونا ساكه من الحاس وعادني أسمع كلام الجيران كله وهم ماهم دارين أني سمعهم. قلت:هاااااااااه ذلا أنته جاسوس على حلان شبام . قال:شفني مشغول وباروح . قلت: هت رقم جوالك وباعطيك رقم جوالي. قال:اتصل بي على الرقم 00966555000555 لأن تلفوني ما أقدر أتصل منه يستقبل بس المكالمات بس. قلت:خلاص وشفه لوجاك رقم مني شفه يبدا بـــــ00967777 قال: ماعليك أنته أتصل علي شفنا ماشي معي رصيد في الجوال؛؛ودعته وأنا أحسب متى با شوفه مره ثانيه لانه رجال زين....... طبتم؛؛؛؛؛