كلن يراء بعيون طبعه بأختصاااااار (جواب على بن عكعوك )

[طالب النعماني]

بسم الله الرحمن الرحيم
السلام عليكم ورحمة الله وبركاته

قصيدة الشاعر يسلم بن صالح بن عكعوك
مرسله للشاعر طالب بن حسن باتيس ابوراضي

يقول بو صالح رجف قلبي رجف = من قول شاعر ذي شوا قلبي بنار
حتى اختلف نبضه وموقعه اختلف = من فوق كبدي حط وهو خلف الستار
باشر طبيب القلب واعلن واعترف = والطاقم الطبي معه والمستشار
هذا المرض مامر امامي للاسف = كيه اعذروني قد طلبت الاعتذار
من كانت الدنيا على مر الصفف = والقلب من داخل قفص مثل السوار
وش ذي اتابه فوق كبده وانحرف = يمكن يسبب للمراره لانفجار
مافي احد غيرك طبيبن محترف = ينقذ حياتي معضم اولادي صغار
لو فيه عمليه صبرنا عالكلف = بصبر على امقاصك وبصبر عالشفار
مالي في الدنيا ولا لي فالجلف = ولا بـ بدلت فخر والبسها ضهار
امام كل الناس وأشر واعتكف = ساعه يمين الخط وساعه عاليسار
من شافني وقف ودورله ملف = وهو يناظرني وانا حب لافتخار
مشبوح بو صالح كما سبع الطرف = قشعته محنيه وكرعانه قصار
ولأن باشر ياقلم عاصف عصف = والعاصفه بدّمر الموقع دمار
جاوب على شاعر وخلفه مية صف = ذي عرفو المضمون قله بختصار
يصفقو خلفه وطالب قد حلف = انه مع بوزيد في ليل اونهار
يشرب لبن طازج ولا يشري علف = شبعان بن بلخير من در البكار
سنحت له الفرصه وبو راضي عزف = واطرب عوض لعنه بعوده والوتار
انا اشهد ان طالب يجي ضربه نصف = يعرف ببو قلعه ودقلات السبار
يحطها عالكتف مايضرب طفف = واهل القناصه للخنب قدهم بصار
يلونون الغصن لاشافوه حف = من شان يغري صيد تحسب ذا خضار
واستدرجوها حيث ماشي منصرف = لفو حواليها وحصروها حصار
يمكن غبي عقلي معوج وانعطف = لانا كماكم باتمتع بالخصار
بشبع من النعمه وبارد السلف = وش لي بعفة نفس جلبت لي صفار
خلتني اتألم وظهري منقصف = وشكَل القاضي علي خط انتشار
صلط لي اتباعه وهو مابه حسف = واغدق عليهم بالمفطح واستدار
وقال انا راس الهرم مر الصفف = وانتو اشهدولي والهديه فالصمار
والرز والمرقوب عندي فالصحف = لاكن بغيت البر تردونه شمار
قالو بشر مطلبك جاهز لاتخف = انت الجمل وانته الحقيبه والشوار
وانته كما نهرن سخي ماقط جف = واروى صحاريها ودنت بالثمار
وحاتم الطي مات لاكن منحذف = اسمه وهو خلَفك ياشبل النمار
بالله من مثلك في الشعب اعترف = منهو شبيهك بالزعامه والوقار
وفالشجاعه كل احد يطلب نكف = من سيف عنتر ذي يهشمها فقار
ياراعي المدروف عدإنا درف = وشحم المدروف ذي خلف الجدار
قولو لطالب ماتساوينا الكفف = كفت عوض رجحت ولأخرى في شتار
الفرض حق والنافله ماهي كلف = تفسير عالم فذ قضمها حزار
فسرتها يابن حسن والهرج شف = حسو البني ماهو كما حسو الجدار
بصبر على مابي وباضم الشرف = والجود والناموس باحطه شعار
ولعاد بضرب ربما صيب الهدف = وانا بغيته واقفن غربي ضفار
ولعاد ابا ولد القبيلي ينصرف = ويعود لي قروي يحل وسط القرار
والتمر شي جازي وشي قاصر حشف = لاترزمونه يالجماعه في زيار
وختمها خلك على روس الدكف = باينصرك ربي بكل يوم انتصار

جواب الشاعر طالب بن حسن باتيس ابوراضي
على الشاعر يسلم صالح بن عكعوك بن غانم

ياهاجسي لا قللوا زين الكفف=خل رطلك الوافي يرجح بالبهار
من شان بن عكعوك واصحاب المحف=ذي صبحوا الشرقي مع وضح النهار
جوني وانا في الجور هازع لي شنف=واخوتي جنبي عايميني واليسار
مثل الوحوش الكاسره لابان شف=في طين ساعه يقلبون الحلو قار
زندي وسندي في الشدايد والحتف=واكنان راسي لازجم رعد المثار
طرب عليهم لا مسى برقه يرف=عاروس وادي عمد منفوح الصبار
هم سدة الوادي وعمدان الدرف=والواجه لولاء وهم برج المطار
هم منبع الجودة وهم ساس الشرف=والكلمه العلياء وهم دار القرار
مايقبلون العذر سودان العكف=فاخر بهم بين الفخائذ والديار
ماذمهم والا رهنهم في سلف=والا جزفهم بيع في سوق الخصار
والا ذراهم في الجدر ذري الطهف=والا لعب باسيادهم لعب القمار
حاشاء وكلا قدرهم ماباء يخف=لو قطعوني بالجنابي والشفار
حي من مخوه من دعيته ماخلف=يحضر على داعيك في جنه ونار
ياقاصدين الجور مضواكم شرف=حيابكم حياء عدد دحق المسار
جيتوا وجانا السيل من فوق الدكف=والبرق لاهب في مناشيه الكبار
جيتوا وانا ميسور مابي شي كلف=بلقي لكم وجبة غداء حاشي وثار
جيتوا وقدمتوا تقارير الملف=واحنا نرحب بتفاوض والحوار
مادام بن عكعوك بالذنب اعترف=واجب علينا الصفح بعد الاعتذار
حتى ولو إنه في كلامه مانصف=ولا نطق بالصدق في صلب القرار
لكن طباع الناس شوها تختلف=كلن يراء بعيون طبعه باأختصار
مانا الحمد الله عيني ماترف=لا شافت الهمه كبيره في الصرار
ربوني اهلي عالمكارم والجلف=من جاب لي قيراط رديته بهار
نفسي عزيزه ماتعودت المهف=ملقي لها تركوب في سوق العقار
مانا كما لي شال لصحابه وضف=بالغصب والقوه يباء قوته سبار
قولوا لبن عكعوك صف القلب صف=ولاتسي الضن في صاحب وجار
ماتشوف نفسك يوم ترمي عالهدف=تضرب وضربك صوب ماجاء في شتار
تدهن سيورك ماتخليها تحف=والسير لادهنته مشاء سرعه وسار
تصبح على المربوب مازير الحشف=ترزمه لصحابك ولخوتك الصغار
بصمت لك بالخمس بانك محترف=منته غبي تضحك على الروس الكبار
والختم صلوا عد مابارقه رف=على النبي يابخت من جاله وزار

[راس البركه]

صح لسانك يابوراضي
ونعم المخوه ونعم الدار

[ولد ال حيدره]

النعماني صــح لسانك وعلا شانك ودمت اصيل وشاعر غيور

لا اقول الا ادام الله عـــزك

تقبل مروري واعجابي بكلماتك الرائعــه ذات المعاني السامية ..

لك كل الود والاحترام

[طالب النعماني]

اخي راس البركه
بارك الله فيك وابقاك
اشكرك على مروروك الكريم من هنا

[صالح باعمران ابو زايد]

كلام كلام كلام يابو راضي
صح لسااانك ملايين ياشاعر قبيلة ال باتيس
ونعم فيك وفي ربعك كلهم
تقبل مروري واعجابي الشديد بالقصيدة
اخوك صالح باعمران

[مجمل]

كلااااااااااااااااااااااااااااااااااااااااام من العيار الثقيل
شعار كبااااااااااااااااااااااااااااااار
كلام في الصميم
دمتم في عز

[طالب النعماني]

شكرا لكم جميعا
لي عوده معكم قريب

[طالب النعماني]

اقتباس : المشاركة الأصلية كتبت بواسطة راس البركه [ مشاهدة المشاركة ]

صح لسانك يابوراضي ونعم المخوه ونعم الدار

شكرا لك اخي الغالي
راس البركه مرورك شرف لنا جميعا

[بابراهيم]

ابيت حلوة وتستاهل وانتمنالك التوفيق

[خالد بن مهنا]

كلام جميل جدأ,وشعر قوي.. جزل من روس جزله ..الله يعطيكم العافيه ..

الشاعر ابن عكعوك.
الشاعر طالب باتيس

تقبلوا مروري واعجابي الشديد.,.,ولكم خالص التقدير والاحترام

اخيكم:خالد بن مهنا